ପାଟନା,୧୬ା୧୨ : ପାଟନା କୋର୍ଟ ପରିସରରେ ଜଣେ ବିଚାରାଧୀନ କଏଦୀଙ୍କୁ ୨ ଜଣ ଯୁବକ ଗୁଳିକରି ହତ୍ୟା କରିଛନ୍ତି। ପୋଲିସ ଦୁଇ ଅଭିଯୁକ୍ତଙ୍କୁ ଗିରଫ କରିଛି। ସେମାନଙ୍କୁ କିଏ ପଠାଇଥିଲେ ଓ ହତ୍ୟାର କାରଣ ସମ୍ପର୍କରେ ପୋଲିସ ସେମାନଙ୍କୁ ମାରାଥନ ଜେରା କରୁଥିବା ସୂଚନା ମିଳିଛି।
ସୂଚନା ଯୋଗ୍ୟ, ସିକନ୍ଦରପୁରର ଅଭିଷେକ କୁମାର ଓରଫ ଛୋଟେ ସରକାରଙ୍କ ବିରୋଧରେ ହତ୍ୟା ସମେତ ବିଭିନ୍ନ ମାମଲା ରହିଥିଲା। ସହରର ବେଉର ଜେଲରେ ଥିବା କଏଦୀ ଅଭିଷେକଙ୍କୁ ଦାନାପୁର କୋର୍ଟରେ ହାଜର ପାଇଁ ଅଣାଯାଇଥିବା ବେଳେ ୨ ଅଭିଯୁକ୍ତ ତାଙ୍କୁ ଗୁଳି କରିଥିଲେ। ଫଳରେ ଅଭିଷେକଙ୍କ ଘଟଣାସ୍ଥଳରେ ମୃତ୍ୟୁ ଘଟିଥିଲା। ଅନ୍ୟପକ୍ଷେ ପୋଲିସ ଘଟଣାର ତଦନ୍ତ ଚଳାଇଛି।