କଟକ ଅଫିସ,୩୦।୪: ଆଚାର୍ଯ୍ୟ ହରିହର ଆଞ୍ଚଳିକ କର୍କଟ କେନ୍ଦ୍ରରେ ୬ ମାସ, ଭୁବନେଶ୍ୱର ଓ ଝାରସୁଗୁଡାରେ ୨ବର୍ଷ ପରେ ସିଟି ସ୍କାନ୍ ମେଶିନ୍ ଲାଗିବ ବୋଲି ରାଜ୍ୟ ସରକାର ହାଇକୋର୍ଟଙ୍କୁ ସତ୍ୟପାଠ ଜରିଆରେ ଅବଗତ କରିଥିଲେ। କିନ୍ତୁ ଅନ୍ୟ ହସ୍ପିଟାଲରେ ଏହି ମେଶିନ କେବେ ସୁଦ୍ଧା ଲାଗିବ ତାହା ଉପରେ ରାଜ୍ୟ ସରକାର ନୀରବ ରହିଥିଲେ। ଫଳରେ ଅନ୍ୟ ମେଡିକାଲରେ କେବେ ସୁଦ୍ଧା ଏହି ସିଟି ସ୍କାନ୍ ମେଶିନ ଲାଗିବ ଏବଂ ଏଥିପାଇଁ ରାଜ୍ୟ ସରକାରଙ୍କ ଯୋଜନା କ’ଣ ରହିଛି ତାହା ଉପରେ ସବିଶେଷ ରିପୋର୍ଟ ଦାଖଲ ଲାଗି ହାଇକୋର୍ଟ ରାଜ୍ୟ ସ୍ବାସ୍ଥ୍ୟ ବିଭାଗକୁ ନିର୍ଦ୍ଦେଶ ଦେଇଛନ୍ତି। କ୍ୟାନ୍ସର୍ରେ ଅନିତା ବୁଦ୍ଧିଆଙ୍କ ମୃତ୍ୟୁପରେ ତାଙ୍କ ସ୍ବାମୀ ଅରୁଣ ବୁଦ୍ଧିଆଙ୍କ ପକ୍ଷରୁ ଆଗତ ମାମଲାର ଶୁଣାଣି କରି ହାଇକୋର୍ଟ ମୁଖ୍ୟ ବିଚାରପତି ଜଷ୍ଟିସ୍ ଏସ୍. ମୁରଲୀଧର ଓ ବିଚାରପତି ଜଷ୍ଟିସ୍ ବି.ପି. ରାଉତରାୟଙ୍କୁ ନେଇ ଗଠିତ ଖଣ୍ଡପୀଠ ଏହି ନିର୍ଦ୍ଦେଶ ଦେଇଛନ୍ତି। ଅପରପକ୍ଷେ ଏହି ମାମଲାରେ ଗୁରୁବାର ଅରୁଣଙ୍କ ପକ୍ଷରୁ ଆଉ ଏକ ପିଟିଶନ ଦାଏର ହୋଇଥିଲା। ଅନିତାଙ୍କ ପ୍ରତି କ୍ୟାନ୍ସର୍ ହସ୍ପିଟାଲରେ କିଭଳି ଭାବେ ଚିକିତ୍ସାରେ ଅବହେଳା କରାଯାଇଛି ସେ ନେଇ ଅରୁଣ ଅଦାଲତଙ୍କ ଦୃଷ୍ଟି ଆକର୍ଷଣ କରିଥିଲେ। ଅରୁଣ ତାଙ୍କ ପିଟିଶନ୍ରେ ଦର୍ଶାଇଛନ୍ତି, ହାଇକୋର୍ଟଙ୍କ ନିର୍ଦ୍ଦେଶ ପରେ କ୍ୟାନ୍ସର୍ ହସ୍ପିଟାଲ ପକ୍ଷରୁ ୬ ଜଣିଆ ଡାକ୍ତରୀ ଟିମ୍ ଗଠନ କରାଯାଇଥିଲା। ଗତ ଜାନୁୟାରୀ ୧୯ ତାରିଖ ରାତି ପ୍ରାୟ ୮ଟାରେ ଅନିତାଙ୍କ ମୃତ୍ୟୁ ଘଟିଥିଲା। ଏହି ଡାକ୍ତରୀ ଟିମ୍ ସେହିଦିନ ଗଠନ କରାଯାଇଥିଲାବେଳେ ଅପରାହ୍ନ ୪ଟାରୁ ୮ଟା ଭିତରେ ଏହି ଟିମ୍ ଥରେ ହେଲେ ଅନିତାଙ୍କ ସ୍ବାସ୍ଥ୍ୟାବସ୍ଥା ପଚାରି ବୁଝି ନ ଥିଲା। ଏହି ଟିମ୍ ଜଣେ ରୋଗୀର ସ୍ବାସ୍ଥ୍ୟାବସ୍ଥା ନ ଦେଖି କିପରି ରିପୋର୍ଟ ଦେଲେ ବୋଲି ଅରୁଣ ପ୍ରଶ୍ନ କରିଛନ୍ତି।