ନୂଆଦିଲ୍ଲୀ,୧।୩: ଦେଶରେ କରୋନା ଭ୍ୟାକ୍ସିନର ଦ୍ୱିତୀୟ ପର୍ଯ୍ୟାୟ ସୋମବାରଠାରୁ ଆରମ୍ଭ ହୋଇଛି। ଏହି ପର୍ଯ୍ୟାୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସକାଳେ ଟିକା ନେବା ପାଇଁ ଦିଲ୍ଲୀ ଏମ୍ସରେ ପହଞ୍ଚିଥିଲେ। ପରେ ଟିକା ନେଇ ପ୍ରଧାନମନ୍ତ୍ରୀ ଟୁଇଟର୍ରେ ଫଟୋ ଶେୟାର କରିଥିଲେ। ପ୍ରଧାନମନ୍ତ୍ରୀଙ୍କୁ ଟୀକାକରଣ କରିଥିବା ନର୍ସ ପି ନିବେଦା କହିଛନ୍ତି, ସାର୍କୁ ଇଣ୍ଡିଆ କୋଭାକ୍ସିନ୍ର ପ୍ରଥମ ଡୋଜ୍ ଦିଆଯାଇଛି । ଦ୍ୱିତୀୟ ଡୋଜ ୨୮ ଦିନ ପରେ ଦିଆଯିବ। ଟୀକାକରଣ ପରେ ସେ ଆମକୁ ପଚାରିଲେ ଆମେ କେଉଁଠାରୁ ଆସିଛୁ। ସେ କହିଥିଲେ, ଟିକା ଦେଇଦେଲେ ମୁଁ ଜାଣି ପାରିଲି ନାହିଁ।
ସୂଚନାଯୋଗ୍ୟ,କରୋନା ଟିକା ନେବା ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଟୁଇଟ କରି କହିଛନ୍ତି, ମୁଁ ଏମ୍ସରେ କରୋନା ଟିକା ଗ୍ରହଣ କରିଛି, କରୋନା ବିରୋଧରେ ବିଶ୍ୱ ସଂଗ୍ରାମକୁ ଦୃଢ କରିବା ପାଇଁ ଆମର ଡାକ୍ତର ଏବଂ ବୈଜ୍ଞାନିକମାନେ କିପରି ଶୀଘ୍ର କାର୍ଯ୍ୟ କରିଛନ୍ତି ତାହା ପ୍ରଶଂସନୀୟ। ମୁଁ ସମସ୍ତଙ୍କୁ ନିବେଦନ କରୁଛି ଯେଉଁମାନେ ଟିକା ନେବାକୁ ଯୋଗ୍ୟ, ଏକାଠି ହୁଅନ୍ତୁ, ମିଳିତ ଭାବେ ଭାରତକୁ କରୋନା ମୁକ୍ତ କରନ୍ତୁ ବୋଲି ସେ କହିଛନ୍ତି।
