କୋଲକତା,୬।୩: ପଶ୍ଚିମବଙ୍ଗର ଉତ୍ତର ୨୪ ପରଗାନା ଜିଲାର ସନ୍ଦେଶଖାଲିରେ ଘଟିଥିବା ହିଂସା ରିପୋର୍ଟ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ନିକଟରେ ଦାଖଲ କରାଯାଇଛି। ଏହି ରିପୋର୍ଟରେ ପଶ୍ଚିମବଙ୍ଗର ଅବସ୍ଥା ସମ୍ପର୍କରେ ଜାତୀୟ ମହିଳା ଆୟୋଗ ରାଷ୍ଟ୍ରପତି ନିୟମ ଲାଗୁ କରିବାକୁ ପରାମର୍ଶ ଦେଇଛନ୍ତି। ନ୍ୟାଶନାଲ କମିଶନ ଫର ଓମେନ୍ ଅର୍ଥାତ୍ ଜାତୀୟ ମହିଳା ଆୟୋଗ (ଏନସିଡବ୍ଲୁ)ର ଅଧ୍ୟକ୍ଷ ରେଖା ଶର୍ମା ମଧ୍ୟ ମଙ୍ଗଳବାର ରାଷ୍ଟ୍ରପତି ମୁର୍ମୁଙ୍କୁ ଭେଟିଥିଲେ। ଏହି ବୈଠକରେ ସେ ରାଜ୍ୟର ପରିସ୍ଥିତି ସମ୍ପର୍କରେ ରାଷ୍ଟ୍ରପତିଙ୍କୁ ସୂଚନା ଦେଇଛନ୍ତି।
ନିକଟରେ ଏନସିଡବ୍ଲ୍ୟୁର ଏକ ଟିମ ସନ୍ଦେଶଖାଲି ଗସ୍ତରେ ଯାଇଥିଲେ। ଏଥିରେ ଗ୍ରାଉଣ୍ଡ ସ୍ଥିତି କିପରି ଅଛି ଜାଣିବାକୁ ଚେଷ୍ଟା କରାଯାଇଥିଲା। ଏହି ଗସ୍ତ ମାଧ୍ୟମରେ ହିଂସା ସମ୍ପର୍କରେ ସୂଚନା ପାଇବା ପରେ ସ୍ଥାନୀୟ କର୍ତ୍ତୃପକ୍ଷ କିପରି କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି ତାହା ଜାଣିବାକୁ ଚେଷ୍ଟା କରାଯାଇଥିଲା।
ରାଷ୍ଟ୍ରପତି ମୁର୍ମୁଙ୍କ ନିକଟରେ ଦାଖଲ ହୋଇଥିବା ଜାତୀୟ ମହିଳା ଆୟୋଗର ରିପୋର୍ଟରେ ସନ୍ଦେଶଖାଲିର ଗ୍ରାଉଣ୍ଡ ଅବସ୍ଥା ସମ୍ପର୍କରେ ସୂଚନା ଦିଆଯାଇଛି। ଏହି ରିପୋର୍ଟରେ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ନେତୃତ୍ୱରେ ସରକାରଙ୍କ ମନୋଭାବ ଉପରେ ମଧ୍ୟ ପ୍ରଶ୍ନ ଉଠିଛି।
