ଓ୍ବାଶିଂଟନ,୨୭।୫: ପୃଥିବୀରେ ତାଣ୍ଡବ ରଚିଥିବା କରୋନା ମହାମାରୀ ଭୂତାଣୁ କେଉଁଠୁ ଆସିଛି ତାହାର ରିପୋର୍ଟ ଆମେରିକା ରାଷ୍ଟ୍ରପତି ଜୋ ବାଇଡେନ୍ ୯୦ ଦିନ ମଧ୍ୟରେ ଲୋଡିଛନ୍ତି। କରୋନା ଭୂତାଣୁ ପ୍ରାଣୀଙ୍କଠାରୁ ମଣିଷଙ୍କ ପାଖକୁ ଆସିଛି ଅବା ଏହାକୁ ଚାଇନାର ଉହାନ ଲ୍ୟାବ୍ରେ ପ୍ରସ୍ତୁତ କରାଯାଇଛି ସେନେଇ ରିପୋର୍ଟ ଦାଖଲ ପାଇଁ ବାଇଡେନ୍ ଇଣ୍ଟେଲଜେନ୍ସ୍ ଏଜେନ୍ସିଙ୍କୁ ନିର୍ଦ୍ଦେଶ ଦେଇଛନ୍ତି। ଏହି ତଦନ୍ତରେ ଆମେରିକାର ନ୍ୟାଶନାଲ ଲ୍ୟାବ୍ ସମ୍ପୃକ୍ତ ଏଜେନ୍ସିଙ୍କୁ ଆବଶ୍ୟକ ସହାୟତା ଯୋଗାଇ ଦେବ। ଏହା ସହିତ ବାଇଡେନ୍ ଚାଇନା ସରକାରଙ୍କୁ ମଧ୍ୟ ଏହି ତଦନ୍ତ କାର୍ଯ୍ୟରେ ସହାୟତା କରିବା ଲାଗି ଅପିଲ୍ କରିଛନ୍ତି। ଏହା ଦ୍ୱାରା ଚାଇନା ଏବେ ହରଡ଼ଘଣାରେ ପଡ଼ିଛି। ବାଇଡେନ୍ କହିଛନ୍ତି ଯେ, ସମ୍ପ୍ରତି କରୋନା ଭୂତାଣୁ ସଂକ୍ରମଣ ନେଇ ଦୁଇଟି ଥିଓରୀ ଉପରେ ଆଲୋଚନା ହେଉଛି। ପ୍ରଥମଟି ପ୍ରାଣୀଙ୍କଠାରୁ ଭୂତାଣୁ ମଣିଷଙ୍କ ପାଖକୁ ଆସିଥିବାର ସନ୍ଦେହ କରାଯାଇଛି। ସେହିପରି ଦ୍ୱତୀୟ ଥିଓରୀ ଅନୁସାରେ ଏହାକୁ ଲ୍ୟାବ୍ରେ ପ୍ରସ୍ତୁତ କରାଯାଇଛି। ତେଣୁ ପୃଥିବୀରେ ସଙ୍କଟ ସୃଷ୍ଟି କରିଥିବା କରୋନା ଭୂତାଣୁ ସମ୍ପର୍କରେ ସବିଶେଷ ତଥ୍ୟ ହାସଲ କରିବା ଗୁରୁତ୍ୱପୂର୍ଣ୍ଣ ବୋଲି ସେ କହିଛନ୍ତି।