ନୂଆଦିଲ୍ଲୀ,୧୬।୧: ଭାରତ-ଅଷ୍ଟ୍ରେଲିଆ ମଧ୍ୟରେ ଖେଳାଯାଉଥିବା ମ୍ୟାଚ୍ଗୁଡ଼ିକ ରୋମାଞ୍ଚକର ହୋଇଥାଏ। ଉଭୟ ଟିମ୍ ମୁହଁାମୁହିଁ ସ୍ଥିତି ବେଳେ ବିବାଦୀୟ ପରିସ୍ଥିତି ସୃଷ୍ଟି ହୋଇଥାଏ। ଏଭଳି ଏକ ଘଟଣା ୨୦୧୩ରେ ଦେଖିବାକୁ ମିଳିଥିଲା। ସେତେବେଳେ ଭାରତ ଗସ୍ତରେ ଆସିଥିଲା ଅଷ୍ଟ୍ରେଲିଆ ଟିମ୍। ବାଙ୍ଗାଲୋରର ଏମ୍ ଚିନ୍ନାସ୍ବାମୀ ଷ୍ଟାଡିୟମରେ ନିର୍ଣ୍ଣାୟକ ମ୍ୟାଚ୍ ଖେଳାଯାଉଥିଲା। ମ୍ୟାଚ୍ ସମୟରେ ଶିଖର ଧଓ୍ବନ ଏବଂ ସୁରେଶ ରାଇନା ଅଷ୍ଟ୍ରେଲିଆର ଅଲ୍ରାଉଣ୍ଡର ଶେନ୍ ଓ୍ବାଟ୍ସନ୍ଙ୍କୁ ଚିଡ଼ାଇଥିଲେ। ଧଓ୍ବନ-ରାଇନା ଫିଲ୍ଡିଂ କରିବା ସମୟରେ ଓ୍ବାଟ୍ସନଙ୍କ ଭଳି ଛୋଟାଇ ଛୋଟାଇ ଚାଲିବାର ନକଲ କରିଥିଲେ। ଏହାକୁ ଦେଖି କଙ୍ଗାରୁ ଟିମ୍ର ଅନ୍ୟ ଖେଳାଳି ନିରାଶ ହୋଇଥିଲେ। କେବଳ ଏତିକି ନୁହେଁ ଭାରତୀୟ ଖେଳାଳିଙ୍କ ଏଭଳି ଆଚରଣକୁ କ୍ରିକେଟ ପ୍ରଶଂସକ ମଧ୍ୟ ପସନ୍ଦ କରି ନ ଥିଲେ।
ଅଷ୍ଟ୍ରେଲିଆ ଖେଳୁଥିବା ସମୟରେ ଓ୍ବାଟ୍ସନଙ୍କୁ ଆଘାତ ଲାଗିଥିଲା। ସେ ପ୍ରଥମ ପାଳିରେ ୫ ଓଭର କରିବା ପରେ ମଇଦାନରୁ ବାହାରକୁ ଚାଲିଯାଇଥିଲେ। ଏହାପରେ ତୃତୀୟ ନମ୍ବର ବଦଳରେ ସାତ ନମ୍ବର ସ୍ଥାନରେ ବ୍ୟାଟିଂ କରିବାକୁ ଆସିଥିଲେ। ସେତେବେଳେ ଦଳକୁ ୩୮୩ ରନ୍ କରିବାକୁ ଥିବା ବେଳେ ସ୍କୋର ୧୩୮/୬ ହୋଇଥିଲା। କ୍ରିଜ୍ରେ ଓ୍ବାଟ୍ସନ ଥିବାରୁ ସମୟ କଷ୍ଟକର ଥିଲା। ଏଭଳି ସମୟରେ ଭାରତୀୟ ଖେଳାଳିଙ୍କ ବ୍ୟବହାରକୁ ସମାଲୋଚନାର ଶିକାର ହୋଇଥିଲା। ଏନେଇ ଓ୍ବାଟ୍ସନ ଅମ୍ପାୟାରଙ୍କ ଆଗରେ ଅଭିଯେkାଗ ମଧ୍ୟ କରିଥିଲେ। ପରେ ସେତେବେଳେ ଭାରତୀୟ ଅଧିନାୟକ ମହେନ୍ଦ୍ର ସିଂହ ଧୋନୀ ହସ୍ତକ୍ଷେପ କରିଥିଲେ। ଫଳରେ ବିବାଦର ଅନ୍ତ ହୋଇଥିଲା। ତେବେ ପୂର୍ବରୁ ଓ୍ବାଟ୍ସନ୍ ମଧ୍ୟ ସମାନ ଆଚରଣ କରିଥିବାରୁ ସେ ଅନୁରୂପ କରିଥିଲେ ବୋଲି ଏକ ସାକ୍ଷାତକାରରେ ଧଓ୍ବନ୍ କହିଥିଲେ।
