ପାର୍ବଣ ଆସିଲେ ହିଁ ମନରେ ଭରିଯାଏ ଆନନ୍ଦ। ଏହି ଅବସରରେ କିଏ କେମିତି ଖୁସି ମନାଇବେ ସେଥିପାଇଁ କେତେ କଳ୍ପନାଜଳ୍ପନା। କିନ୍ତୁ ଏମିତି କେତେଜଣ ଅଛନ୍ତି ଯେଉଁମାନଙ୍କ ପାଇଁ ପାର୍ବଣରେ ଖୁସି ସାଙ୍ଗରେ ଦାୟିତ୍ୱ ବି ଥାଏ ଅନେକ…
ଗାଁ ଗଣ୍ଡା, ପୁରପଲ୍ଲୀ ସବୁଠି ଏବେ ପାର୍ବଣର ପରିବେଶ। ଦଶହରାକୁ ସ୍ବାଗତ କରିବା ପାଇଁ ସମସ୍ତେ ନିଜ ନିଜ ଢଙ୍ଗରେ ପ୍ରସ୍ତୁତି କରିଛନ୍ତି। କିଏ କେଉଁଠି ଛୁଟି କଟେଇବ କି ଶପିଂ କରିବ ଅବା ଖିଆପିଆ, ବୁଲାବୁଲି ମଜାମସ୍ତିରେ ସମୟ କାଟିବ ସେଥିପାଇଁ ପ୍ଲାନିଂ ଜୋରଦାର। ପିଲାମାନେ ତ ଏଥିପାଇଁ ନିଜ ନିଜ ପ୍ଲାନିଂ ଅନୁସାରେ ମଜା ନେବାକୁ ଆଗୁଆ ସ୍ଥିର କରି ସାରିଲେଣି। ତା’ ଛଡ଼ା ଦୁଇ ବର୍ଷ ପରେ କରୋନା କଟକଣା ନ ଥିବାରୁ ଦଶହରା ପାଇଁ ସମସ୍ତଙ୍କ ମନରେ ଢେର୍ ଉତ୍ସାହ। କିନ୍ତୁ ଏମିତି କେତେଜଣ ଅଛନ୍ତି ଯେଉଁମାନଙ୍କ ପାଇଁ ଏସବୁ ମଜାମସ୍ତିରେ ଥାଏ କଟକଣା। କେବଳ କର୍ତ୍ତବ୍ୟ ପାଇଁ ସେମାନେ ସବୁବେଳେ ତତ୍ପର ରହିଥାନ୍ତି।
ଛୁଟିରେ କାମ ବେଶି
-ମମତା ଜେନା
ଗୃହିଣୀ, ବଡ଼ଗଡ଼ ବ୍ରିଟ୍ କଲୋନୀ, ଭୁବନେଶ୍ୱର
ଦଶହରା ଛୁଟି ପାଇଁ ଘରେ ବହୁତ ଗହଳି। ପିଲାମାନଙ୍କ ସହିତ ଘରେ ବନ୍ଧୁବାନ୍ଧବ ବି ଆସିଥାନ୍ତି। ସେଥିପାଇଁ ତ ମୋର କାମ ବହୁତ ବଢି ଯାଇଥାଏ। ଅବଶ୍ୟ ଅଧିକ କାମ କଲେ ବି ମନ ଖୁସି ରହିଥାଏ। ଛୁଟି ସମୟରେ ଘରେ ଥିବାବେଳେ ସମସ୍ତଙ୍କ ସହିତ ରହିବା ଆଉ ସେମାନଙ୍କ ପାଇଁ ରୋଷେଇ କରିବା ହିଁ ମୋ ପାଇଁ ଛୁଟି କଟେଇବା ଭଳି ଲାଗେ। ଏମିତିକି ସମସ୍ତଙ୍କୁ ଏକାଠି ବିଭିନ୍ନ ପ୍ରକାର ରୋଷେଇ କରି ଖାଇବାକୁ ଦେବା