ଓ୍ବାଶିଂଟନ/କ୍ୱିଭ୍,୭।୩ : ଯଦି ରୁଷିଆର ଆକ୍ରମଣ ସମୟରେ ୟୁକ୍ରେନ ରାଷ୍ଟ୍ରପତି ଭୋଲୋଡିମିର ଜେଲେନସ୍କିଙ୍କୁ ହତ୍ୟା କରାଯାଏ, ତେବେ ୟୁକ୍ରେନ ସରକାରଙ୍କର ଏକ ବିକଳ୍ପ ଯୋଜନା ଅଛି। ରବିବାର ସିବିଏସଇ ନ୍ୟୁଜ ‘ଫେସ ଦି ନେଶନ’କୁ ଦେଇଥିବା ଏକ ସାକ୍ଷାତକାରରେ ଆମେରିକାର ବୈଦେଶିକ ସଚିବ ଆଣ୍ଟୋନି ବ୍ଲିଙ୍କେନ ଏହି ସୂଚନା ଦେଇଛନ୍ତି।
ଜେଲେନସ୍କିଙ୍କ ବିନା ୟୁକ୍ରେନ ସରକାରଙ୍କୁ ସମର୍ଥନ କରିବା ପାଇଁ ଆମେରିକା ମଧ୍ୟବର୍ତ୍ତୀକାଳୀନ ଯୋଜନା ଉପରେ କାର୍ଯ୍ୟ କରୁଛି କି ନାହିଁ ବୋଲି ବ୍ଲିଙ୍କେନଙ୍କୁ ପଚରା ଯାଇଥିଲା। ଏହାର ଉତ୍ତରରେ ସେ କହିଛନ୍ତି, ୟୁକ୍ରେନୀୟମାନଙ୍କର ପାଖରେ ଯୋଜନା ଅଛି। କିନ୍ତୁ ମୁଁ ଏହା ବିଷୟରେ କହିବି ନାହିଁ କିମ୍ବା କୌଣସି ସୂଚନା ପ୍ରଦାନ କରିବି ନାହିଁ। ରୁଷିଆ ଜେଲେନସ୍କିଙ୍କୁ ହତ୍ୟା କରିବା ଲାଗି ଷଡ଼ଯନ୍ତ୍ର କରୁଥିବା ନେଇ ଅନ୍ତର୍ଜାତୀୟସ୍ତରରେ ଚର୍ଚ୍ଚା ହେଉଛି।
ଜେଲେନସ୍କି ଶନିବାର ଆମେରିକାର ସାଂସଦଙ୍କୁ ଏକ ବ୍ୟକ୍ତିଗତ ଭିଡିଓ କଲରେ କହିଛନ୍ତି ଯେ ସେ ତାଙ୍କୁ ଶେଷ ଥର ପାଇଁ ଜୀବନ୍ତ ଦେଖୁଛନ୍ତି। ଜେଲେନସ୍କି କହିଛନ୍ତି ଯେ ୟୁକ୍ରେନ ଏହାର ଆକାଶମାର୍ଗକୁ ସୁରକ୍ଷା ଦେବା ଆବଶ୍ୟକତା ରହିଛି।
ଉତ୍ତର ଆଟଲାଣ୍ଟିକ ଚୁକ୍ତି ସଂଗଠନ (ନାଟୋ) ଦ୍ୱାରା ନୋ-ଫ୍ଲାଏ ଜୋନ ଘୋଷଣା କିମ୍ବା ୟୁକ୍ରେନ୍ ସୁରକ୍ଷା ପାଇଁ ଅଧିକ ଯୁଦ୍ଧବିମାନ ପଠାଇଲେ ଦେଶର ଆକାଶମାର୍ଗ ସୁରକ୍ଷିତ ରହି ପାରିବ ବୋଲି ସେ କହିଥିଲେ। ଅଧିକ ଯୁଦ୍ଧ ବିମାନ ପଠାଇବା ଏବଂ ରୁଷିଆରୁ ତୈଳ ଆମଦାନୀ ହ୍ରାସ କରିବା ପାଇଁ ସେ ଆମେରିକାକୁ ଅନୁରୋଧ କରିଥିଲେ। ଯାହା ଦ୍ୱାରା ତାଙ୍କ ଦେଶ ରୁଷିଆର ସାମରିକ କାର୍ଯ୍ୟାନୁଷ୍ଠାନକୁ ପ୍ରତିହତ କରିପାରିବ।
ଯଦି ରୁଷିଆ ଯୁଦ୍ଧ ସମୟରେ ଜେଲେନସ୍କିଙ୍କୁ ହତ୍ୟା କରେ ତେବେ ଏହାର ପରିଣାମ କ’ଣ ହେବ ବୋଲି ବ୍ଲିଙ୍କେନଙ୍କୁ ପଚରାଯାଇଥିଲା। ଏହି ବ୍ଲିଙ୍କେନ କହିଛନ୍ତି, ସର୍ବପ୍ରଥମେ ମୋତେ କହିବାକୁ ଦିଅନ୍ତୁ ଯେ ରାଷ୍ଟ୍ରପତି ଜେଲେନସ୍କି ଯେଉଁ ନେତୃତ୍ୱ ପ୍ରଦର୍ଶନ କରିଛନ୍ତି ତାହା ଉଲ୍ଲେଖନୀୟ। ତାଙ୍କର ଅବିଶ୍ୱସନୀୟ ସାହସ ୟୁକ୍ରେନ୍ ଲୋକଙ୍କ ମଧ୍ୟରେ ପ୍ରତିଫଳିତ ହୋଇଛି ବୋଲି ସେ କହିଛନ୍ତି। ତେବେ ସେ ଏହି ପ୍ରଶ୍ନର ସିଧାସଳଖ ଉତ୍ତର ନଦେଇ ଏହାକୁ ଏଡାଇ ଦେଇଛନ୍ତି।