କ୍ରିକେଟରେ ସାଧାରଣତଃ କାଠରେ ତିଆରି ବ୍ୟାଟ୍ ବ୍ୟବହାର କରାଯାଏ। ହେଲେ କ୍ରିକେଟ ଇତିହାସରେ ଏମିତି ଜଣେ ଖେଳାଳି ଥିଲେ, ସେ ଆଲୁମୁନିୟମ ବ୍ୟାଟ୍ରେ ବ୍ୟାଟିଂ କରିଥିଲେ। ଘଟଣାଟି ହେଲା ୧୯୭୯ ମସିହାର। ଇଂଲଣ୍ଡ ଓ ଅଷ୍ଟ୍ରେଲିଆ ମଧ୍ୟରେ ପର୍ଥଠାରେ ଖେଳାଯାଉଥିବା ପ୍ରଥମ ଟେଷ୍ଟ। ଅଷ୍ଟ୍ରେଲିଆ ଦଳ ପ୍ରଥମ ଇନିଂସରେ ୨୩୨ ରନ୍ରେ ୮ ଉଇକେଟ ହରାଇ ସଙ୍କଟରେ ପଡ଼ିଥିଲା। ୯ ନମ୍ବର ବ୍ୟାଟ୍ସମ୍ୟାନ ଡେନିସ ଲିଲି ପ୍ରଥମ ଦିନ ଶେଷ ସୁଦ୍ଧା ୧୧ ରନ କରି ଅପରାଜିତ ଥାନ୍ତି। ଏ ପର୍ଯ୍ୟନ୍ତ ସେ ସାଧାରଣ କାଠ ବ୍ୟାଟ ବ୍ୟବହାର କରୁଥିଲେ। ପର ଦିନ ବ୍ୟାଟିଂ କରିବାକୁ ଆସିଥିବା ଲିଲିଙ୍କ ହାତରେ ଥିଲା ଆଲୁମୁନିୟମ ବ୍ୟାଟ୍ । ଦ୍ୱିତୀୟ ଦିବସରେ ଇଆନ ବୋଥାମଙ୍କ ଓଭରର ଚତୁର୍ଥ ବଲକୁ ଲିଲି ଡ୍ରାଇଭ୍ କରିଥିଲେ। ଖୁବ୍ ଜୋରରେ ଶବ୍ଦ ହୋଇଥିଲା। ହେଲେ ସୀମା ରେଖା ଅତିକ୍ରମ କରିବାରେ ବିଫଳ ହୋଇଥିଲା ବଲ। ଏଣୁ ପଡ଼ିଆ ମଝିକୁ ଦୁଇଟି କାଠ ବ୍ୟାଟ୍ ପଠାଇଥିଲେ ଅଷ୍ଟ୍ରେଲିଆ ଅଧିନାୟକ ଗ୍ରେଗ ଚାପେଲ। ମାତ୍ର ଏହାକୁ ଅସ୍ବୀକାର କରିଥିଲେ ଲିଲି। ଏହାପରେ ଇଂଲଣ୍ଡ ଅଧିନାୟକ ମାଇକ ବ୍ରେଲି ଅମ୍ପାୟରଙ୍କ ନିକଟରେ ଅଭିଯୋଗ କରିଥିଲେ। ଫିଲ୍ଡ ଅମ୍ପାୟରଙ୍କ ସହ ଦୀର୍ଘ ସମୟର ଆଲୋଚନା ପରେ ଲିଲି ରାଜି ହୋଇଥିଲେ କାଠ ବ୍ୟାଟରେ ଖେଳିବାକୁ। ସେ ୧୮ ରନ୍ କରି ଆଉଟ୍ ହୋଇଥିଲେ। ଏହାପରେ ତାଙ୍କ ଘାତକ ବୋଲିଂ ଯୋଗୁ ଇଂଲଣ୍ଡ ମାତ୍ର ୧୩୮ ରନ୍ କରିବାକୁ ସମର୍ଥ ହୋଇଥିଲା। ସେ ୪ ଉଇକେଟ ନେଇଥିଲେ।
ଏହା ଥିଲା ତାଙ୍କର ଜଣେ ସାଙ୍ଗ ତଥା ପୂର୍ବତନ କ୍ଲବ କ୍ରିକେଟରଙ୍କ ବ୍ୟାଟ। ମାର୍କେଟିଂ କରିବା ହିଁ ଏହା ପଛର ଏକମାତ୍ର ଉଦ୍ଦେଶ୍ୟ ଥିଲା। ଉଲ୍ଲେଖଥାଉ କି, ସେତେବେଳେ କ୍ରିକେଟରେ ବ୍ୟବହୃତ ହେଉଥିବା ବ୍ୟାଟ କେଉଁଥିରେ ତିଆରି ହେବା ଦରକାର, ତା’ଉପରେ କୌଣସି ସ୍ପଷ୍ଟ ଆଇସିସି ନିୟମ ନ ଥିଲା। ତେବେ ସେ ପୂର୍ବରୁ ମଧ୍ୟ ଆଲୁମୁନିୟମ ବ୍ୟାଟ୍ ବ୍ୟବହାର କରିଥିଲେ। ମ୍ୟାଚ୍ ୧୨ ଦିନ ପୂର୍ବରୁ ଓ୍ବେଷ୍ଟଇଣ୍ଡିଜ ବିପକ୍ଷରେ ଖେଳାଯୋଇଥିବା ଟେଷ୍ଟରେ ସେ ଆଲୁମୁନିୟମ ବ୍ୟାଟ ବ୍ୟବହାର କରଥିଲେ।