ଲାଗି ମତେ ବହୁତ ଭଲ ଲାଗେ। ଆଉ ବେଳେବେଳେ ନନ୍ଦନକାନନ କିମ୍ବା ପାର୍କ ଆଦି ବିଭିନ୍ନ ସ୍ଥାନକୁ ଆମେ ସମସ୍ତେ ଏକାଠି ହୋଇ ଯାଉ। ସମସ୍ତଙ୍କ ସହ ବୁଲିବା ଆଉ ସେମାନଙ୍କ ଖୁସିରେ ସାମିଲ ହେବାରେ ଏକ ଭିନ୍ନ ଆନନ୍ଦ ମିଳେ। ଛୁଟି ସରିଗଲେ ତ ସମସ୍ତେ ନିଜ ନିଜ କାମରେ ବ୍ୟସ୍ତ ରହିବେ ଆଉ ପୁଣି ଥରେ ଧରାବନ୍ଧା ରୁଟିନ ଜୀବନ ଆରମ୍ଭ ହୋଇଯିବ। ଅଧିକ କାମ ପଡିଲେ ବି ଛୁଟିରେ ସମସ୍ତଙ୍କ ସହ ସମୟ କାଟିବା ପାଇଁ ମତେ ଭଲ ଲାଗେ। ତେଣୁ ଛୁଟି ସମୟରେ ମତେ ଘରଛାଡି ଅନ୍ୟ କେଉଁଠିକୁ ଏକୁଟିଆ ବୁଲିବାକୁ ଯିବାକୁ ବି ଇଚ୍ଛା ହୁଏନି।
ଆତ୍ମତୃପ୍ତି ମିଳେ
-ମୋନାଲିସା ନାୟକ
ଗାଇନିକ୍ ସ୍ପେଶାଲିଷ୍ଟ,
ଶ୍ରୀ ହସ୍ପିଟାଲ
ମତେ ଯେବେ ଛୁଟି ମିଳେ ସେତେବେଳେ ମୋ ପାଇଁ ହୁଏ ଦଶହରା। ଏକଥା ମୁଁ ସିନା ବୁଝିସାରିଛି ହେଲେ ପିଲାମାନଙ୍କୁ ବୁଝାଇବାକୁ ଟିକେ କଷ୍ଟ ହୁଏ। ପିଲାମାନଙ୍କର ଛୁଟି ଅଛି ଓ ସେମାନେ ଘରେ ଅଛନ୍ତି କିନ୍ତୁ ମୋ ପାଖରେ ତାଙ୍କ ପାଇଁ ସମୟ ନାହିଁ। ଅବଶ୍ୟ ମୋ ଝିଅ ଏବେ ଦଶ ଏଗାର ବର୍ଷର ହେଲାଣି ବୋଲି ଟିକେ ବୁଝିଗଲାଣି ଯେ, ମାମା ସାଙ୍ଗରେ ସେ ବୁଲିବାକୁ ଯାଇପାରିବନି। ତେଣୁ ଆଈ ସାଙ୍ଗରେ ସେ ବୁଲିବା ପାଇଁ ନିଜ ଆଡୁ ପ୍ଲାନ କରିଛି। ପୁଅ ଛୋଟ ଅଛି ବୋଲି ସବୁଦିନ କହୁଛି ଯେ ଆମ ସାଙ୍ଗରେ ବୁଲିବ ଆଉ ଖେଳଣା କିଣିବ, ଅମକ ଖାଇବ ଇତ୍ୟାଦି। ବେଳେବେଳେ ଭାବେ ଡାକ୍ତର ହୋଇ ନ ଥିଲେ ଅନ୍ୟ କେଉଁ ପ୍ରଫେସନରେ ଥିଲେ ହୁଏତ ଭଲ ହୋଇଥାନ୍ତା, କିନ୍ତୁ ପରେ ନିଜ କାମରୁ ବେଳେବେଳେ ଏତେ ଆତ୍ମସନ୍ତୋଷ ମିଳେ ଯେ ସବୁ ଛୁଟି ପାଳିବାର ମଜା ମତେ ସେଇ ମାଧ୍ୟମରେ ମିଳିଯାଏ।
