କୋରୁକୋଣ୍ଡା,୨୩।୪(ଡି. ଏନ. ଏ): ନଦୀକୁ ଗାଧେଇବାକୁ ଯାଇଥିବା ସମୟରେ କୌଣସି କାରଣ ବଶତଃ ପଥରରୁ ଗୋଡ଼ ଖସିଯିବା ଫଳରେ ଯୁବକଙ୍କ ମୃତ୍ୟୁ ହୋଇଛି। ଏଭଳି ଘଟଣା ମାଲକାନାଗିରି ଜିଲା କୋରୁକୋଣ୍ଡା ବ୍ଳକ ସଦରରେ ଘଟିଛି। ସେ ହେଉଛନ୍ତି ଗୌର ଦୋରାଙ୍କ ମଝିଆ ପୁଅ ଜଗନ୍ନାଥ ଦୋରା(୩୦)। ପରିବାର ବର୍ଗଙ୍କ କହିବା ଅନୁଯାୟୀ, ରବିବାର ସକାଳ ପ୍ରାୟ ୯ଟା ସମୟରେ ଜଗନ୍ନାଥ ଗାଧେଇବାକୁ ଯାଉଛି କହି ଘରୁ ବାହାରିଥିଲେ। ଯିବାର କିଛି ସମୟପରେ କିଛି ଲୋକ ଆସି ଘରେ ଖବର ଦେଇଥିଲେ କି ଜଗନ୍ନାଥ ଗାଧେଇ ଯିବା ସମୟରେ ପଥର ଉପରୁ ପଡ଼ିଯାଇଛନ୍ତି। ସେଠାରୁ ତାଙ୍କୁ ସ୍ଥାନୀୟ ଲୋକେ କୋରୁକୋଣ୍ଡା ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରକୁ ନେଇଯାଇଛନ୍ତି। ଖବର ପାଇବା କ୍ଷଣି ପରିବାର ଲୋକେ ତୁରନ୍ତ ଡାକ୍ତରଖାନାକୁ ଯାଇଥିଲେ କିନ୍ତୁ ପରିବାର ଲୋକ ହଞ୍ଚିବା ବେଳକୁ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଏନେଇ ପରିବାର ଲୋକେ ମାଲକାନଗିରି ସଦର ଆଦର୍ଶ ଥାନାରେ ଲିଖିତ ଭାବେ ଜଣାଇଥିଲେ। ଥାନାଧିକାରୀ ଖବରପାଇବା ପରେ ଏକ ଅପମୃତୁ ମାମଲା ରୁଜୁକରି ମୃତଦେହକୁ ଜିଲା ସଦରମହକୁମାକୁ ବ୍ୟବଚ୍ଛେଦ ପାଇଁ ପଠାଇଥିଲେ।