ବମ୍ବେ: ଦିନ ଥିଲା ଦକ୍ଷିଣ ଭାରତୀୟ ସିନେମା ସହ ବଲିଉଡ୍ରେ ଅଭିନୟର ଯାଦୁ ଦେଖାଉଥିଲେ ଅଭିନେତ୍ରୀ ଆସିନ୍। ଗୋଟିଏ ପରେ ଗୋଟିଏ ହିଟ୍ ଫିଲ୍ମରେ ନଜର ଆସୁଥିଲେ ସେ। ହେଲେ ଏବେ ସେ ବଡ଼ ପରଦାରୁ ହଜିଯାଇଛନ୍ତି କହିଲେ ଚଳେ। ବିବାହ ପରଠାରୁ ସେ ସିନେମାଜଗତରୁ ଦୂରେଇ ଯାଇଛନ୍ତି।
୨୦୦୧ରେ ମାଲାୟାଲମ ଫିଲ୍ମରୁ କ୍ୟାରିୟର ଆରମ୍ଭ କରିଥିଲେ ଆସିନ। ପରେ ସେ ତାମିଲ, ତେଲୁଗୁ ଭାଷୀୟ ଅନେକ ଫିଲ୍ମରେ କାମ କରି ବାହାବା ସାଉଁଟିଥିଲେ। ୨୦୧୮ରେ ଆମିର ଖାଁଙ୍କ ଫିଲ୍ମ ‘ଗଜିନୀ’ରୁ ସେ ବଲିଉଡ୍ରେ ଡେବ୍ୟୁ କରିଥିଲେ। ଏହା ବକ୍ସ ଅଫିସରେ ସୁପରହିଟ୍ ସାବ୍ୟସ୍ତ ହୋଇଥିଲା। ସେ ସଲମାନଙ୍କ ସହ ‘ରେଡି’ ଫିଲ୍ମରେ କାମ କରିଥିଲେ। ବ୍ୟବସାୟରେ ଏହା ରେକର୍ଡ କରିଥିଲା। ଏହାଛଡ଼ା ଆସିନ ‘ହାଉସଫୁଲ ୨’ ସମେତ ଅନେକ ହିନ୍ଦୀ ଫିଲ୍ମରେ କାମ କରିଛନ୍ତି।
ଅଭିନୟରେ ସଫଳତାର ଶୀର୍ଷରେ ପହଞ୍ଚିଥିବା ଆସିନ ୨୦୧୬ରେ ବ୍ୟବସାୟୀ ରାହୁଲ ଶର୍ମାଙ୍କୁ ବିବାହ କରିଥିଲେ। ଉଭୟ ଖ୍ରୀଷ୍ଟିଆନ ଏବଂ ହିନ୍ଦୁ ରୀତିନୀତିରେ ଏହି ବିବାହ ଅନୁଷ୍ଠିତ ହୋଇଥିଲା। ବିବାହ ପରେ ଆସିନ ଏକ ପୋଷ୍ଟ ଶେୟାର କରି ଅଭିନୟଜଗତକୁ ସବୁଦିନ ଲାଗି ଛାଡ଼ି ବ୍ୟକ୍ତିଗତ ଜୀବନ ଉପରେ ଧ୍ୟାନ ଦେବାକୁ ଚାହୁଁଥିବା ପ୍ରଶଂସକଙ୍କୁ ଜଣାଇଥିଲେ। ବର୍ଷକ ପରେ ୨୦୧୭ରେ ଆସିନ ଏକ ଝିଅକୁ ଜନ୍ମ ଦେଇଥିଲେ। ତାଙ୍କ ନାଁ ଆରିନ। ଏବେ ଅଭିନେତ୍ରୀ ପରିବାର ସହ ସମୟ ବିତାଉଥିବା ବେଳେ ସୋସିଆଲ ମିଡିଆରେ କିନ୍ତୁ ଆକ୍ଟିଭ ଅଛନ୍ତି। ପ୍ରାୟତଃ ସେ ସ୍ବାମୀ ଏବଂ ଝିଅଙ୍କ ସହ ଫଟୋ ପୋଷ୍ଟ କରିଥାନ୍ତି। ପ୍ରଶଂସକ ସେସବୁକୁ ବେଶ ପସନ୍ଦ କରନ୍ତି।
