ବାରିପଦା ଅଫିସ,୨୫।୧୧: ମୟୂରଭଞ୍ଜ ଜିଲା ବାରିପଦା ସଦରବ୍ଲକ ଅଧୀନ ଧାନଶୋଳ ଉପକଣ୍ଠ ଲୋଧାସାହିରେ ଏକ ଅଭାବନୀୟ ଘଟଣା ଘଟିଛି। ଗୁରୁବାର ସକାଳେ ଲୋଧାସାହିର ଦୁଇ ନାବାଳକ ସମ୍ପର୍କୀୟ ଭାଇଭଉଣୀଙ୍କ ଝୁଲନ୍ତା ମୃତଦେହ ଠାବ ହେବା ଘଟଣା ଅଞ୍ଚଳରେ ଚାଞ୍ଚଲ୍ୟ ଖେଳାଇ ଦେଇଛି ।
ପ୍ରକାଶ ଯେ, ଗାଁପାଖ କେନାଲପାଶ୍ୱର୍ର୍ ଆମ୍ବଗଛରୁ ଭଉଣୀଭାଇଙ୍କ ଝୁଲନ୍ତା ମୃତଦେହ ଘଟଣା ପ୍ରଚାର ହେବାପରେ ଲୋକଙ୍କ ଗହଳି ଲାଗିଥିଲା । ଖବରପାଇ ବେତନଟୀ ପୋଲିସ ପହଞ୍ଚି ତଦନ୍ତ ପୂର୍ବକ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଛି। ଉଭୟ ସମ୍ପର୍କରେ ମାଉସୀପୁଅ ଭାଇ ଓ ଭଉଣୀ । ତେବେ ଉଭୟଙ୍କ ପରିବାରଲୋକ ଧାନ କାଟିବାକୁ ନାମାଳ ଯାଇଥିବା ବେଳେ ଏହି ଅଘଟଣ ଘଟିଛି । ପୋଲିସ ଏନେଇ ଦୁଇଟି ପୃଥକ ଅପମୃତ୍ୟୁ ମାମଲା ରୁଜୁକରି ଅଧିକ ତଦନ୍ତ ଜାରି ରଖିଛିl ତେବେ ଉଭୟଙ୍କ ଆତ୍ମହତ୍ୟା କରିବାର କାରଣ ଜଣାପଡି ନାହିଁ।
