ନୂଆଦିଲ୍ଲୀ,୨।୭: ଭାରତୀୟ କ୍ରିକେଟ ଟିମ୍ର ପୂର୍ବତନ ବିସ୍ଫୋରକ ଓପନର୍ ବିରେନ୍ଦ୍ର ସେହ୍ବାଗ ନିଜର ଆକ୍ରାମଣାତ୍ମକ ବ୍ୟାଟିଂ ପାଇଁ ଜଣାଶୁଣା। ପ୍ରଥମ ବଲ୍ରେ ଚଉକା ମାରି ସେ ବିରୋଧୀ ବୋଲରଙ୍କ ଉପରେ ଚାପ ପକାଉଥିଲେ। ପଡ଼ିଆରେ ବିପକ୍ଷ ଦଳର ଖେଳାଳିଙ୍କ ସହ ତାଙ୍କର କ୍ୱଚିତ ସଂଘର୍ଷ ହେଉଥିଲା। ଏହା ପଛରେ ଥିଲା ତାଙ୍କର ଶାନ୍ତ ସ୍ବଭାବ। ହେଲେ ଅନେକ ଥର ସେହ୍ବାଗ ରାଗିଯିବା ଯୋଗୁ ବିରୋଧି ବୋଲର ନଚେତ ଖେଳାଳିଙ୍କ ସହ କଥା କଟାକଟି ହୋଇଥିବା ଦେଖିବାକୁ ମିଳିଛି। ସେଥିରୁ ଅଷ୍ଟ୍ରେଲିଆ ଦ୍ରୁତ ବୋଲର ଜେମ୍ସ ପାଟନ୍ସନ୍ଙ୍କ ସହ ବିବାଦ ଅନ୍ୟତମ।
ଘଟଣାଟି ୨୦୧୧ର। ଭାରତ-ଅଷ୍ଟ୍ରେଲିଆ ମଧ୍ୟରେ ମେଲବର୍ନ କ୍ରିକେଟ ଗ୍ରାଉଣ୍ଡରେ ମ୍ୟାଚ୍ ଖେଳାଯାଉଥିଲା। ସେହ୍ବାଗ ତାଙ୍କ ସାଥୀ ଗୌତମ ଗମ୍ଭୀରଙ୍କ ସହ ଭାରତୀୟ ଇନିଂସ ଆରମ୍ଭ କରିଥିଲେ। ସେହ୍ବାଗ ୧୬ ରନ୍ କରି ଖେଳୁଥିବା ବେଳେ ଏକ ରନ୍ ନେବାକୁ ଚେଷ୍ଟା କରିଥିଲେ। ଏହି ସମୟରେ ପାଟିନ୍ସନ୍ ତାଙ୍କ ରାସ୍ତା ଅବରୋଧ କରିବାକୁ ଚେଷ୍ଟା କରିଥିଲେ। ଏଥିପାଇଁ ସେ ତାଙ୍କ କାନ୍ଧର ବ୍ୟବହାର କରିଥିଲେ। ଏହାକୁ ଆଦୌ ପସନ୍ଦ କରି ନ ଥିଲେ ସେହ୍ବାଗ। ସେ ରାଗି ଯାଇ ବ୍ୟାଟ୍ ଉଠାଇ ପାଟିନ୍ସନ୍ଙ୍କୁ ଧମକ ଦେଇଥିଲେ। ଉଭୟ ଖେଳାଳି ମଧ୍ୟରେ କଥା କଟାକଟି ହୋଇଥିଲା। ଏହାଦେଖି ପିଟର ସିଡଲ ସେଠାକୁ ଆସି ସେହ୍ବାଗଙ୍କୁ ଚପାଇବାକୁ ଚେଷ୍ଟା କରିଥିଲେ। ଶେଷରେ ମଇଦାନରେ ଥିବା ଅମ୍ପାୟାରମାନେ ଏଥିରେ ହସ୍ତକ୍ଷେପ କରି ଖେଳାଳିଙ୍କୁ ଶାନ୍ତ କରିବା ପରେ ମ୍ୟାଚ୍ ପୁଣିଥରେ ଆରମ୍ଭ ହୋଇଥିଲା।
ମ୍ୟାଚ୍ରେ ଅଷ୍ଟ୍ରେଲିଆ ଟସ୍ ଜିତି ପ୍ରଥମେ ବ୍ୟାଟିଂ କରି ପ୍ରଥମ ଇନିଂସରେ ୩୩୩ ରନ୍ କରିଥିଲା। ଜବାବରେ ଭାରତ ସେହ୍ବାଗ(୬୭ରନ୍) ପାଳି ଯୋଗୁ ୨୮୨ ରନ୍ ପ୍ରଥମ ଇଂନିସରେ କରିଥିଲା। ୨୯ତମ ଓଭରରେ ପାଟିନ୍ସନ ସେହଓ୍ବାଗଙ୍କ ଉଇକେଟ ନେଇଥିଲେ। ଦ୍ୱିତୀୟ ଇନିଂସରେ ଅଷ୍ଟ୍ରେଲିଆ ୨୪୦ରନ୍ କରିଥିଲା। ପରେ ସେମାନେ ଭାରତକୁ ୧୬୯ରନ୍ରେ ଅଲଆଉଟ୍ କରି ଟେଷ୍ଟ ମ୍ୟାଚ୍କୁ ୧୨୨ରନ୍ରେ ଜିତିଥିଲେ।
