ବମ୍ବେ: ବଲିଉଡ୍କୁ ଗୋଟିଏରୁ ବଳି ଗୋଟିଏ ସୁପରହିଟ୍ ଫିଲ୍ମ ଦେଇଛନ୍ତି ନିର୍ଦ୍ଦେଶକ ମହେଶ ଭଟ୍ଟ। ହେଲେ ସର୍ବଦା ସିନେମାଠାରୁ ଅଧିକ ତାଙ୍କ ବିବାଦକୁ ନେଇ ଚର୍ଚ୍ଚା ହୋଇଥାଏ। ସେଭଳି ଏକ ବିବାଦ ଅଭିନେତା ଅନୁପମ ଖେରଙ୍କ ସହ ତାଙ୍କର ହୋଇଥିଲା।
୧୯୮୪ରେ ରିଲିଜ ହୋଇଥିଲା ମହେଶଙ୍କ ଫିଲ୍ମ ‘ସାରାଂଶ’। ଏହାକୁ ବେଶ ପସନ୍ଦ କରାଯାଇଥିଲା। ବିଶେଷକରି ଅନୁପମଙ୍କ ଅଭିନୟ ସମସ୍ତଙ୍କ ଦୃଷ୍ଟି ଆକର୍ଷଣ କରିଥିଲା। ହେଲେ ବହୁତ କମ୍ ଲୋକ ଜାଣନ୍ତି ଅନୁପମଙ୍କୁ ଫିଲ୍ମରୁ ବାହାର କରିବା ପାଇଁ ଚାହୁଁଥିଲେ ମହେଶ। ନିଜେ ଏକ ସାକ୍ଷାତକାରରେ ବିବାଦ ଉପରୁ ପରଦା ଉଠାଇଥିଲେ ଅନୁପମ।
ମହେଶଙ୍କୁ ଭେଟି କାମ ଦେବା ଲାଗି କହିଥିଲେ ଅନୁପମ। ଏଥିରେ ସେ ଷ୍ଟେଜ୍ରେ ତୁମେ ଭଲ ପ୍ରଦର୍ଶନ ଦିଅ ବୋଲି ଜାଣିଥିବା କହିଥିଲେ। ଏହା ଶୁଣି ନା, ଆପଣ ଭୁଲ ଶୁଣିଛନ୍ତି। ଷ୍ଟେଜ୍ରେ ମୁ ବହୁତ ଭଲ କାମ କରିଥାଏ ବୋଲି ଅଭିନେତା କହିଥିଲେ। ଏଭଳି ଜବାବ ଶୁଣି ମହେଶ ତାଙ୍କୁ ଫିଲ୍ମରେ କାମ କରିବାର ସୁଯୋଗ ଦେଇଥିଲେ।
କିଛି ଦିନ ପରେ ଫିଲ୍ମର ଶୁଟିଂ ଆରମ୍ଭ ହେବାକୁ ଯାଉଥିଲା। ଏହି ସମୟରେ ଫିଲ୍ମରେ ଅନୁପମ ଯେଉଁ ଚରିତ୍ରରେ ଅଭିନୟ କରିଥାନ୍ତେ, ସେଥିପାଇଁ ଅନ୍ୟଜଣେଙ୍କୁ ଠିକ୍ କରାଯାଇଥିବା ଖବର ମିଳିଥିଲା। ତାଙ୍କ ଚରିତ୍ର ସଞ୍ଜୀବ କୁମାରଙ୍କୁ ଦିଆଯାଇଥିଲା। ଏହା ଜାଣି ଅନୁପମ ଚକିତ ହେବା ସହ ବହୁତ ରାଗି ଯାଇଥିଲେ। ଏ ସହର ମୋ ପାଇଁ ନୁହେଁ ବୋଲି ଭାବିଥିଲେ। ଏପରିକି ନିଜର ଜିନିଷପତ୍ର ସଜାଡ଼ି ବମ୍ବେ ଛାଡ଼ିବାକୁ ନିଷ୍ପତ୍ତି ନେଇଥିଲେ ଅନୁପମ।
