ନୂଆଦିଲ୍ଲୀ,୧୯।୩:ପଶ୍ଚିମବଙ୍ଗ ପୋଲିସ ମହାନିର୍ଦ୍ଦେଶକ ପଦରୁ ରାଜୀବ କୁମାରଙ୍କୁ ସୋମବାର ଅପରାହ୍ନରେ ନିର୍ବାଚନ କମିଶନ ହଟାଇବା ପରେ ଏହି ବରିଷ୍ଠ ପୋଲିସ ଅଧିକାରୀ ପୁଣି ଚର୍ଚ୍ଚାକୁ ଆସିଛନ୍ତି। ୨୦୨୩ ଡିସେମ୍ବରରେ ମନୋଜ ମାଲବ୍ୟ ଡିଜିପି ପଦରୁ ଅବସର ନେବା ପରେ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ଘନିଷ୍ଠ ସହଯୋଗୀ ରାଜୀବଙ୍କୁ ତାଙ୍କ ସ୍ଥାନରେ ନିଯୁକ୍ତି ଦିଆଯାଇଥିଲା। ଏହା ପୂର୍ବରୁ ରାଜୀବ କୋଲକାତା ପୋଲିସ କମିଶନର ଏବଂ ବିଧାନନଗର ପୋଲିସ ମୁଖ୍ୟ ଭାବେ କାର୍ଯ୍ୟ କରିଥିଲେ। ସେ ସିଆଇଡି, ଏସ୍ଟିଏଫ୍ ମୁଖ୍ୟ ଏବଂ ସୂଚନା କାରିଗରି ଓ ଇଲେକ୍ଟ୍ରୋନିକ୍ସ ବିଭାଗ ପ୍ରମୁଖ ସଚିବ ଭାବେ ମଧ୍ୟ ଦାୟିତ୍ୱ ତୁଲାଇଥିଲେ। ୨୦୧୯ରେ ରାଜ୍ୟ ସରକାର ସରଧା ଦୁର୍ନୀତିର ତଦନ୍ତ ପାଇଁ ଏକ ଏସ୍ଆଇଟି ଗଠନ କରିଥିବାବେଳେ ରାଜୀବ ଏହି ମାମଲାର ପ୍ରମାଣ ନଷ୍ଟ କରିଥିବା କେନ୍ଦ୍ରୀୟ ତଦନ୍ତ ବ୍ୟୁରୋ (ସିବିଆଇ) ଅଭିଯୋଗ ଆଣିଥିଲା। ସିବିଆଇର ଅଭିଯୋଗ ଏବଂ ସେହି ବର୍ଷ ଫେବୃଆରୀରେ ରାଜୀବଙ୍କ ଘରେ ଚଢ଼ାଉ ପରେ ମୁଖ୍ୟମନ୍ତ୍ରୀ ମମତା ଦୁଇଦିନ ଧାରଣାରେ ବସିଥିଲେ। ସୁପ୍ରିମକୋର୍ଟ ରାଜୀବଙ୍କ୍ୁ ଗିରଫଦାରିରୁ ସୁରକ୍ଷା ଦେବାପରେ ମମତା ଧାରଣାରୁ ଉଠିଥିଲେ।