ସିଡ୍ନୀ,୨୩।୧୧(ପି.ଟି.): ପିତୃତ୍ୱ ଛୁଟିରେ ଭାରତୀୟ ଅଧିନାୟକ ବିରାଟ କୋହଲି ପ୍ରଥମ ଟେଷ୍ଟ ଖେଳି ସ୍ବଦେଶ ଫେରିବା ପରେ ଭାରତୀୟ ବ୍ୟାଟିଂ ଲାଇନ୍ଅପ୍ରେ ବିରାଟ ଶୂନ୍ୟସ୍ଥାନ ସୃଷ୍ଟି ହେବ ବୋଲି କିମ୍ବଦନ୍ତୀ ଅଷ୍ଟ୍ରେଲୀୟ କ୍ରିକେଟର ଇଆନ ଚାପେଲ କହିଛନ୍ତି। ଏହାପରେ ଭାରତ ପାଇଁ ଦଳ ଚୟନ କରିବା ନେଇ ଦ୍ୱନ୍ଦ୍ୱ ସୃଷ୍ଟି ହେବ। ତେବେ ଦଳ ଚୟନ ଉପରେ ସିରିଜର ଭାଗ୍ୟ ତଥା ଫଳାଫଳ ନିର୍ଭର କରିବ ବୋଲି ସେ ସ୍ପଷ୍ଟ କରିଛନ୍ତି।
ଆଡିଲେଡ୍ରେ ଡିସେମ୍ବର ୧୭ରୁ ୨୧ ତାରିଖରେ ପ୍ରଥମ ଟେଷ୍ଟ ଖେଳାଯିବ। ଏହି ଟେଷ୍ଟ ଖେଳିବା ପରେ କୋହଲି ପ୍ରଥମ ସନ୍ତାନର ପିତା ହେବା ପାଇଁ ଭାରତ ପ୍ରତ୍ୟାବର୍ତ୍ତନ କରିବେ। ଫଳରେ ନିଜର ପ୍ରତିଭା ପ୍ରଦର୍ଶନ ପାଇଁ ଯୁବ ବ୍ୟାଟ୍ସମ୍ୟାନମାନଙ୍କ ପାଇଁ ସୁବର୍ଣ୍ଣ ସୁଯୋଗ ସୃଷ୍ଟି ହେବ ବୋଲି ଚାପେଲ ଇଏସ୍ପିଏନ୍ରେ ପ୍ରକାଶିତ ତାଙ୍କ ସ୍ତମ୍ଭରେ ଉଲ୍ଲେଖ କରିଛନ୍ତି।
କରୋନା କାଳରେ ପ୍ରସ୍ତୁତି ଦୃଷ୍ଟିକୋଣରୁ ଦେଖିବାକୁ ଗଲେ ଆୟୋଜକ ଅଷ୍ଟ୍ରେଲିଆ ତୁଳନାରେ ଭାରତ ପାଦେ ଆଗରେ ରହିବ ବୋଲି ଚାପେଲ ପୂର୍ବାନୁମାନ କରିଛନ୍ତି। ଗତ ବର୍ଷ ଭାରତ ଘରୋଇ ଅଷ୍ଟ୍ରେଲିଆକୁ ୨-୧ରେ ଟେଷ୍ଟ ସିରିଜରେ ହରାଇଥିଲା। ଏଥିସହ ଅଷ୍ଟ୍ରେଲିଆ ମାଟିରେ ପ୍ରଥମ ଟେଷ୍ଟ ସିରିଜ ଜିତି ଭାରତ ଇତିହାସ ସୃଷ୍ଟି କରିଥିଲା। ଏହି ବିଜୟୀରୁ ଭାରତୀୟ ଦଳ ପ୍ରେରଣା ହାସଲ କରି ଭଲ ପ୍ରଦର୍ଶନ କରିବାକୁ ପ୍ରୟାସ କରିବ। ଅଷ୍ଟ୍ରେଲିଆରେ ବେଶ୍ କିଛି ଦିନ ରହି ଭାରତୀୟ ଖେଳାଳି ପରିବେଶ ସହ ଖାପ୍ ଖୁଆଇବାର ସୁଯୋଗ ହାସଲ କରିବ। ଅଷ୍ଟ୍ରେଲୀୟ ଚୟନକର୍ତ୍ତାମାନେ ଏକ ଶ୍ରେଷ୍ଠ ଦଳ ଚୟନ କରିବାର ଆବଶ୍ୟକତା ରହିଛି ବୋଲି ସେ କହିଛନ୍ତି। ନଭେମ୍ବର ୧୩ ତାରିଖରେ ଏଠାରେ ପହଞ୍ଚିବା ପରେ ଭାରତୀୟ ଦଳ ସିଡ୍ନୀରେ ଦୁଇ ସପ୍ତାହ ଧରି କ୍ୱାରାଣ୍ଟାଇନରେ ରହିବ। ୪ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ ପୂର୍ବରୁ ଭାରତ ଓ ଅଷ୍ଟ୍ରେଲିଆ ୩ଟି ଲେଖାଏ ଦିନିକିଆ ଓ ଟି୨୦ ମ୍ୟାଚ୍ ଖେଳିବେ।