ନୂଆଦିଲ୍ଲୀ,୯।୬: ତୃତୀୟ ଥର ଲାଗି ପ୍ରଧାନମନ୍ତ୍ରୀ ହେବାକୁ ଯାଉଥିବା ନରେନ୍ଦ୍ର ମୋଦିଙ୍କ କ୍ୟାବିନେଟ୍ରେ କିଏ କିଏ ସାମିଲ ହେବେ ତାହାକୁ ନେଇ ଚର୍ଚ୍ଚା ଜୋର ଧରିଛି। ଶିବରାଜ ସିଂ ଚୌହ୍ବାନ, ଜ୍ୟୋତିରାଦିତ୍ୟ ସିନ୍ଧିଆ, ନୀତିନ ଗଡକରୀ, ଲଲନ ସିଂଙ୍କ ପ୍ରମୁଖ କ୍ୟାବିନେଟରେ ସାମିଲ ହୋଇପାରନ୍ତି ବୋଲି କୁହାଯାଉଛି। ଏସବୁ ମଧ୍ୟରେ ନିର୍ବାଚନରେ ଭାଜପା ସହଯୋଗୀ ତେଲୁଗୁ ଦେଶମ ପାର୍ଟି ପକ୍ଷରୁ ୨ଜଣଙ୍କ ଉପରେ ମୋହର ବାଜିଛି। ଦଳର କୋଟାରୁ ଦୁଇ ଏମ୍ପି ରାମ ମୋହନ ନାଇଡୁ, ଚନ୍ଦ୍ରଶେଖର ପେମ୍ମାସାନୀ ମନ୍ତ୍ରୀ ହେବେ।
ସୂଚନାନୁଯାୟୀ, ୩୬ ବର୍ଷୀୟ ରାମ ମୋହନ କ୍ୟାବିନେଟ ମନ୍ତ୍ରୀ ଭାବେ ଶପଥ ନେବେ। ସେ ଏଯାବତ ସବୁଠାରୁ କମ୍ ବୟସର କ୍ୟାବିନେଟ ମନ୍ତ୍ରୀ ହେବେ। ଆସନ୍ତୁ ଜାଣିବା ତାଙ୍କ ବିଷୟରେ ସବିଶେଷ…
ରାମ ମୋହନ ନାଇଡୁ କିଏ?
ରାମ ମୋହନ ପୂର୍ବ କେନ୍ଦ୍ର ମନ୍ତ୍ରୀ ତଥା ଟିଡିପି ନେତା ୟେରନ ନାଇଡୁଙ୍କ ପୁଅ। ନିମ୍ମାଡାରେ ୧୯୮୭ ଡିସେମ୍ବର ୧୮ରେ ତାଙ୍କର ଜନ୍ମ। ସେ ଆର୍କେପୁରମ୍ର ଦିଲ୍ଲୀ ପବ୍ଲିକ୍ ସ୍କୁଲରେ ପ୍ରାରମ୍ଭିକ ଶିକ୍ଷା ଗ୍ରହଣ କରିଥିଲେ। ଏହାପରେ ସେ ଆମେରିକାରେ ଇଲେକ୍ଟ୍ରିକ୍ ଇଞ୍ଜିନିୟରିଂ ଏବଂ ଲଙ୍ଗ ଆଇଲାଣ୍ଡରୁ ଏମ୍ବିଏ କରିଛନ୍ତି। ୨୦୧୨ କାର୍ ଦୁର୍ଘଟଣାରେ ବାପାଙ୍କ ମୃତ୍ୟୁ ହେବା ପରେ ସେ ଭାରତ ଆସି ରାଜନୀତିରେ ସକ୍ରିୟ ହୋଇଥିଲେ।
୨୦୧୪ ନିର୍ବାଚନରେ ସେ ଶ୍ରିକାକୁଲମରୁ ଏମ୍ପି ଭାବେ ନିର୍ବାଚିତ ହୋଇଥିଲେ। ସେତେବେଳେ ତାଙ୍କୁ ୨୬ ବର୍ଷ ହୋଇଥିଲା। ୧୬ତମ ଲୋକ ସଭାରେ ସେ ଦ୍ୱିତୀୟ ସବୁଠାରୁ କମ୍ ବୟସ୍କ ଏମ୍ପି ହୋଇଥିଲେ। ଏହାପରେ ୨୦୧୯ରେ ବି ସେ ଏମ୍ପି ହୋଇଥିଲେ। ୨୦୨୪ରେ ମଧ୍ୟ ସେ ଲଗାତାର ତୃତୀୟ ଥର ଲାଗି ପାର୍ଲାମେଣ୍ଟରେ ପହଞ୍ଚିଛନ୍ତି।
ରାମ ମୋହନଙ୍କୁ ଟିଡିପି ମୁଖ୍ୟ ଚନ୍ଦ୍ରବାବୁ ନାଇଡୁଙ୍କ ନିକଟତର ନେତା ବୋଲି କୁହାଯାଏ। ଏବେ ସେ ଟିଡିପିର ରାଷ୍ଟ୍ରୀୟ ମହାସଚିବ ଅଛନ୍ତି। ୨୦୨୦ରେ ତାଙ୍କୁ ସଂସଦ ରତ୍ନ ପୁରସ୍କାର ମିଳିଛି। ସେ ପାର୍ଲାମେଣ୍ଟର କୃଷି, ପଶୁପାଳନ, ରେଳ, ଗୃହ, ପର୍ଯ୍ୟଟନ ଏବଂ ସଂସ୍କୃତି ସମେତ ଅନେକ ସମିତିରେ ସାମିଲ ହୋଇଛନ୍ତି।
