ଲଣ୍ଡନ,୨୬ା୧୨: ଆସନ୍ତା ମାସରେ ଲଣ୍ଡନରେ ହ୍ୟୁମାନ ଚ୍ୟାଲେଞ୍ଜର ପରୀକ୍ଷା ହେବାକୁ ଯାଉଛି। ଲଣ୍ଡନର ରୟାଲ ଫ୍ରି ହସ୍ପିଟାଲରେ ହେବାକୁ ଥିବା ଏହି ପରୀକ୍ଷଣରେ ବ୍ରିଟେନର ପ୍ରାୟ ୨୫୦୦ ଲୋକ ଉଦ୍ଦେଶ୍ୟମୂଳକ ଭାବେ କରୋନା ପଜିଟିଭ୍ ହେବାକୁ ଯାଉଛନ୍ତି। ଯାହା ପରେ ଏହି ଲୋକଙ୍କ ଉପରେ ଟିକା ପରୀକ୍ଷା କରାଯିବ। ଏହି ପରୀକ୍ଷଣରେ, ସୁସ୍ଥ ଲୋକଙ୍କୁ ପ୍ରଥମେ କରୋନା ଭାଇରସ ପଜିଟିଭ୍ ଦିଆଯିବ ଏବଂ ତା’ପରେ ସେମାନଙ୍କୁ ଟିକା ଦିଆଯିବ। ଟିକା କାମ କରୁଛି କି ନାହିଁ ଏହାର ଫଳାଫଳ ଉପରେ ନଜର ରଖାଯିବ। ଏହାପୂର୍ବରୁ ମ୍ୟାଲେରିଆ, ଟାଇଫଏଡ୍ ଏବଂ ଫ୍ଲୁ ଭଳି ରୋଗ ପାଇଁ ମଧ୍ୟ ଏହିପରି ପରୀକ୍ଷଣ କରାଯାଇଥିଲା।
ଏହି ପରୀକ୍ଷଣ ଦ୍ୱାରା କରୋନା ଟିକା ତ୍ୱରାନ୍ବିତ ହୋଇପାରିବ। ଏହି ସମସ୍ତ ଲୋକ ୧୮ରୁ ୩୦ବର୍ଷ ମଧ୍ୟରେ ହୋଇଥିବା ଆବଶ୍ୟକ। ଏହି ବୟସର ଲୋକଙ୍କ ମଧ୍ୟରେ କରୋନାରୁ ମୃତ୍ୟୁ ହେବାର ଆଶଙ୍କା କମ୍ ରହିଥାଏ। ସେମାନଙ୍କୁ ରୟାଲ ଫ୍ରି ହସ୍ପିଟାଲର ସ୍ପେଶାଲିଷ୍ଟ କ୍ଲିନିକ୍ରେ ରଖାଯିବ ଏବଂ ସେମାନଙ୍କର ଲକ୍ଷଣ ପ୍ରତି ନଜର ରଖାଯିବ। ଏହି ଦୁଇ ତିନି ସପ୍ତାହ ପରୀକ୍ଷଣ ପାଇଁ, ଏହି ଲୋକମାନେ ୪୦୦୦ ପାଉଣ୍ଡ ଅର୍ଥାତ୍ ଯାହା ଭାରତୀୟ ମୁଦ୍ରାରେ ପ୍ରାୟ ୪ ଲକ୍ଷ ଟଙ୍କା ପାଇବେ।
୧୮ ବର୍ଷୀୟ ଆଲାଷ୍ଟର ଫ୍ରେଜର ମଧ୍ୟ ଏହି ପରୀକ୍ଷଣରେ ଭାଗ ନେଇଛନ୍ତି। ଏକ ସାକ୍ଷାତକାରରେ ସେ କହିଛନ୍ତି, ତାଙ୍କୁ ଅତି କମ୍ରେ ଦୁଇ ସପ୍ତାହ ଧରି କ୍ଲିନିକରେ ବନ୍ଦ ରଖାଯିବ। ତାଙ୍କ ସ୍ବାସ୍ଥ୍ୟ ପ୍ରତି ନଜର ରଖାଯିବ। ସେ କହିଛନ୍ତି, ଯଦି ଏହି ପରୀକ୍ଷା ସଫଳ ହୁଏ, ତେବେ ଏହା ଲକ୍ଷ ଲକ୍ଷ ଲୋକଙ୍କ ଜୀବନ ରକ୍ଷା କରିପାରିବ। ତେଣୁ ସେମାନେ ଏହି ପରୀକ୍ଷଣର ଭାଗ ନେବାକୁ ପୂରା ପ୍ରସ୍ତୁତ।
ସେହିପରି ୨୯ ବର୍ଷିୟା ଜେନିଫର୍ ରାଇଟ ମଧ୍ୟ ଏହି ପରୀକ୍ଷାରେ ଭାଗ ନେବେ। ସେ କହିଛନ୍ତି, ମୋର କିଛି ବନ୍ଧୁ ଅଛନ୍ତି ଯେଉଁମାନେ ମେଡିକାଲ କ୍ଷେତ୍ରରେ କାମ କରନ୍ତି। ଏହି ମହାମାରୀ ସମୟରେ ସେମାନେ ସମସ୍ତ ପ୍ରକାର ବିପଦକୁ ନେଇ ନିଜ ଜୀବନରେ ଖେଳୁଛନ୍ତି। ଏହି ସମୟରେ, ଆମ ମଧ୍ୟରୁ ଅନେକ ଅଛନ୍ତି, ଯେଉଁମାନେ ଘରେ ସୁରକ୍ଷିତ ଅଛନ୍ତି। ଏଭଳି ପରିସ୍ଥିତିରେ, ଯେତେବେଳେ ମୋତେ ଏପରି ସୁଯୋଗ ମିଳିଲା, ମୁଁ ମନା କରି ପାରିଲି ନାହିଁ।