ମୁମ୍ବାଇ,୧୭।୧୧:ପୁଣି ଅସୁସ୍ଥ ହେଲେ ବଲିଉଡ ଅଭିନେତା ଗୋବିନ୍ଦା । ଶନିବାର ଦିନ ମହାରାଷ୍ଟ୍ରର ଜାଲଗାଓଁ ଜିଲାରେ ବଲିଉଡ ଅଭିନେତା ଗୋବିନ୍ଦାଙ୍କ ସ୍ବାସ୍ଥ୍ୟ ହଠାତ ଖରାପ ହୋଇଯାଇଥିଲା। ସେ ସେତେବେଳେ ମହାୟୁତି ମହାମେଣ୍ଟ ପାଇଁ ଏକ ରୋଡ ଶୋ’ କରୁଥିଲେ। ତାଙ୍କ ସ୍ବାସ୍ଥ୍ୟ ଅବସ୍ଥା ହଠାତ୍ ବିଗିଡିବା ପରେ ଗୋବିନ୍ଦା ରୋଡ ଶୋ ଛାଡି ମଧ୍ୟ ମୁମ୍ବାଇ ଫେରିଥିଲେ। ଗୋବିନ୍ଦାଙ୍କ ଏପରି ଅବସ୍ଥା ଦେଖି ସେଠାରେ ଆତଙ୍କ ଖେଳିଯାଇଥିଲା। କୁହାଯାଉଛି ଯେ ହଠାତ ତାଙ୍କ ଛାତିରେ ଯନ୍ତ୍ରଣା ହୋଇଥିଲା। ଗୋବିନ୍ଦାଙ୍କ ନିକଟତମ ବ୍ୟକ୍ତି କହିଛନ୍ତି ଯେ ଅଭିନେତା ବର୍ତ୍ତମାନ ଭଲ ଅଛନ୍ତି। ସେ ଥକି ଯାଇଥିଲେ ଏବଂ ଅସହଜ ଅନୁଭବ କରୁଥିଲେ । ତେବେ ଗୋବିନ୍ଦାଙ୍କଠାରୁ କୌଣସି ଅଫିସିଆଲ ଖବର ମିଳିନାହିଁ ।
ପିଙ୍କଭିଲା ଅନୁସାରେ, ଗୋଲବିନ୍ଦ ଜାଲଗାଓଁର ମୁକଟେନଗର, ବୋଡୱାଡ, ପାଚୋରା ଏବଂ ଚୋପ୍ରା ଠାରେ ମହାୟୁତି ପ୍ରାର୍ଥୀଙ୍କ ପାଇଁ ପ୍ରଚାର କରୁଥିଲେ। ରୋଡ ଶୋ ସମୟରେ ସେ ଜନତାଙ୍କୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ସମର୍ଥନ କରିବାକୁ ଏବଂ ଶାସକ ଦଳକୁ ଭୋଟ ଦେବାକୁ ଅନୁରୋଧ କରିଥିଲେ। ସିଏମ ଏକନାଥ ସିନ୍ଦେଙ୍କ ନେତୃତ୍ୱରେ ଶିବସେନାରେ ଯୋଗଦେବା ପରେ ଗୋବିନ୍ଦା ପୁନର୍ବାର ରାଜନୀତିରେ ପ୍ରବେଶ କରିଥିଲେ।
ମହାରାଷ୍ଟ୍ରର ସମସ୍ତ ୨୮୮ ଟି ଆସନ ପାଇଁ ନଭେମ୍ବର ୨୦ ରେ ମତଦାନ ହେବାକୁ ଯାଉଛି। ନଭେମ୍ବର ୨୩ ରେ ଭୋଟ ଗଣନା ହେବ ।
