ବମ୍ବେ: ଆୟକର ବିଭାଗ ପକ୍ଷରୁ ଚଢ଼ାଉ କରାଯିବାକୁ ନେଇ ଅଡ଼ୁଆରେ ଫସିଛନ୍ତି ଅଭିନେତ୍ରୀ ତାପସୀ ପନ୍ନୁ। ଘଟଣାରେ ଫିଲ୍ମଜଗତ ସହ ଅନେକ ବ୍ୟକ୍ତିତ୍ୱଙ୍କ ନାମ ଆସିଥିବାରୁ ଆରୋପ ପ୍ରତ୍ୟାରୋପ ଜାରି ରହିଛି। ଏସବୁ ମଧ୍ୟରେ ତାପସୀଙ୍କ କଥିତ ପ୍ରେମିକ ଚର୍ଚ୍ଚାକୁ ଆସିଛନ୍ତି। ଏହା ତାଙ୍କ ଟୁଇଟ୍କୁ ନେଇ।
ଗତ ବର୍ଷେ ଧରି ବ୍ୟାଡମିଣ୍ଟନ୍ ଷ୍ଟାର ମାଥିୟସ ମୋଇଙ୍କୁ ତାପସୀ ଡେଟ୍ କରୁଥିବା ନେଇ ଖବର ଶୁଣିବାକୁ ମିଳିଥିଲା। ହେଲେ ଏକଦା ତାପସୀ ଏକରକମ କଥାକୁ ଏଡ଼ାଇ ଯାଇଥିଲେ। ଉଭୟ ଭିନ୍ନ ଭିନ୍ନ ଫିଲ୍ଡର ହୋଇଥିବା ଯୋଗୁ କେହି କାହା କାମରେ ହସ୍ତକ୍ଷେପ କରୁ ନ ଥିବା ସେ କହିଥିଲେ। ଏବେ ତାପସୀଙ୍କ ଘରେ ଚଢ଼ାଉକୁ ନେଇ ମାଥିୟସ ଟୁଇଟ୍ କରି କେନ୍ଦ୍ର ଖେଳମନ୍ତ୍ରୀ କିରଣ ରେଜିଜୁଙ୍କୁ ସହାୟତା ମାଗିଛନ୍ତି। ଅଭିନେତ୍ରୀ ଓ ତାଙ୍କ ପରିବାରକୁ ହଇରାଣ କରାଯାଉଥିବାରୁ ସେ ଅସନ୍ତୋଷ ପ୍ରକାଶ କରିଛନ୍ତି।
ମାଥିୟସ୍ ଟୁଇଟ୍ କରି ମନ୍ତ୍ରୀଙ୍କୁ କହିଥିଲେ, ଭାରତରେ ପ୍ରଥମ ଥର କୋଚ୍ ଭାବେ ପ୍ରତିନିଧିତ୍ୱ କରୁଛି। ହେଲେ ତାପସୀଙ୍କ ମା’ବାପା ଅସୁବିଧାରେ ଅଛନ୍ତି। ଏହା ମୋତେ ଚକିତ କରିଛି। ଆପଣ କିଛି କରନ୍ତୁ ବୋଲି ସେ କହିଥିଲେ। ଏହାର ଜବାବରେ ମନ୍ତ୍ରୀ କହିଛନ୍ତି, ଭାରତରେ ସର୍ବୋଚ୍ଚ ସ୍ଥାନରେ ଆଇନ୍ ରହିଛି। ଆମକୁ ଏହାକୁ ପାଳନ କରିବାକୁ ହେବ। ଏହା ଆପଣ-ମୋର ମାମଲାଠାରୁ ବହୁତ ଆଗରେ। ଆମକୁ ଆମର କର୍ତ୍ତବ୍ୟ କରିବାକୁ ହେବ। ଭାରତୀୟ ଖେଳଜଗତ ପାଇଁ ଏହା ସବୁଠାରୁ ଠିକ୍ ହେବ ବୋଲି କହିଛନ୍ତି।