ତେନ୍ତୁଳିଖୁଣ୍ଟି, ୧୪।୭(ଚିଦାନନ୍ଦ ସାହୁ): ଗରିବଙ୍କ ପାଇଁ ଆସୁଛି ସରକାରୀ ଯୋଜନା। କିନ୍ତୁ ସେମାନଙ୍କୁ ମିଳୁନି। ଆଗକୁ ମିଳିବ ବୋଲି କହି ଦିନ ଗଡ଼ି ଚାଲୁଛି। କିନ୍ତୁ ଯୋଜନାର ସୁଫଳ ପାଉନାହାନ୍ତି ହିତାଧିକାରୀ। ଏପରି ଦେଖିବାକୁ ମିଳିଛି ନବରଙ୍ଗପୁର ଜିଲା ତେନ୍ତୁଳିଖୁଣ୍ଟି ବ୍ଲକ ପରଜାବାରଙ୍ଗପଦର ପଞ୍ଚାୟତ ଖାତିଗୁଡା ଗ୍ରାମର ସରୋଜିନୀ ଖରାଙ୍କ କ୍ଷେତ୍ରରେ।
୨୦୧୬ରୁ ପ୍ରଧାନମନ୍ତ୍ରୀ ଗ୍ରାମୀଣ ଆବାସ ଗୃହ ଯୋଜନା ହେବା ଦିନରୁ ସରୋଜିନୀଙ୍କୁ ମିଳୁଛି କେବଳ ପ୍ରତିଶ୍ରୁତି। କିନ୍ତୁ ଆଜି ଯାଏ ତାହା ପୂରଣ ହୋଇପାରିନି। ବର୍ତ୍ତମାନ ସରୋଜିନୀଙ୍କ ଗୋଟିଏ କୋଠରି ବିଶିଷ୍ଟ ଘର ରହିଛି। ପୁଅ, ବୋହୂ, ନାତୁଣୀ, କିଡ୍ନୀ ରୋଗାକ୍ରାନ୍ତ ପୁଅ, ଏକୋଇଶ ବର୍ଷୀୟ ଝିଅ ସେଥିରେ ରହୁଛନ୍ତି। ଦିନ ଯେମିତି ସେମିତି ବିତିଯାଉଥିଲେ ମଧ୍ୟ ରାତି ହେଲେ କିଏ କେଉଁ ପଡ଼ୋଶୀ ଘରେ ଶୋଇବ ଚିନ୍ତା। ବିବାହିତ ପୁଅ ବୋହୂ ଓ ନାତୁଣୀ ଘରେ ଶୋଉଥିବା ବେଳେ ଅନ୍ୟମାନେ ଅନ୍ୟ ଘରେ ରାତିରେ ଶୋଇବାକୁ ବାଧ୍ୟ ହୁଅନ୍ତି। କାହା ଘରେ ଅତିଥି ଆସିଥିଲେ ଚିନ୍ତାଜନକ ପରିସ୍ଥିତି। କିଡ୍ନୀ ରୋଗୀଙ୍କ ପାଇଁ ସ୍ବଚ୍ଛ ବାତାବରଣ ଆବଶ୍ୟକ କିନ୍ତୁ ସେଥିରୁ ମଧ୍ୟ ପରିବାର ବଞ୍ଚତ୍ତ। ତାଙ୍କ ଘରର ସ୍ଥିତି ଓ ପରିବାର ବୋଝ ସମ୍ପର୍କିତ ଖବର ପ୍ରକାଶ ପାଇଥିଲା। ଏହାପରେ ସେତେବେଳେ ତେନ୍ତୁଳିଖୁଣ୍ଟି ବିଡିଓ ଦାୟିତ୍ୱରେ ଥିବା ପାପଡାହାଣ୍ଡି ବିଡିଓ ସରୋଜିନୀଙ୍କ ଘରକୁ ଯାଇ ସ୍ଥିତି ଅନୁଧ୍ୟାନ କରିଥିଲେ। ଆଗାମୀ ତାଲିକାରେ ନିଶ୍ଚିତଭାବେ ଘର ପାଇବ ବୋଲି ସେ ସରୋଜିନୀଙ୍କୁ ପ୍ରତିଶ୍ରୁତି ଦେଇଥିଲେ। ଏହା ମଧ୍ୟରେ ତିନିବର୍ଷ ବିତିଯାଇଥିଲେ ମଧ୍ୟ ସରୋଜିନୀ ଘର ପାଇ ନାହାନ୍ତି। ଗତ ମାସରେ ପଞ୍ଚାୟତର ୨ଶହରୁ ଊଦ୍ଧର୍ବଙ୍କୁ ଆବାସ ଗୃହ କାର୍ଯ୍ୟାଦେଶ ମିଳିଲା। ତଥାପି ସେଥିରେ ସରୋଜିନୀ ଖରାଙ୍କ ନାମ ନାହିଁ। ତାଲିକାରେ କିନ୍ତୁ ଅନ୍ୟ ଦୁଇ ଜଣ ସରୋଜିନୀଙ୍କ ନାମ ଦେଖି ନିଜକୁ ହତଭାଗୀ ବୋଲି କହିଛନ୍ତି ସରୋଜିନୀ ଖରା। କିଛିଦିନ ତଳେ ଜଣେ ଆସି ଡକ୍ୟୁମେଣ୍ଟ ଦିଅ, ଆଗାମୀ ତାଲିକାରେ ତୁମ ନାମ ଅଛି ଘର ଆସିବା ନେଇ ପ୍ରତିଶ୍ରୁତି ବୋଲି ସରୋଜିନୀ କହିଛନ୍ତି। ତେବେ ଆଗାମୀ ତାଲିକା କେବେ ଆସିବ ବୋଲି ସେ ପ୍ରଶ୍ନ କରିଛନ୍ତି। ସ୍ବାମୀ ମୃତ୍ୟୁ ପୂର୍ବରୁ ଘର ପାଇଁ ଲୋକପ୍ରତିନିଧିଙ୍କ ସମେତ ଅନେକ ଅଧିକାରୀ ଅନୁରୋଧ କରିଥିଲେ। ସ୍ବାମୀ ତାଙ୍କ ଜୀବନକାଳରେ ଘର ଟିଏ ପାଇପାରିଲେନି ବୋଲି ସରୋଜିନୀ କହିଛନ୍ତି। ଏ ନେଇ ବିଡିଓ ମନୋଜ କୁମାର ପାଣିଗ୍ରାହୀଙ୍କୁ ପଚାରିବାରୁ ଜଏନ କରିବା ପୂର୍ବରୁ ତାଲିକା ପ୍ରସ୍ତୁତ ହୋଇଥିଲା। ବର୍ତ୍ତମାନ ଏଭଳି କିଛି ଯୋଗ୍ୟ ହିତାଧିକାରୀଙ୍କ ଦୁଃଖ ନଜରକୁ ଆସିଛି। କ’ଣ କରିହେବ ଉପରିସ୍ଥ କର୍ତ୍ତୃପକ୍ଷଙ୍କ ସହ ଆଲୋଚନା କରି ପଦକ୍ଷେପ ନେବି ବୋଲି ସେ କହିଛନ୍ତି।