ବେଳେବେଳେ ରାତ୍ରିଭୋଜନ ଖାଇକି ଶୋଇଲେ ବି ରାତି ଅଧରେ ଅନେକଙ୍କୁ ଭୋକ ଲାଗିଥାଏ; ଯଦ୍ଦ୍ବାରା ସେମାନଙ୍କ ନିଦ ଭାଙ୍ଗିଯାଏ ଆଉ ସେମାନେ ରାତିରେ ଉଠି କିଛି ନା କିଛି ଖାଇକି ଶୋଇଥାନ୍ତି। ତେବେ ରାତି ଅଧରେ ଭୋକ ଲାଗିଲେ କ’ଣ ଖାଇବା ଦ୍ୱାରା ଭୋକ ବନ୍ଦ ହେବା ସହ ଦେହ ସୁସ୍ଥ ରହିଥାଏ, ସେ ନେଇ ଅନେକେ ଜାଣି ନ ଥାନ୍ତି। ଫଳରେ ସେମାନେ ରାତିରେ ୟାଡୁ ସ୍ୟାଡୁ କ’ଣ ଟିକେ ଖାଇଦେଇ ଶୋଇ ପଡିବା ଦ୍ୱାରା ସକାଳକୁ ସେମାନଙ୍କୁ ଆଉ ଫୁର୍ତ୍ତି ଲାଗି ନ ଥାଏ। ତେଣୁ ଏ ନେଇ କେତେକ ବିଶେଷଜ୍ଞମାନେ ମତ ଦେଇଛନ୍ତି ଯେ, ଯଦି ରାତି ଅଧରେ ଭୋକ ଲାଗେ ତା’ହେଲେ ସ୍ନାକ୍ସ କିମ୍ବା ଫାଷ୍ଟଫୁଡ୍ ଖାଦ୍ୟ ପରିବର୍ତ୍ତେ ଫଳ ଖାଇବା ସବୁଠୁ ଲାଭ ଦାୟକ ହୋଇଥାଏ। କାରଣ ଫଳରେ ଭିଟାମିନ୍ସ, ମିନେରାଲ୍ସ, ଫାଇଟୋକେମିକାଲ୍ ତଥା ଫାଇବର୍ ଆଦି ପୋଷଣ ତତ୍ତ୍ୱ ପ୍ରଚୁର ପରିମାଣରେ ରହିଥାଏ। ବିଶେଷକରି ପାଚିଲା କଦଳୀ, ସେଓ, ନାସପାତି ଭଳି ଫାଇବର୍ଯୁକ୍ତ ଫଳ ରାତିରେ ଖାଇଲେ କିଛି ଅସୁବିଧା ନାହିଁ। ଏପରି କି ତରଭୁଜ ଓ ଷ୍ଟ୍ରବେରୀ ମଧ୍ୟ ରାତିରେ ଖାଇପାରିବେ। କିନ୍ତୁ ମନେରଖିବେ ଖାଦ୍ୟ ଖାଇବାର କିଛି ସମୟ ପରେ ଯେମିତି ଫଳ ଖାଇବେ। ନଚେତ୍ ଏହା ପାଚନ କ୍ରିୟା ଉପରେ ଖରାପ ପ୍ରଭାବ ପକାଇଥାଏ।