ନୂଆଦିଲ୍ଲୀ,୧୦।୧୧: ଇଣ୍ଡିଆନ୍ ପ୍ରିମିୟର ଲିଗ୍(ଆଇପିଏଲ୍ର-୨୦୨୦)ର ଅନ୍ତିମ ମ୍ୟାଚ୍ ମଙ୍ଗଳବାର ଖେଳାଯିବ। ପ୍ରଥମ ଯୋଗ୍ୟତା ପର୍ଯ୍ୟାୟରେ ଦିଲ୍ଲୀ କ୍ୟାପିଟାଲ୍ସକୁ ହରାଇ ମୁମ୍ବାଇ ଇଣ୍ଡିଆନ୍ସ ଫାଇନାଲ ଟିକେଟ ପାଇଥିଲା। ଅପରପକ୍ଷେ ଦିଲ୍ଲୀ ଦଳ ଦ୍ୱିତୀୟ ଯୋଗ୍ୟତା ପର୍ଯ୍ୟାୟରେ ସନରାଇଜର୍ସ ହାଇଦ୍ରାବାଦକୁ ପରାସ୍ତ କରି ଫାଇନାଲରେ ପ୍ରବେଶ କରିଛି। ଫଳରେ ଆଜିର ମ୍ୟାଚ୍ ଦିଲ୍ଲୀ କ୍ୟାପିଟାଲ୍ସ-ମୁମ୍ବାଇ ଇଣ୍ଡିଆନ୍ସ ମଧ୍ୟରେ ଖେଳାଯିବ। ଗୋଟିଏ ପଟେ ସର୍ବାଧିକ ଟାଇଟଲ ଜିତିଥିବା ମୁମ୍ବାଇ ଦଳ ମ୍ୟାଚ୍ ଜିତିବାକୁ ଚେଷ୍ଟା କରିବା ବେଳେ ପ୍ରଥମ ଥର ପାଇଁ ଫାଇନାଲ ଖେଳୁଥିବା ଦିଲ୍ଲୀ ରେକର୍ଡ ହାସଲ ଲକ୍ଷ୍ୟରେ ରହିବ ବୋଲି କୁହାଯାଉଛି।
ଟୁର୍ନାମେଣ୍ଟରେ ସର୍ବକନିଷ୍ଠ ଅଧିନାୟକ ଶ୍ରେୟସ୍ ଆୟର ଦିଲ୍ଲୀର ମଙ୍ଗ ଧରିଥିବା ବେଳେ ଅଭିଜ୍ଞ ତଥା ସଫଳ ଅଧିନାୟକ ରୋହିତ ଶର୍ମା ମୁମ୍ବାଇ ନେତୃତ୍ୱ ନେବେ। ତେବେ ଏହି ବଡ ମ୍ୟାଚ୍ ଆପଣ କେଉଁଠି ଏବଂ କେବେ ଦେଖିପାରିବେ ଆସନ୍ତୁ ଜାଣିବା।
-ଫାଇନାଲ ମ୍ୟାଚ୍ ଦୁବାଇର ଅନ୍ତର୍ଜାତୀୟ କ୍ରିକେଟ ଷ୍ଟାଡିୟମରେ ଖେଳାଯିବ। ମଙ୍ଗଳବାର ଭାରତୀୟ ସମୟ ୭.୩୦ରେ ଆରମ୍ଭ ହେବ। ଏହାକୁ ଆପଣ ଭାରତରେ ଷ୍ଟାର ସ୍ପୋଟ୍ସ ନେଟଓ୍ବାର୍କର ସମସ୍ତ ଚ୍ୟାନେଲରେ ଦେଖିପାରିବେ। ଅନ୍ଲାଇନ୍ ଅପ୍ଡେଟ୍, ସ୍କୋରବୋର୍ଡ ଏବଂ ଅନ୍ୟାନ୍ୟ ସୂଚନା ପାଇଁ ଆଇପିଏଲ୍ ୨୦୨୦ ପେଜ୍କୁ ମଧ୍ୟ ଯାଇପାରିବେ।