ନୂଆଦିଲ୍ଲୀ,୩।୮: ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହା ଗୁରୁବାର ଦିଲ୍ଲୀ ଅଧ୍ୟାଦେଶ ବିଲକୁ ନେଇ ଲୋକ ସଭାରେ ଚର୍ଚ୍ଚା କରିଥିଲେ। ଏହାକୁ ଦିଲ୍ଲୀ ସରକାର ବିରୋଧ କରୁଥିବା ବେଳେ ଶାହା କହିଥିଲେ ଦିଲ୍ଲୀ ସର୍ଭିସେସ ବିଲ ପାସ ହେବା ପରେ ବିରୋଧୀ ମେଣ୍ଟରୁ ଅଲଗା ହୋଇଯିବ ଏଏପି।
ଶାହାଙ୍କ ଏହି ବୟାନକୁ ନେଇ ଏଏପି ଏମପି ସଞ୍ଜୟ ସିଂ ତାଙ୍କର ପ୍ରତିକ୍ରିୟା ରଖିଛନ୍ତି। ସେ କହିଛନ୍ତି ଭାରତୀୟ ଜନତା ପାର୍ଟି(ଭାଜପା) ଯେତେବେଳେ ଦୁର୍ନୀତିର କଥା ଉଠାଉଛି ଲାଗୁଛି ସତେ ଯେମିତି ଓସାମା ବିନ ଲାଡେନ ଅହିଂସାର କଥା କହୁଛନ୍ତି। ସେ ଆହୁରି ମଧ୍ୟ କହିଛନ୍ତି ଜଣେ ଦୁର୍ନୀତି ଗ୍ରସ୍ତ ଲୋକଙ୍କୁ ହିଁ ସବୁଠି ଦୁର୍ନୀତି ହେଲା ଭଳି ନଜର ଆସିବ।
ସେ ଆହୁରି ମଧ୍ୟ କହିଛନ୍ତି, ଯେଉଁ ଦଳ ଅଜିତ ପାଓ୍ବାରଙ୍କ ବିରୋଧରେ ୭୦,୦୦୦ଟଙ୍କାର ଦୁର୍ନୀତି ଅଭିଯୋଗ କରିଥିଲା ସେହି ଭାଜପା ଗୋଟିଏ ଦିନ ପରେ ତାଙ୍କୁ ଦଳରେ ସାମିଲ କରିବା ସହ ରାଜ୍ୟର ଉପ ମୁଖ୍ୟମନ୍ତ୍ରୀ କରିପାରିଥିଲା। ସେମିତି ହିମନ୍ତ ବିଶ୍ୱ ସରମାଙ୍କ ଉପରେ ଦୁର୍ନୀତି ଅଭିଯୋଗ ଆଣିଥିବା ଦଳ ତାଙ୍କୁ ଆସାମର ମୁଖ୍ୟମନ୍ତ୍ରୀ କରିଦେଇଥିଲା। ତେଣୁ ଏହି ଦଳରେ ଆଉ କିଛି ବାକି ରହିଛି କି ବୋଲି ସଞ୍ଜୟ ପ୍ରଶ୍ନ କରିଛନ୍ତି।