ପୁରୀ ଅଫିସ, ୧୭ା୯: ଉପଭୋକ୍ତାଙ୍କ ସମସ୍ୟା ନେଇ ଭାରତୀୟ କମ୍ପ୍ୟୁନିଷ୍ଟ ପାର୍ଟି (ମାକର୍ସବାଦୀ) (ସିପିଆଇଏମ୍) ପୁରୀ ଜିଲା କମିଟି ପକ୍ଷରୁ ଶୁକ୍ରବାର ଜିଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ ସହ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଜିଲାପାଳଙ୍କୁ ଏକ ସ୍ମାରକପତ୍ର ଦିଆଯାଇଛି। ସ୍ମାରକପତ୍ରରେ ଦର୍ଶାଯାଇଛି ଯେ, ଗତ ଫେବୃୟାରୀ ମାସରୁ ପୁରୀ ଜିଲାରେ ଗହମ ଯୋଗାଣ ବନ୍ଦ ହୋଇଯାଇଛି। ଗହମ ପାଇଁ ମିଳୁଥିବା ଚାଉଳକୁ କାଟି ନିଆଯାଇଛି। କିରୋସିନ ଲିଟର ପ୍ରତି ୧୨୦ ଟଙ୍କା। ଏହି ଦର ପେଟ୍ରୋଲ, ଡିଜେଲ ଦରଠାରୁ ବଳିଗଲାଣି। ଫଳରେ ଖାଉଟି ହନ୍ତସନ୍ତ ହେଉଛନ୍ତି। ସେହିପରି ଖୋଲା ବଜାରରେ ଅଟା କିଲୋ ୩୩ ଟଙ୍କା ହୋଇଥିବାରୁ ଗରିବ ଓ ମଧ୍ୟବିତ୍ତ ଲୋକ ହନ୍ତସନ୍ତ ହେଉଛନ୍ତି। ଏହାସତ୍ତ୍ୱେ ଜିଲାର ଲୋକ ପ୍ରତିନିଧିମାନେ ଏ ବିଷୟରେ ନୀରବ ରହିଛନ୍ତି ଯାହା ଦୁର୍ଭାଗ୍ୟଜନକ। ସମସ୍ତ ବିଧାୟକ, ଏମ୍ପି, ନେତା ମନ୍ତ୍ରୀ ସମସ୍ତେ ଚୁପ। ପ୍ରଶାସନ ପରିବହନ ସମସ୍ୟା କଥା କହି ନିଜ ମୁଣ୍ଡରୁ ଦୋଷ ଖସାଉଛି। ଏଥିଯୋଗୁ ସାଧାରଣରେ ଅସନ୍ତୋଷ ବଢୁଛି। ଖାଉଟିଙ୍କୁ ତୁରନ୍ତ ଗହମ ପ୍ରଦାନ, କଣ୍ଟ୍ରୋଲରେ ମିଳୁଥିବା ଚାଉଳକୁ କାଟିବା ବନ୍ଦ, ନୂତନ ଆବେଦନକାରୀଙ୍କୁ ଖାଉଟି କାର୍ଡ ଯୋଗାଇବା ସହ କିରୋସିନ ଦର କମାଯିବାକୁ ଦଳ ଦାବି କରିଛି। ବିକ୍ଷୋଭରେ ଜିଲା ସଂଯୋଜକ ଜଗନ୍ନାଥ ଦେଓ, ଶରତ କୁମାର ରାୟଗୁରୁ, ରଣଜିତ ନାୟକ, ଟୁନା ନାୟକ, ପବିତ୍ର ମୋହନ ଦଳାଇ, ପ୍ରତିମା ଦେଓ, ବନମାଳି ବରାଳ, ମୁନା ପ୍ରଧାନ, ଦେବବ୍ରତ ସାହୁ ଓ କୃପାସିନ୍ଧୁ ପଣ୍ଡା ପ୍ରମୁଖ ସାମିଲ ଥିଲେ।