ଦଶହରା ସମୟରେ ବେଳେବେଳେ ମୋର ଅପରେଶନ ଚାଲିଥାଏ ଆଉ ଝିଅଟିଏ ହେଲେ ମତେ ଲାଗେ ବୋଧେ ମାଆଙ୍କର ଦର୍ଶନ ହୋଇଗଲା। ଏସବୁ ପରେ ମତେ ଲାଗେ ନିଜ କର୍ତ୍ତବ୍ୟ କରିବାରେ ହିଁ ଆତ୍ମତୃପ୍ତି। ଏମିତିରେ ଆହୁରି ଅନେକ ଅଛନ୍ତି ଯେଉଁମାନଙ୍କର ଦାୟିତ୍ୱ ଛୁଟି ସମୟରେ ଆହୁରି ଅଧିକ ବଢି ଯାଇଥାଏ।
କାମ ଭିତରେ ମଜା
-ସୁଚିତ୍ରା ପରିଡା, ଆଇଆଇସି, ପାହାଳ
ସମସ୍ତଙ୍କର ଛୁଟି ମାନେ ଆମର କାମ ଅଧିକ। କିନ୍ତୁ କାମ ଭିତରେ ଗୋଟେ ଅଲଗା ପ୍ରକାରର ମଜା ଲାଗେ। ସେଇଠି ଭିଡରେ କାମ କରୁ ଆଉ ସେଇଠି ତାରି ଭିତରେ ଏନ୍ଜଏ ବି କରୁ। ଲୋକଙ୍କୁ ସୁରକ୍ଷା ଦେବା ପାଇଁ ଆମେ ଭିଡ ନିୟନ୍ତ୍ରଣ କରୁ। ସେଥିପାଇଁ ଖୁସି ଲାଗେ ଯେ ଆମେ ଲୋକଙ୍କ ପାଇଁ କାମ କରୁଛୁ। ତା’ଛଡା ପରିବାରକୁ ସମୟ ଦେବା ପାଇଁ ଆମ ପାଖରେ ଟାଇମ୍ ହୁଏନି ସିନା ଏଥିପାଇଁ କାହାର ବି ଆଉ ମନଦୁଃଖ ହେଉନି। ଘର ଲୋକେ ସବୁ ଏବେ ଆଡ୍ଜଷ୍ଟ କରି ସାରିଲେଣି। ଏବେ ପୂଜା ଆରମ୍ଭ ହୋଇନି ସତ କିନ୍ତୁ ମାର୍କେଟିଂ ପାଇଁ ବହୁତ ଗହଳି ହେଉଛି। ସବୁଠି ଆମର ଦାୟିତ୍ୱ ବଢିଯାଇଛି। କିନ୍ତୁ ଏଇଠି ବାହାରେ କାମ କରିବା ଭିତରେ ଆମେ ଖୁସି ହେଉଛୁ, ମଜା ବି କରୁଛୁ।
ଭିଡ ଭିତରେ କାହାର କିଛି ଅଘଟଣ ନ ହେଉ କେଉଁଠି କିଛି ଅସୁବିଧା ନ ହେଉ ସମସ୍ତେ ଶାନ୍ତିଶୃଙ୍ଖଳାର ସହିତ ବୁଲାବୁଲି କରନ୍ତୁ ଏଥିପାଇଁ ଆମକୁ ପ୍ରତି ମୁହୂର୍ତ୍ତରେ ସଜାଗ ହୋଇ ରହିବାକୁ ପଡିଥାଏ। ଏମିତି ଛୁଟି ସମୟରେ ଆମକୁ ଅଧିକ ସମୟ କାମ କରିବାକୁ ପଡିଥାଏ। ଏଥିପାଇଁ କେବେ ବି ମୋର କିମ୍ବା ମୋ ସହକର୍ମୀ କାହାର ବି ମନଦୁଃଖ ହୁଏନି।