ସମଗ୍ର ବିଶ୍ୱରେ ବର୍ତ୍ତମାନ କରୋନା ମହାମାରୀର ଦ୍ୱିତୀୟ ଲହର ଦ୍ରୁତ ଗତିରେ ମାଡ଼ି ଚାଲିଛି। ପ୍ରତିଦିନ ଲକ୍ଷଲକ୍ଷ ଲୋକ ସଂକ୍ରମିତ ହେଉଛନ୍ତି। ସ୍ବାସ୍ଥ୍ୟ ବିଶେଷଜ୍ଞମାନେ କରୋନାକୁ ରୋକିବା ପାଇଁ ମାସ୍କ ପିନ୍ଧିବାକୁ ପରାମର୍ଶ ଦେଉଛନ୍ତି। କାରଣ ମାସ୍କ ହିଁ କରୋନା ସହ ଲଢ଼ିବାର ଏକମାତ୍ର ପ୍ରଭାବଶାଳୀ ଅସ୍ତ୍ର ଭାବରେ କାର୍ଯ୍ୟ କରେ। କେବଳ ଏତିକି ନୁହେଁ, ଘରୁ ବାହାରକୁ ଯିବାବେଳେ ସ୍ବାସ୍ଥ୍ୟ ବିଶେଷଜ୍ଞମାନେ ସୁରକ୍ଷା ପାଇଁ ଡବଲ ମାସ୍କ ବ୍ୟବହାର କରିବାକୁ କହୁଛନ୍ତି। ମାତ୍ର ସୋସିଆଲ ମିଡିଆରେ କୁହାଯାଉଛି କି, ଦୀର୍ଘ ସମୟ ଧରି ମାସ୍କ ବ୍ୟବହାର କଲେ ଶୀରରରେ କାର୍ବନ ଡାଇଅକ୍ସାଇଡର ପରିମାଣ ବଢ଼ିପାରେ ଏବଂ ଅମ୍ଳଜାନ କମିଯାଏ।
ଭାଇରାଲ ପୋଷ୍ଟରେ କୁହାଯାଇଛି, ଜଣେ ବ୍ୟକ୍ତି ଦିନସାରା ୫୫୦ ଲିଟର ଅମ୍ଳଜାନ ଆବଶ୍ୟକ କରନ୍ତି। ଯାହାକୁ ପ୍ରାକୃତିକ ଉପାୟରେ ଗ୍ରହଣ କରନ୍ତି। କିନ୍ତୁ ମାସ୍କ ବାନ୍ଧିବା ଦ୍ୱାରା ଦିନସାରା ମାତ୍ର ୨୫୦ରୁ ୩୫୦ ଲିଟର ଅମ୍ଳଜାନ ନେବାରେ ସକ୍ଷମ ଅଟନ୍ତି। ଏଥିସହିତ ଶରୀରରୁ ନିର୍ଗତ କାର୍ବନ ଡାଇଅକ୍ସାଇଡ୍, ଯାହା ବାୟୁରେ ଦ୍ରବୀଭୂତ ହେବା ଉଚିତ୍। କିନ୍ତୁ ମାସ୍କ ଲଗାଇବା ଦ୍ୱାରା ଫୁସ୍ଫୁସକୁ ଫେରିଯାଉଛି। ଏହି କାରଣରୁ ଶରୀରରେ କାର୍ବନ ଡାଇଅକ୍ସାଇଡର ପରିମାଣ ବୃଦ୍ଧି ପାଇବାରେ ଲାଗିଛି। ଅମ୍ଳଜାନର ସ୍ତର ହ୍ରାସ ପାଉଛି।
ଏହି ପୋଷ୍ଟ ଭାଇରାଲ ହେବା ବିଷୟରେ ପିଆଇବିରୁ ଏକ ସ୍ପଷ୍ଟୀକରଣ ଆସିଛି। ପିଆଇବି ଫ୍ୟାକ୍ଟ ଚେକ୍ ଟିମ୍ ଅନୁଯାୟୀ, ଏହି ପୋଷ୍ଟରେ ଦିଆଯାଇଥିବା ଦାବି ସମ୍ପୂର୍ଣ୍ଣ ମିଥ୍ୟା ଅଟେ। ପିଆଇବି କହିଛି ଯେ, କରୋନା ଭୂତାଣୁ ସଂକ୍ରମଣରୁ ରକ୍ଷା ପାଇବା ପାଇଁ ମାସ୍କକୁ ସଠିକ୍ ଭାବରେ ବ୍ୟବହାର କରିବା ଅତ୍ୟନ୍ତ ଗୁରୁତ୍ୱପୂର୍ଣ୍ଣ।