ଦୁବାଇ,୧୪।୧୦: ଇଣ୍ଡିଆନ ପ୍ରିମିୟର ଲିଗ୍(ଆଇପିଏଲ୍)ର କ୍ୱାଲିଫାୟର-୨ ମୁକାବିଲାରେ ଦିଲ୍ଲୀ କ୍ୟାପିଟାଲ୍ସକୁ ହରାଇ ବାଜିମାତ କରିଛି କୋଲକାତା ନାଇଟ୍ ରାଇଡର୍ସ। ସିଜନ ସାରା ଚମତ୍କାର ଖେଳି ଆସିଥିଲେ ହେଁ ବୁଧବାର ଅନୁଷ୍ଠିତ ଗୁରୁତ୍ୱପୂର୍ଣ୍ଣ ମ୍ୟାଚ୍ରେ ଦିଲ୍ଲୀ ଟିମ୍ କୋଲକାତାଠାରୁ ୩ ଉଇକେଟରେ ପରାସ୍ତ ହୋଇଛି। ଫଳରେ ୭ ବର୍ଷ ପରେ ଦୁଇଥରର ଆଇପିଏଲ୍ ଚାମ୍ପିୟନ କେକେଆର୍ ଫାଇନାଲରେ ପ୍ରବେଶ କରିଛି। ୨୦୧୨ରେ ପ୍ରଥମ ଥର କେକେଆର୍ ଗୌତମ ଗମ୍ଭୀରଙ୍କ ଅଧିନାୟକତ୍ୱରେ ଟାଇଟଲ ହାସଲ କରିଥିଲା।
ଚେନ୍ନାଇର ଏମ୍ଏସ୍ ଚିଦାମ୍ବରମ ଷ୍ଟାଡିୟମ୍ରେ ସିଏସ୍କେ ବିପକ୍ଷରେ କେକେଆର୍ ଫାଇନାଲ ଖେଳିଥିଲା। ସେତେବେଳେ ଅଧିନାୟକ ମହେନ୍ଦ୍ର ସିଂହ ଧୋନୀ ଟସ୍ ଜିତି ପ୍ରଥମେ ବ୍ୟାଟିଂ କରିବାର ନିଷ୍ପତ୍ତି ନେଇଥିଲେ। ମ୍ୟାଚ୍ରେ ଚେନ୍ନାଇ ୩ ଉଇକେଟ ହରାଇ ୧୯୦ରନ୍ର ସ୍କୋର କରିଥିଲା। ଜବାବରେ କୋଲକାତା ଟିମ୍ ଖରାପ ଆରମ୍ଭ କରିଥିଲା। ଖେଳାଳିମାନଙ୍କ ଉଇକେଟ ଯିବା ସତ୍ତ୍ୱେ ଦଳ ବିଜେତା ହୋଇଥିଲା। କେକେଆର୍କୁ ୭ ବଲ୍ରେ ୧୫ ରନ୍ର ଆବଶ୍ୟକତା ଥିଲା। ମଇଦାନରେ ମନୋଜ ତିଓ୍ବାରୀ ଏବଂ ଶାକିବ ଅଲ ହସନ ଥିଲେ। ଗୋଟିଏ ନୋ ବଲ୍(ଛକା) ପରେ ଦଳକୁ ୬ ବଲ୍ରେ ୮ ରନ୍ର ଆବଶ୍ୟକତା ଥିଲା। ମନୋଜ ଲଗାତାର ଦୁଇଟି ବଲ୍ରେ ଦୁଇଟି ଚୌକା ମାରି କେକେଆର୍କୁ ପ୍ରଥମ ଥର ପାଇଁ ଆଇପିଏଲ୍ ଚାମ୍ପିୟନ କରିଥିଲେ।
୨୦୨୧ରେ ୨୦୧୨ର ଏହି ଘଟଣାର ପୁନରାବୃତ୍ତି ହେବାକୁ ଯାଉଛି। ଅକ୍ଟୋବର ୧୫ରେ ଅନୁଷ୍ଠିତ ହେବାକୁ ଥିବା ଫାଇନାଲରେ ଚେନ୍ନାଇକୁ କୋଲକାତା ଭେଟିବ। ଚେନ୍ନାଇ ଟିମ୍ର ପୂର୍ବ ମ୍ୟାଚ୍ ଖେଳିଥିବା ୬ ଖେଳାଳି ଅଛନ୍ତି। ସେମାନଙ୍କ ମଧରେ ଧୋନୀ, ସୁରେଶ ରାଇନା, ରବିନ୍ଦ୍ର ଜାଡେଜା ପ୍ରମୁଖ ଅଛନ୍ତି। ସେହିଭଳି କେକେଆର୍ ଟିମ୍ରେ ଶାକିବ ଏବଂ ସୁନୀଲ ନରେନ ଅଛନ୍ତି।