ଯିବେ ଯେ, ହେଲେ ତା ପୂର୍ବରୁ ମହେଶଙ୍କ କଡ଼ା ଜବାବ ଦେବେ ବୋଲି ଅଭିନେତା ଚିନ୍ତା କରିଥିଲେ। ଏଥିପାଇଁ ସେ ମହେଶଙ୍କ ଘରକୁ ଯାଇଥିଲେ। ତାଙ୍କ ଘରର ଏଲିଭେଟର କାମ କରୁ ନ ଥିଲା। ଶେଷରେ ସେ ଶିଡି ଚଢ଼ି ଉପରକୁ ଯାଇଥିଲେ। କବାଟ ବାଡାଇଥିଲେ। କବାଟ ଖୋଲିବା ପରେ ମହେଶ କହିଥିଲେ, ଭଲ ହେଲା ତୁମେ ଆସିଲ। ସଞ୍ଜୀବ କୁମାର ଫିଲ୍ମ କରିବେ। ତୁମେ ଦ୍ୱିତୀୟ ଭାଗ କରିବ। ତୁମକୁ ପ୍ରଯୋଜକଙ୍କ ଏହି କଥାକୁ ବୁଝିବାକୁ ହେବ। ଚରିତ୍ରଟି ବଡ଼ ନ ହେଲେ ବି ପ୍ରଶଂସିତ ହେବ।
ରାଗରେ ଥିବା ଅନୁପମ କିନ୍ତୁ ଶାନ୍ତ ପଡ଼ି ନ ଥିଲେ। ସେ କହିଥିଲେ, ରୁହନ୍ତୁ। ଝରକା ପାଖକୁ ଯାଆନ୍ତୁ, ତଳେ ମୋର ଭଡ଼ାଗାଡ଼ି ଛିଡ଼ା ହୋଇଛି। ସେଥିରେ ମୋ ଜିନିଷପତ୍ର ରହିଛି। ମୁଁ ବମ୍ବେ ଛାଡ଼ି ଚାଲିଯାଉଛି। ହେଲେ ଯିବା ପୂର୍ବରୁ କହିବାକୁ ଆସିଛି ଯେ ପୃଥିବୀର ବଡ଼ ମିଛ କହୁଥିବା ବ୍ୟକ୍ତି ସହ ବିଶ୍ୱାସଘାତକ,ଧୋକାବାଜ ଆପଣ। ଆପଣ ‘ସଚ୍’ ଫିଲ୍ମ କରୁଛନ୍ତି ହେଲେ ସତ୍ୟତା ଆପଣଙ୍କ ଭିତରେ ନାହିଁ। ଏହା କହୁ କହୁ ଅନୁପମ କାନ୍ଦି ପକାଇଥିଲେ।
ଗାଳି କରି ଗାଡ଼ି ପାଖକୁ ଯିବା ବେଳେ ମହେଶ ତାଙ୍କୁ ପୁଣିଥରେ ଘରକୁ ଡ଼ାକିଥିଲେ। ଅନୁପମ ଫେରିବା ପରେ ମହେଶ ପ୍ରଯୋଜକଙ୍କୁ ଫୋନ କରି ଉକ୍ତ ଚରିତ୍ର ସଞ୍ଜିବ ନୁହେଁ ବରଂ ଅଭିନେତା କରିବେ ବୋଲି କହିଥିଲେ। ଏହି ଭୂମିକା ଅନ୍ୟ କେହି ଭଲ ଭାବେ ତୁଲାଇପାରିବେ ନାହିଁ ବୋଲି ମଧ୍ୟ କହିଥିଲେ। ଶେଷରେ ତାହାହିଁ ହୋଇଥିଲା।
ଆଜି ମହେଶଙ୍କ ଜନ୍ମଦିନ ହୋଇଥିବା ବେଳେ ପ୍ରଶଂସକମାନେ ବିବାଦକୁ ପଛରେ ପକାଇ ତାଙ୍କୁ ଶୁଭେଚ୍ଛା ଜଣାଉଛନ୍ତି।