![](https://www.dharitri.com/wp-content/uploads/2022/12/n-8-24.jpg)
ବେଜିଂ,୨୫ା୧୨: ଚାଇନା ସହରାଞ୍ଚଳରେ ଦୈନିକ ଲକ୍ଷ ଲକ୍ଷ ଲୋକ କୋଭିଡ୍ ସଂକ୍ରମିତ ହେଉଥିବାବେଳେ ଏବେ ଗ୍ରାମାଞ୍ଚଳକୁ ମହାମାରୀ ବ୍ୟାପିଛି। ପ୍ରବାସୀ ଶ୍ରମିକମାନେ ସହରାଞ୍ଚଳରୁ ନିଜ ଗାଁକୁ ଫେରୁଥିବାରୁ ଏବେ କୋଭିଡ୍ ଗାଁମୁହାଁ ହୋଇଛି। ଗ୍ରାମାଞ୍ଚଳରେ ସଂକ୍ରମଣ ଆରମ୍ଭ ହୋଇଯାଇଥିବାବେଳେ ଆଗାମୀ ଦିନରେ ଏହା ଭୟଙ୍କର ରୂପ ନେବା ଆଶଙ୍କା କରାଯଉଛି। ସୋସିଆଲ ମିଡିଆ ରିପୋର୍ଟ ଅନୁଯାୟୀ ଗ୍ରାମାଞ୍ଚଳରେ ଥିବା ଅନେକ କ୍ଲିନିକ୍ରେ ଏବେ ରୋଗୀ ଭର୍ତ୍ତି ହୋଇଗଲେଣି। ଚାଇନା ସରକାର ଚଳିତ ମାସ ଆରମ୍ଭରେ କୋଭିଡ୍ କଟକଣା ହଟାଇଦେବା ପରେ ଲୋକେ ଅବାଧ ଯାତାୟାତ କରୁଛନ୍ତି।
ଆସନ୍ତା ମାସରେ ଚାନ୍ଦ୍ର ନବବର୍ଷ ଛୁଟି ଥିବାରୁ ଲକ୍ଷ ଲକ୍ଷ ପ୍ରବାସୀ ଗାଁକୁ ଫେରିବେ। ଫଳରେ ଗ୍ରାମାଞ୍ଚଳରେ ରହୁଥିବା ୫୦ କୋଟିରୁ ଊର୍ଦ୍ଧ୍ୱ ଲୋକଙ୍କ ଜୀବନ ପ୍ରତି ସଂକ୍ରମଣ ଭୟ ସୃଷ୍ଟି ହୋଇଛି। ବିସ୍ତୀର୍ଣ୍ଣ ଗ୍ରାମାଞ୍ଚଳରେ ସ୍ବାସ୍ଥ୍ୟସେବା ଭିତ୍ତିଭୂମି ସୀମିତ ହୋଇଥିବାରୁ ଏହା ସରକାରଙ୍କ ଚିନ୍ତା ବଢ଼ାଇ ଦେଇଛି। ଇଣ୍ଟରନେଟ ହସ୍ପିଟାଲ ଖୋଲିବାକୁ ସରକାର ଅନୁମତି ଦେଇଛନ୍ତି। ଏହାଦ୍ୱାରା ସଂକ୍ରମିତ ଲୋକେ ମେଡିକାଲ ସହାୟତା ନେଇପାରିବେ ଏବଂ ହସ୍ପିଟାଲ ଓ କ୍ଲିନିକ୍ଗୁଡ଼ିକରେ ରୋଗୀ ଭିଡ଼ ହ୍ରାସ ପାଇପାରିବ। ଗ୍ରାମାଞ୍ଚଳରେ ସ୍ବାସ୍ଥ୍ୟସେବା ବ୍ୟବସ୍ଥା ଦୁର୍ବଳ। ଏହା ସାଙ୍ଗକୁ ଔଷଧ ଓ କେଡିକାଲ କର୍ମଚାରୀଙ୍କ ଅଭାବ ରହିଥିବାରୁ ଏହା ବଡ଼ ସମସ୍ୟା ସୃଷ୍ଟି କରିବ ବୋଲି ଗ୍ଲୋବାଲ ଟାଇମ୍ସ ରିପୋର୍ଟରେ ଦର୍ଶାଯାଇଛି। ଗ୍ରାମାଞ୍ଚଳର ମେଡିକାଲ ସିଷ୍ଟମ ଡବଲ୍ ଝଟ୍କାର ସମ୍ମୁଖୀନ ହୋଇପାରେ ବୋଲି ଉହାନ୍ ୟୁନିଭର୍ସିଟି ପ୍ରଫେସର ଲୁ ଡେଓ୍ବେନ୍ ସୋସିଆଲ ମିଡିଆରେ ଲେଖିଛନ୍ତି। ଲକ୍ଡାଉନ୍, ଲୋକମାନଙ୍କ ଯାତାୟତ ଉପରେ କଟକଣା ଯୋଗୁ ଗ୍ରାମାଞ୍ଚଳରେ ୩ ବର୍ଷ ହେଲା ସଂକ୍ରମଣ ନିୟନ୍ତ୍ରଣରେ ରହିଥିଲା। ଆଗକୁ ସ୍ପ୍ରିଙ୍ଗ୍ ଫେଷ୍ଟିଭାଲ ଥିବାରୁ ସଂକ୍ରମଣ ଦ୍ରୁତ ବୃଦ୍ଧି ପାଇବ ବୋଲି ଲୁ ଆଶଙ୍କା ବ୍ୟକ୍ତ କରିଛନ୍ତି।
ଗତ ମଙ୍ଗଳବାର ଚାଇନାରେ ପାଖାପାଖି ୩.୭ କୋଟି ଲୋକ କୋଭିଡ୍ ସଂକ୍ରମିତ ହୋଇଥିଲେ। ସଂକ୍ରମଣ ଆରମ୍ଭ ହେବାଠାରୁ ଏହା ସର୍ବାଧିକ ବୋଲି କୁହାଯାଉଛି। ଚଳିତ ମାସର ପ୍ରଥମ ୨୦ ଦିନରେ ମୋଟ ୨୪.୮ କୋଟି ଲୋକ ମହାମାରୀ ଆକ୍ରାନ୍ତ ହୋଇଛନ୍ତି, ଯାହା ମୋଟ ଜନସଂଖ୍ୟାର ୧୭.୫୬ ପ୍ରତିଶତ।