ଭୁବନେଶ୍ୱର,୧୫ା୫(ବ୍ୟୁରୋ): ଖଣ୍ଡଗିରି ଥାନା ଅନ୍ତର୍ଗତ ପାତ୍ରପଡ଼ା ଅଞ୍ଚଳରେ ରୋଷେଇ ଚାଲିଥିବାବେଳେ ଗ୍ୟାସ୍ ଲିକ୍ ହୋଇ ନିଆଁ ଲାଗିଯିବାରୁ ୪ ପରିବାରର ୮ଜଣ ପୋଡ଼ିଯାଇ ଗୁରୁତର ଆହତ ହୋଇଛନ୍ତି। ଆହତଙ୍କ ମଧ୍ୟରେ ୫ଜଣ ମହିଳା ରହିଛନ୍ତି। ଆହତମାନେ ହେଲେ ପବିତ୍ର ସ୍ବାଇଁ, ପ୍ଲାବନ କୁମାର ରାୟ, ଗୋବିନ୍ଦ ଜେନା, ମଞ୍ଜୁଲତା ଜେନା, ବାସନ୍ତୀ ଜେନା, କାନନ ବାଳା ଦାସ, ନଳିନୀ ବାରିକ ଓ ବିଷ୍ଣୁପ୍ରିୟା ମଙ୍ଗରାଜ। ସ୍ଥାନୀୟ ଲୋକେ ସେମାନଙ୍କୁ ଉଦ୍ଧାର କରି ଏମ୍ସ ମେଡିକାଲରେ ଭର୍ତ୍ତି କରିଥିଲେ। ସେଠାରେ ପ୍ଲାବନଙ୍କ ସ୍ବାସ୍ଥ୍ୟାବସ୍ଥା ସଂକଟାପନ୍ନ ହେବାରୁ ତାଙ୍କୁ କଟକ ବଡ଼ ମେଡ଼ିକାଲ୍କୁ ସ୍ଥାନାନ୍ତର କରାଯାଇଛି। ଏଥିସହ ୩ଜଣଙ୍କୁ ଏମ୍ସ ଆଇସିୟୁରେ ଭର୍ତ୍ତି କରାଯାଇଛି।
ମିଳିଥିବା ସୂଚନା ଅନୁଯାୟୀ, ଶୁକ୍ରବାର ପୂର୍ବାହ୍ନ ସାଢେ ୧୧ଟା ସମୟରେ ପ୍ଲାବନଙ୍କ ଘରେ ରୋଷେଇ ହେଉଥିଲା। ଏହି ସମୟରେ ଗ୍ୟାସ୍ ପାଇପ ହଠାତ୍ ଫାଟିଯିବା ସହ ଲିକ୍ ହୋଇ ଘରେ ନିଆଁ ଲାଗିଯାଇଥିଲା। ପରେ ଘର ସାରା ନିଆଁ ବ୍ୟାପିଯିବାରୁ ପ୍ଲାବନ ଜଳିଯାଇଥିଲେ। ଉକ୍ତ ଘର ପାଖକୁ ଲାଗ ଅନ୍ୟ ୩ ପରିବାରର ଝରକା ଖୋଲା ଥିବାରୁ ଜଳନ୍ତା ଗ୍ୟାସ୍ ବ୍ୟାପିଯାଇ ଲୋକଙ୍କ ଦେହରେ ଲାଗି ଯାଇଥିଲା। ଏପଟେ ବିସ୍ଫୋରଣ ଶବ୍ଦ ଓ ଚିତ୍କାର ଶୁଣି ଆଖପାଖ ଲୋକେ ଘଟଣା ସ୍ଥଳରେ ପହଞ୍ଚତ୍ଥିଲେ। ପ୍ଲାବନଙ୍କ ଦେହରେ ନିଆଁ ଲାଗିଥିବା ଦେଖି ରଶ୍ମିରଞ୍ଜନ ପାଟ୍ଟଶାଣୀ ନାମକ ଜଣେ ଯୁବକ ଏକ ଓଦା ଗାମୁଛା ତାଙ୍କ ଦେହରେ ଗୋଡ଼ାଇ ଦେଇଥିଲେ। ପରେ ସମସ୍ତ ଆହତଙ୍କ ନିଜ ଗାଡ଼ିରେ ମେଡିକାଲରେ ଭର୍ତ୍ତି କରିଥିଲେ।
