ମହାକାଳପଡ଼ା,୧୧ା୧୨(ଡି.ଏନ୍.ଏ.): ଶୈଶବ ବନ୍ଧାପଡ଼ିଛି ଚୁଲି ମୁଣ୍ଡରେ। ଚୁଲି ଧୂଆଁ ରେ ଭବିଷ୍ୟତ ସ୍ବପ୍ନ ଅନ୍ଧକାର ହୋଇଯାଉଛି। ଯେଉଁ ବୟସରେ ନିଜ ସାଥୀମାନେ ବିଦ୍ୟାଳୟକୁ ଯାଉଛନ୍ତି ସେତେବେଳେ ୭ ବର୍ଷର ଝିଅଟିଏ ପରିବାରର ବୋଝ ମୁଣ୍ଡରେ ବୋହିବାକୁ ପଡୁଛି। କାନ୍ଧରେ ବସ୍ତାନି ପକାଇ ସ୍କୁଲ ଯାଇ ପାଠ ପଢ଼ିବା ସ୍ବପ୍ନ ପାଲଟିଛି। ଏଭଳି ଅଭାବନୀୟ ଦୃଶ୍ୟ ଦେଖିବାକୁ ମିଳିଛି କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ପେଟଛେଲା ପଞ୍ଚାୟତ ଶବରପଲ୍ଲୀ ଗାଁରେ।
ଏହି ଗଁାର ଦିନା ଅହାଡ଼ିଙ୍କ ପରିବାର କହିଲେ ସ୍ତ୍ରୀ ଟୁନି, ଝିଅ ପାର୍ବତୀ ୭ ବର୍ଷ ଓ ପୁଅ ରାଜେଶ ୫ ବର୍ଷ। ଅଭାବୀ ପରିବାରର ଗୁଜରାଣ ମେଣ୍ଟାଇବାକୁ ଏହି ଦମ୍ପତି ୪ ମାସ ହେଲା ତାମିଲନାଡୁ ଦାଦନ ଖଟିବାକୁ ଯାଇଛନ୍ତି। ଘରେ ଛୋଟ ଭଉଣୀଭାଇଙ୍କ ଦୁଃଖ କହିଲେ ନ ସରେ। ଦୈନିକ ପାର୍ବତୀ ଓ ସାନଭାଇ ରାଜେଶ ନିକଟ ଜଙ୍ଗଲରୁ ଜାଳ ସଂଗ୍ରହ କରି ଆଣିଲେ ଘରେ ଚୁଲି ଜଳେ। ଭାତମୁଠେ ରାନ୍ଧିବା ପରେ ଖାଲି ଭାତ ସହ ଲୁଣ ଲଗାଇ ଖାଉ ବୋଲି ପାର୍ବତୀ କହିଛନ୍ତି। ମା’ବାପା ଦାଦନ ଖଟିବାକୁ ଚାଲିଯିବା ପରେ ରାତିହେଲେ ନୁଆଁଣିଆ ଭଙ୍ଗା ଝୁମ୍ପୁଡ଼ି ପଲିଥିନ ତଳେ ଶୀତ କାକରରେ ଆଶ୍ରୟ ନେଉ। ଅନେକ ସମୟରେ ଆମେ ଭାଉଣୀଭାଇ ଭୋକ ଉପାସରେ ପାଣି ପିଇ ଶୋଇ ପଡୁ ବୋଲି ପାର୍ବତୀ କହିଛନ୍ତି। ପାଠ ପଢ଼ିବାକୁ ଇଚ୍ଛା ଥିଲେ ମଧ୍ୟ ଦୁହେଁ ଘରର ଅଭାବ ଅସୁବିଧା ଲାଗି ପଢ଼ିପାରୁନାହୁଁ ବୋଲି କହିଛନ୍ତି। ରାଜ୍ୟ ଓ କେନ୍ଦ୍ର ସରକାର ତୃଣମୂଳ ସ୍ତରରେ ଅନୁସୂଚିତ ଜନଜାତିଙ୍କ କଲ୍ୟାଣ ପାଇଁ ବିଭିନ୍ନ ଯୋଜନା ପ୍ରଣୟନ କରୁଥିଲେ ମଧ୍ୟ ଏମାନଙ୍କ କ୍ଷେତ୍ରରେ ଏହା ବାଟ ହୁଡୁଛି। ସରକାର ଏହି ପିଲାଦ୍ୱୟଙ୍କୁ ମୁଖ୍ୟ ସ୍ରୋତରେ ସାମିଲ କରିବା ସହ ମାଗଣାରେ ଆବାସିକ ବିଦ୍ୟାଳୟରେ ଶିକ୍ଷା ପ୍ରଦାନ ପାଇଁ ବୁଦ୍ଧିଜୀବୀ ମହଲରେ ଦାବି ହେଉଛି। ପଞ୍ଚାୟତର ପୂର୍ବତନ ସରପଞ୍ଚ ନାଥ କୁମାର ଭୋଳଙ୍କୁ ପଚାରିବାରେ ଶବରପଲ୍ଲୀର ଏହି ଅଭାବୀ ପରିବାରକୁ ପ୍ରଶାସନ ତୁରନ୍ତ ସହାୟତା ଯୋଗାଇଦେବାକୁ ସେ ଦାବି କରିଛନ୍ତି। ଏ ସମ୍ପର୍କରେ ଜିଲାପାଳ ଅମୃତ ଋତୁରାଜଙ୍କୁ ଯୋଗାଯୋଗ କରାଯାଇଥିଲେ ହେଁ ସମ୍ଭବ ହୋଇପାରିନାହିଁ।