ଭୁବନେଶ୍ୱର,୧୧।୧୨: ଆଜି ବିଧାନସଭାରେ ଦେଖାଦେଇଛି ଆଳୁ ଝଡ। ଆଳୁ ପ୍ରସଙ୍ଗକୁ ନେଇ ଗୃହରେ ମୁହାଁମୁହିଁ ହୋଇଛନ୍ତି କେନ୍ଦ୍ରାପଡାର ବିଜେଡି ବିଧାୟକ ଗଣେଶ୍ୱର ବେହେରା ଓ ଉପମୁଖ୍ୟମନ୍ତ୍ରୀ କେଭି ସିଂ ଦେଓ। ଆଳୁ ପ୍ରସଙ୍ଗ ଉଠାଇ ଭାଜପା ସରକାରଙ୍କୁ ବିଜେଡି ନେତା ଟାର୍ଗେଟ କରିଛନ୍ତି। ସେ କହିଛନ୍ତି, ଆଳୁର ବିକଳ୍ପ ବାବଦରେ ସରକାର ଚିନ୍ତା କରିବେ କି ? ଯାହାଫଳରେ ଆଳୁ ଉପରେ ଆଉ କେହି ର୍ନିଭରଶୀଳ ହେବେ ନାହିଁ କି ପ୍ରତିବର୍ଷ ସଙ୍କଟ ଦେଖାଯିବନି।
ବିଜେଡି ନେତାଙ୍କ ଏହି ପ୍ରଶ୍ନ ଶୁଣି ହଠାତ୍ ଭାଜପା ନେତାମାନେ ହସିବାକୁ ଲାଗିଥିଲେ। ଏହି ହାସ୍ୟରୋଳ ମଧ୍ୟରେ କେଭି ସିଂ ଦେଓ କହିଛନ୍ତି, ଗଣେଶ୍ୱର ବାବୁ ବହୁତ ଜ୍ଞାନୀ। ଆଗାମୀ ଦିନରେ ତାଙ୍କଠୁ ଜ୍ଞାନପ୍ରାପ୍ତ କରିବି। ପୂର୍ବ ସରକାରଙ୍କୁ ଟାର୍ଗେଟ କରି ସେ ଆହୁରି କହିଛନ୍ତି, ପୂର୍ବ ସରକାରର ଆଳୁ ମିଶନ ଫେଲ ମାରିଛି । ଆଉ ଏବେ ଆଳୁ ସଙ୍କଟ ଦେଖାଦେଇଥିବା ବେଳେ ଓଡ଼ିଶାକୁ ଆଳୁ ଦେବାରେ ପଶ୍ଚିମବଙ୍ଗ ବ୍ଲାକମେଲ କରୁଛି । ତେଣୁ ଓଡ଼ିଶାରେ ଆଳୁ ଉତ୍ପାଦନ କରି ର୍ନିଭରଶୀଳ ନହେବାକୁ ସରକାର ବଦ୍ଧପରିକର । ଏଥିପାଇଁ ରବି ଋତୁରେ ଆଳୁ ଚାଷ ପାଇଁ ୬୪ କୋଟି ଖର୍ଚ୍ଚ ହୋଇଛି ।
ଆଳୁର ଅଭାବୀକୁ ଭରଣା କରିବାକୁ ରାଜ୍ୟରେ ବିକଳ୍ପ ଚାଷୀ ବିବିଧକରଣ କରିବାକୁ ବିଚାର କରାଯିବ । ରାଜ୍ୟରେ ଆଳୁ ଚାଷ ଓ ଉତ୍ପାଦନ ବୃଦ୍ଧି କରାଯିବା ଉପରେ ଗୁରୁତ୍ୱ ଦିଆଯିବ। ଏବଂ ପ୍ରତିବର୍ଷ ଯେଉଁ ଆଳୁ ଉତ୍ପାଦନ ହେବ ତାକୁ ମହଜୁଦ ରଖିବାକୁ ରାଜ୍ୟରେ ୫୮ଟି ଶୀତଳ ଭଣ୍ଡାର ଖୋଲିବାକୁ ମଧ୍ୟ ଯୋଜନା କରାଯାଉଛି, ଯାହା ଉଭୟ ବିଦ୍ୟୁତ ଓ ସୌର ଶକ୍ତିରେ ଚାଲିବ ବୋଲି ଉତ୍ତର ରଖିଛନ୍ତି ମନ୍ତ୍ରୀ।