ଭୁବନେଶ୍ୱର, ୧୩ା୨(ବ୍ୟୁରୋ):ରାଜ୍ୟରେ ଶୀତ ଗାଏବ ହୋଇଯାଉଥିବାବେଳେ ତାତି ବଢ଼ି ଚାଲିଛି। ଉତ୍ତର ଓଡ଼ିଶାର କିଛି ସ୍ଥାନରେ ଶୀତ ହେଉଥିଲେ ମଧ୍ୟ ବାକି ସବୁ ସ୍ଥାନରେ ଗରମ ଅନୁଭୂତ ହେଉଛି। ଫେବୃୟାରୀରୁ ଗ୍ରୀଷ୍ମର ଅନୁଭବ ହେଉଛି। ରାଜ୍ୟର ଅଧିକାଂଶ ସ୍ଥାନରେ ଦିନ ତାପମାତ୍ରା ୩୨ଡିଗ୍ରୀ ଉପରେ ରହୁଥିବାବେଳେ ରାଜଧାନୀ ଭୁବନେଶ୍ୱରରେ ତାତି ଅସମ୍ଭାଳ ହେଉଛି। ଅପରାହ୍ନରେ ଘରୁ ବାହାରିବା ବି କଷ୍ଟ ହୋଇପଡ଼ୁଛି। ଫେବୃୟାରୀ ଆରମ୍ଭରୁ ସହରରେ ଯେଉଁଭଳି ତାତି ଅନୁଭୂତ ହେଉଛି, ଲାଗୁଛି ଶେଷବେଳକୁ ଭୁବନେଶ୍ୱର ୪୦ ବର୍ଷର ରେକର୍ଡ ଭାଙ୍ଗିବ। ୧୯୬୩ ଫେବୃୟାରୀରେ ଭୁବନେଶ୍ୱରର ସର୍ବୋଚ୍ଚ ତାପମାତ୍ରା ୪୨.୭ ଡିଗ୍ରୀ ରେକର୍ଡ ହୋଇଥିଲା। ତେବେ ୨୦୨୩ରେ ଏହି ରେକର୍ଡ ଟପିଯିବ ବୋଲି ପାଣିପାଗ ବିଭାଗ ଅନୁମାନ କରୁଛି। କିଛିଦିନ ହେବ ଅର୍ଥାତ୍ ଫେବୃୟାରୀ ପ୍ରଥମ ସପ୍ତାହରେ ଭୁବନେଶ୍ୱରର ତାପମାତ୍ରା ୩୫ ଡିଗ୍ରୀ ଟପିଥିଲା। ଦକ୍ଷିଣ ପଶ୍ଚିମ ଦିଗରୁ ପ୍ରବାହିତ ହେବାକୁ ଥିବା ବାୟୁ ପାଇଁ ଆଗକୁ ତାପମାତ୍ରା ଆହୁରି ବଢ଼ିବ ବୋଲି ପାଣିପାଗ ବିଜ୍ଞାନୀ ଆକଳନ କରିଛନ୍ତି। ତେବେ ବାୟୁ ମଣ୍ଡଳରେ ଅସ୍ଥିରତା, ବର୍ଷାର ଅଭାବ, ଜଙ୍ଗଲ କ୍ଷୟ ହିଁ ତାପମାତ୍ରା ବୃଦ୍ଧିର ପ୍ରମୁଖ କାରଣ ହୋଇଥିବା ପାଣିପାଗ ବିଜ୍ଞାନୀ ମତ ରଖିଛନ୍ତି। ପୂର୍ବ ବର୍ଷର ତଥ୍ୟକୁ ଦେଖିଲେ ଗତବର୍ଷ ଫେବୃୟାରୀରେ ତାପମାତ୍ରା ୩୦ ଡିଗ୍ରୀରୁ କମ୍ ରହିଥିବାବେଳେ ୨୦୨୧ ଫେବୃୟାରୀରେ ୪୦ ଡିଗ୍ରୀ ଛୁଇଁଥିଲା। ସେହିପରି ୨୦୨୦ରେ ତାପମାତ୍ରା ୩୦ ଡିଗ୍ରୀଠାରୁ କମ୍ ରହିଥିଲା।
ତେବେ ରବିବାର ମାଲକାନଗିରିରେ ସର୍ବାଧିକ ତାପମାତ୍ରା ୩୭ ଡିଗ୍ରୀ ରହିଥିବାବେଳେ ଅନୁଗୋଳରେ ୩୬.୭, ଭୁବନେଶ୍ୱର ୩୬.୬, ଝାରସୁଗୁଡ଼ା ୩୬.୪, ତାଳଚେର ୩୬, ଛତ୍ରପୁର ୩୬, ବୌଦ୍ଧ ୩୬, ଭଦ୍ରକ ୩୫, ସୁନ୍ଦରଗଡ଼ ୩୫, କଟକ ୩୪.୬, ଗୋପାଳପୁର ୩୪.୬, ବାଲେଶ୍ୱର ୩୪.୫, ଖୋର୍ଦ୍ଧା ୩୪ ଓ ନୟାଗଡ଼ରେ ୩୪ ଡିଗ୍ରୀ ତାପମାତ୍ରା ରେକର୍ଡ କରାଯାଇଛି। ସେପଟେ ଫୁଲବାଣୀରେ ସର୍ବନିମ୍ନ ତାପମାତ୍ରା ୧୦.୫ ଡିଗ୍ରୀ ରହିଥିବା ଭୁବନେଶ୍ୱର ଆଞ୍ଚଳିକ ପାଣିପାଗ କେନ୍ଦ୍ର ପକ୍ଷରୁ ସୂଚନା ମିଳିଛି। ଆସନ୍ତା ୨ ରାତିର ତାପମାତ୍ରା ୨ରୁ ୩ ଡିଗ୍ରୀ ହ୍ରାସ ପାଇବା ସମ୍ଭାବନା ଥିବାବେଳେ ଏହାପରେ ଧୀରେ ଧୀରେ ପୁଣି ତାପମାତ୍ରା ୨ରୁ ୩ଡିଗ୍ରୀ ବୃଦ୍ଧି ପାଇବ ବୋଲି ପାଣିପାଗ କେନ୍ଦ୍ର ପୂର୍ବାନୁମାନ କରିଛି।