ନୂଆଦିଲ୍ଲୀ: ଆଜିକାଲିର ଯୁବପୀଢ଼ି ସୋସିଆଲ ମିଡିଆ ପ୍ରେମରେ। ସେମାନଙ୍କ ଦୈନନ୍ଦିନ ଜୀବନର ଅଧିକାଂଶ ସମୟ ଅନ୍ଲାଇନ୍ରେ କଟିଥାଏ। ଅନେକ ସମୟରେ ସୋସିଆଲ ମିଡିଆରେ ଜଣେ ଅନ୍ୟଜଣଙ୍କ ପ୍ରେମରେ ପଡ଼ିଥିବା ନେଇ ଚର୍ଚ୍ଚା ହୋଇଥାଏ। ସେଥିରୁ କିଛି ପ୍ରେମ ସଫଳ ହୋଇଥିବା ବେଳେ କିଛି ଜୀବନ ବରବାଦ କରିଥାଏ। ସେଭଳି ଏକ ପ୍ରେମକାହାଣୀ ଏବେ ଚର୍ଚ୍ଚାର ବିଷୟ ପାଲଟିଛି।
ପବ୍ଜୀ ଖେଳ ଭାରତରେ ବ୍ୟାନ୍ ହେବା ପୂର୍ବରୁ ହିମାଚଳ ପ୍ରଦେଶର କାଙ୍ଗଡ଼ାରେ ରହୁଥିବା ଜଣେ ବିବାହିତ ମହିଳା ଏହାକୁ ଖେଳୁଥିଲେ। ଏହି ସମୟରେ ବାରାଣସୀର ଜଣେ ଯୁବକଙ୍କ ସହ ତାଙ୍କର ଚିହ୍ନା ପରିଚୟ ହୋଇଥିଲା। ଧିରେ ଧିରେ କଥା ବନ୍ଧୁତା ଏବଂ ପରେ ଏହା ପ୍ରେମରେ ପରିଣତ ହୋଇଥିଲା। ଏହା ପରେ ଉଭୟ ପରସ୍ପରକୁ ମୋବାଇଲ ନମ୍ବର ଦେଇଥିଲେ। ଫୋନ୍ରେ ମଧ୍ୟ ମହିଳାଜଣଙ୍କ ଯୁବକଙ୍କ ସହ ଘଣ୍ଟା ଘଣ୍ଟା ଗପୁଥିଲେ। ଦିନେ ଯୁବକଙ୍କୁ ଭେଟିବାକୁ ମହିଳାଜଣଙ୍କ ଇଚ୍ଛା ପ୍ରକାଶ କରିଥିଲେ। ଏପରିକି ସେ ପରିବାରଲୋକଙ୍କୁ ଛାଡ଼ି ପ୍ରେମିକଙ୍କୁ ଖୋଜିବାକୁ ବାରାଣସୀରେ ପହଞ୍ଚିଥିଲେ। ଅପରପକ୍ଷେ ମହିଳାଙ୍କୁ ଘରେ ନପାଇ ପରିବାରଲୋକେ ଚିନ୍ତିତ ହୋଇଯାଇଥିଲେ।
ମହିଳାଜଣଙ୍କ ବାରାଣସୀ ପହଞ୍ଚିବା ପରେ ଚକିତ ହୋଇଯାଇଥିଲେ। କାରଣ ଯେଉଁ ଯୁବକଙ୍କୁ ସେ ଭଲ ପାଇ ବସିଛନ୍ତି, ସେ ଦ୍ୱାଦଶରେ ପଢ଼ୁଥିବା ଜଣେ ଛାତ୍ର ଥିଲେ। ଏହାଦେଖି ମହିଳା ପରିବାରଲୋକଙ୍କୁ ଫୋନ୍ କରି ତାଙ୍କୁ ନେଇଯିବାକୁ କହିଥିଲେ। ହେଲେ ମହିଳା ନିଖୋଜ ନେଇ ସେମାନେ ପୋଲିସରେ ଅଭିଯୋଗ କରିଥିଲେ। ମହିଳାଙ୍କ ସନ୍ଧାନ ମିଳିବା ପରେ ପରିବାରଲୋକେ ପୋଲିସକୁ ଜଣାଇଥିଲେ। ପରେ ପୋଲିସ ମହିଳାଙ୍କୁ ଉଦ୍ଧାର କରି ପରିବାରଲୋକଙ୍କ ନିକଟରେ ଛାଡ଼ିଥିଲା।