ପୁରୁଷୋତ୍ତମପୁର,୧୧/୮(ଡିଏନ୍ଏ): ଗଞ୍ଜାମ ଜିଲା ପୁରୁଷୋତ୍ତମପୁର ବ୍ଲକ ସୁନାଥର ଓ ଶୋଳଘର ପଞ୍ଚାୟତରେ ଜିଆରଏସ ଭାବେ କାର୍ଯ୍ୟରତ ସ୍ବାଗତ ପଣ୍ଡା ନିଖୋଜ ହେବାର ଚାରିଦିନ ବିତିଥିଲେବି ତାଙ୍କର କୌଣସି ଖୋଜଖବର ମିଳିପାରୁନାହିଁ। ଏହାକୁ ନେଇ ଏଠାରେ ନାନା ପ୍ରକାରର ସଂଦେହ ଘନୀଭୂତ ହୋଇ କଳ୍ପନାଜଳ୍ପନା ଦେଖାଦେଇଛି।
ପୁରୁଷୋତ୍ତମପୁର ଏସଡିପିଓ ସୂର୍ଯ୍ୟମଣି ପ୍ରଧାନ ଓ ଆଇଆଇସି ପ୍ରିୟୁସ ରଞ୍ଜନ ଛୋଟରାୟ ଘଟଣାକୁ ଅତି ଗୁରୁତର ସହନେଇ ଦୁଇଗୋଟି ଟିମ ଗଠନକରି ଜିଲାର ବିଭିନ୍ନ ସ୍ଥାନକୁ ଯାଇ ଖୋଜାଖୋଜି କରିବାରେ ଲାଗିଥିବା ବେଳେ ବିଭିନ୍ନ ଥାନା ମାନଙ୍କୁ ମଧ୍ୟ ମେସେଜ ଦେଇ ଜିଆରଏସଙ୍କୁ ଉଦ୍ଧାର କରିବା ସକାଶେ ଲାଗି ପଡିଛନ୍ତି। ଏହାସହ ପୁରୁଷୋତ୍ତମପୁର ସହରର ବିଭିନ୍ନ ସ୍ଥାନରେ ଲାଗିଥିବା ସିସିଟିଭି ଫୁଟେଜକୁ ଯାଞ୍ଚ କରିବାରେ ଲାଗିଥିବା ବେଳେ ସେ ଅନ୍ଧାର ରାତ୍ରରେ ଏକାକି ଚାଲିଚାଲି ଯାଉଥିବାର ସିସିଟିଭି ଫୁଟେଜରୁ କଏଦ ମଧ୍ୟ ହୋଇଛି।
ସୁଚନା ଯୋଗ୍ୟ ଯେ ସୋମବାର ରାତ୍ର ପ୍ରାୟ ୯.୨୦ ସମୟରେ ବ୍ଲକକୁ ଯାଉଛି ପାଞ୍ଚ ମିନିଟ୍ ସମୟ ମଧ୍ୟରେ ଚାଲି ଆସିବି ବୋଲି ପତ୍ନୀ ଲିଜାରାଣି ପଣ୍ଡା ଙ୍କୁ କହି ଘରୁ ଯାଇଥିବା ବେଳେ ଆଉ ଫେରିନାହାନ୍ତି। ଇତି ମଧ୍ୟରେ ଖୋଜା ଖୋଜି ବେଳେ ରାସ୍ତାର ଗଡସାହି ନିକଟରୁ ବାଇକ ଓ ହାଡିସାହି ଛକଠାରୁ ମୋବାଇଲଟି ମିଳିଥିଲା। ଜିଆରଏସ ସ୍ବାଗତ ପଣ୍ଡା ଜଣେ ଭଲ କର୍ମଚାରୀ ଭାବେ ପୂର୍ବରୁ କାର୍ଯ୍ୟ କରୁଥିବା ପ୍ରତାପୁର ପଞ୍ଚାୟତ ଓ ବର୍ତ୍ତମାନର କାର୍ଯ୍ୟ ସ୍ଥଳ ସୁନାଥର ଓ ଶୋଳଘର ପଞ୍ଚାୟତରେ ଜନସାଧାରଣଙ୍କ ବିଭିନ୍ନକାର୍ଯ୍ୟମାନ କରି ପ୍ରିୟପାତ୍ର ହୋଇଥିବା ହେତୁ ଜନସାଧାରଣ ମଧ୍ୟ ଖୋଜାଖୋଜିରେ ଲାଗିପଡିଛନ୍ତି। ହେଲେ ତାଙ୍କର ପତା ପାଇପାରି ନାହାନ୍ତି।