ଇସଲାମାବାଦ,୭।୧୧ : ବିଶ୍ୱକପ ୨୦୨୩ ରେ ବିରାଟ କୋହଲିଙ୍କ ଉତ୍କୃଷ୍ଟ ପ୍ରଦର୍ଶନ ଜାରି ରହିଛି। ରବିବାର ଦିନ ବିଶ୍ୱକପ ଦକ୍ଷିଣ ଆଫ୍ରିକା ବିପକ୍ଷରେ ଭାରତର ତାରକା ବ୍ୟାଟ୍ସମ୍ୟାନ ନିଜର ଏକଦିବସୀୟ କ୍ୟାରିୟରର ୪୯ ତମ ଶତକ ହାସଲ କରି ସଚିନ ତେନ୍ଦୁଲକରଙ୍କ ରେକର୍ଡ ସହ ସମକ୍ଷକ ହୋଇଛନ୍ତି।
ପାକିସ୍ତାନର ପୂର୍ବତନ ଅଲରାଉଣ୍ଡର ଅବଦୁଲ ରଜାକ କହିଛନ୍ତି ବିରାଟ କୋହଲିଙ୍କ ସଫଳତାରେ ତାଙ୍କ ସ୍ତ୍ରୀ ଅନୁଷ୍କା ଶର୍ମାଙ୍କର ପ୍ରମୁଖ ଭୂମିକା ରହିଛି। ପାକିସ୍ତାନୀ ଟିଭି ଚ୍ୟାନେଲରେ ବିଶ୍ୱକପ ପ୍ୟାନେଲର ଏକ ଅଂଶ ଥିବା ରଜାକ ଥଟ୍ଟା କରି କହିଛନ୍ତି ଭାରତୀୟ ବ୍ୟାଟ୍ସମ୍ୟାନଙ୍କ ସଫଳତା ପଛରେ ତାଙ୍କ ସ୍ତ୍ରୀ ଅଛନ୍ତି।
ପାକିସ୍ତାନର ପୂର୍ବତନ ଅଲରାଉଣ୍ଡର ଅବଦୁଲ ରଜାକ ବିରାଟ କୋହଲିଙ୍କ ଫିଟନେସକୁ ପ୍ରଶଂସା କରିଥିଲେ ଏବଂ ପାକିସ୍ତାନୀ ଖେଳାଳିଙ୍କୁ ସମାଲୋଚନା କରିଥିଲେ।
ବିରାଟ କୋହଲି କାହିଁକି ଶ୍ରେଷ୍ଠ? ମୁଁ ଆପଣଙ୍କୁ କିଛି ବିସ୍ତୃତ ଭାବରେ କହିବି। ସମସ୍ତେ ପଚାରୁଛନ୍ତି କୋହଲି କିପରି ବିଶ୍ୱସ୍ତରର ଖେଳାଳି ହେଲେ। କିନ୍ତୁ ଆମର କୌଣସି ପାକିସ୍ତାନୀ ଖେଳାଳି ସେ କରୁଥିବା କଠିନ ପରିଶ୍ରମର ୧୦ ପ୍ରତିଶତ ମଧ୍ୟ କରନ୍ତି ନାହିଁ। ତାଙ୍କର ଫିଟନେସକୁ ଦେଖନ୍ତୁ। ସେ ଯେଉଁଭଳି ଭାବରେ ଦୌଡ଼ନ୍ତି ତାହା ଅବିଶ୍ୱାସନୀୟ। ଦୁଇ ରନକୁ ତିନି ରନରେ କିପରି ପରିଣତ କରିବେ ସେ ଜାଣନ୍ତି ।
ପାକିସ୍ତାନର ପୂର୍ବତନ ଦ୍ରୁତ ବୋଲର ମହମ୍ମଦ ଆମିର ମଧ୍ୟ ଏହି ପ୍ୟାନେଲର ଏକ ଅଂଶ ଥିଲେ। ସେ କହିଛନ୍ତି ଯଦି ବିରାଟ କୋହଲି ଜିମ୍ବାୱେ, ନେଦରଲାଣ୍ଡ ଏବଂ ନେପାଳ ଭଳି ଦଳ ବିପକ୍ଷରେ ମ୍ୟାଚ ଖେଳିଥାନ୍ତେ, ତେବେ ସେ ବର୍ତ୍ତମାନ ପର୍ଯ୍ୟନ୍ତ ସଚିନ ତେନ୍ଦୁଲକରଙ୍କ ରେକର୍ଡ ଭାଙ୍ଗି ସାରିଥାନ୍ତେ। ଏହା ସହିତ ଆମିର ପାକିସ୍ତାନ ଅଧିନାୟକ ବାବର ଆଜମଙ୍କୁ କଡ଼ା ସମାଲୋଚନା କରିଥିଲେ।