ନୂଆଦିଲ୍ଲୀ,୭।୧: ଗୋଟିଏ ଓଭରର ୬ ବଲ୍ରେ ୬ ଛକା ମାରିବାର ମୂହୁର୍ତ୍ତ ବହୁତ କମ୍ ଦେଖିବାକୁ ମିଳେ। ଏହାକୁ କ୍ରିକେଟ ପ୍ରଶଂସକ ସହଜରେ ଭୁଲି ନ ଥାନ୍ତି। ଅନ୍ତରାଷ୍ଟ୍ରୀୟ କ୍ରିକେଟରେ ଦକ୍ଷିଣ ଆଫ୍ରିକାର ହର୍ଶଲ ଗିବ୍ସ ବିଶ୍ୱକପ୍ରେ ଏହି କମାଲ କରିଦେଖାଇଥିବା ବେଳେ ଭାରତୀୟ ବ୍ୟାଟ୍ସମ୍ୟାନ ଯୁବରାଜ ସିଂହ ମଧ୍ୟ ଟି୨୦ ବିଶ୍ୱକପ୍ରେ ଏହି ସଫଳତା ହାସଲ କରିଥିଲେ। ଏହି ରେକର୍ଡଗୁଡ଼ିକୁ ଭାଙ୍ଗିବା ଅନ୍ୟ ବ୍ୟାଟ୍ସମ୍ୟାନଙ୍କ ପକ୍ଷରେ ସହଜ ନୁହେଁ। ହେଲେ ଯଦି ଆପଣଙ୍କୁ ଲାଗୁଛି କ୍ରିକେଟଜଗତରେ ୬ ବଲ୍ରେ ୩୬ ରନ୍ କରିବା ସର୍ବାଧିକ ରେକର୍ଡ, ତେବେ ଆପଣ ଭୁଲ ଭାବୁଛନ୍ତି।
୨୧ବର୍ଷ ପୂର୍ବେ ପ୍ରଥମ ଶ୍ରେଣୀ କ୍ରିକେଟରେ ଗୋଟିଏ ଓଭରରେ ବ୍ୟାଟ୍ସମ୍ୟାନ ୭୭ ରନ୍ କରି ସମସ୍ତଙ୍କୁ ଚମକାଇ ଦେଇଥିଲେ। ୧୯୯୦ରେ ନ୍ୟୁଜିଲାଣ୍ଡର ଶେଲ ଟ୍ରଫି ଟୁର୍ନାମେଣ୍ଟରେ ବେଲିଙ୍ଗଟନ ଏବଂ କୈଟରବରୀଙ୍କ ମଧ୍ୟରେ ମ୍ୟାଚ୍ ଥିଲା। ଏହି ମ୍ୟାଚ୍ରେ ବେଲିଙ୍ଗଟନ ଟିମ୍ ଅଡ଼ୁଆରେ ଫସିଥିଲା। ଟିମ୍ ମ୍ୟାଚ୍ ଡ୍ର କରିବାକୁ ଚାହୁଁ ନ ଥିଲା।
ମ୍ୟାଚ୍ରେ ବେଲିଙ୍ଗଟନ୍ ପ୍ରଥମେ ବ୍ୟାଟିଂ କରି ୨୦୨ ରନ୍ କରିଥିଲା। ଏହାର ଜବାବରେ କୈଟରବରୀ ୭ ଉଇକେଟ ହରାଇ ୨୨୧ ରନ୍ କରି ପାଳି ଘୋଷଣା କରିଥିଲେ। ପରେ ବେଲିଙ୍ଗଟନ ଦ୍ୱିତୀୟ ପାଳିରେ ୩୦୯ ରନ୍ କରିଥିଲେ ଏବଂ କୈଟରବରୀ ସମ୍ମୁଖରେ ୨୯୧ ରନ୍ର ବିଜୟଲକ୍ଷ୍ୟ ଦେଇଥିଲେ। ଶେଷ ପାଳିରେ ଦଳର ପ୍ରଭାବୀ ବ୍ୟାଟିଂ ସତ୍ତ୍ୱେ ମ୍ୟାଚ୍ ଡ୍ର ହୋଇଯାଇଥାନ୍ତା।
ଶେଷରେ କୈଟରବରୀକୁ ୧୨ ରନ୍ରେ ୯୫ ରନ୍ର ଆବଶ୍ୟକତା ରହିଥିଲା। ଏହା ସମ୍ଭବ ଲାଗୁ ନ ଥିବା ବେଳେ ହାତରେ ୨ ଉଇକେଟ ଥିଲା। ଅପରପକ୍ଷେ ବେଲିଙ୍ଗଟନର ଅଧିନାୟକ ବ୍ୟାଟ୍ସମ୍ୟାନ୍ଙ୍କୁ ରନ୍ କରିବାକୁ ଦିଆଯାଉ ବୋଲି ରଣନୀତି ପ୍ରସ୍ତୁତ କରିଥିଲେ। ଏହାଦ୍ୱାରା ବାକି ବ୍ୟାଟ୍ସମ୍ୟାନ୍ଙ୍କୁ ଉଇକେଟ ଦଳ ହାସଲ କରିହେବ ବୋଲି ସେ ଭାବିଥିଲେ। ହେଲେ ପର ଓଭରରେ ଯାହା ହୋଇଥିଲା ସମସ୍ତେ ଚମକି ଯାଇଥିଲେ।
ଏପରି ଥିଲା ବର୍ଟ ବାନ୍ସଙ୍କ ଓଭର:
ପ୍ରଥମ ବଲ୍ ନୋ ବଲ୍ ହେବା ପରେ ବ୍ୟାଟ୍ସମ୍ୟାନ୍ ଚଉକା ମାରିବା ପରେ(୫ ରନ୍)ହୋଇଥିଲା। ଏହାପରେ ବୋଲର୍ ଗୋଟିଏ ପରେ ଗୋଟିଏ ୧୫ ନୋ ବଲ୍ ପକାଇଥିଲେ। ଏଥିରେ ୮ ବଲ୍ରେ ଛକା, ୪ ବଲ୍ରେ ଚଉକା ଏବଂ ୩ ବଲ୍ରେ ଏକ ରନ୍ ମିଳିଥିଲା। ଏଣୁ ମୋଟ ରନ୍ ୬୪ ହୋଇଥିଲା। ତୃତୀୟ ବଲ୍ରେ କୌଣସି ରନ୍ ନାହିଁ। ଚତୁର୍ଥ ବଲ୍ରେ ନୋ ବଲ୍(ଚଉକା) ଏବଂ ଲିଗାଲ ବଲ୍ରେ ୦ ରନ୍। ପଞ୍ଚମ ବଲରେ କୌଣସି ରନ୍ ନାହିଁ। ୬ଷ୍ଠ ତଥା ଶେଷ ବଲ୍ରେ ୩ ରନ୍ ସହ ଗୋଟିଏ ଓଭରରେ ମୋଟ ୭୭ ରନ୍ ମିଳିଥିଲା। ଯାହାକି ଏଯାବତର ସବୁଠାରୁ ଅଧିକ ରନ୍ ହୋଇଥିବା ଓଭର ବୋଲି କୁହାଯାଏ।