ନୂଆଦିଲ୍ଲୀ,୩।୧୨: ବିରାଟ କୋହଲି ନିକଟରେ ସଚିନ ତେନ୍ଦୁଲକରଙ୍କ ଦିନିକିଆରେ ସର୍ବାଧିକ ଶତକର ରେକର୍ଡ ଭାଙ୍ଗିଛନ୍ତି। ତାଙ୍କର ଏହି ସଫଳତା ପରଠାରୁ କ୍ରିକେଟ ଜଗତରେ ଆଲୋଚନା ଚାଲିଛି ଯେ ସଚିନ ଏବଂ ବିରାଟଙ୍କ ମଧ୍ୟରେ ଶ୍ରେଷ୍ଠ ବ୍ୟାଟ୍ସମ୍ୟାନ କିଏ? କ୍ରିକେଟ ବିଶେଷଜ୍ଞମାନେ ଏହି ପ୍ରସଙ୍ଗରେ ନିଜର ଭିନ୍ନ ମତ ପ୍ରକାଶ କରୁଛନ୍ତି। ଏହି ସମୟରେ ପାକିସ୍ତାନୀ କ୍ରିକେଟର ଜୁନୈଦ ଖାନ ଏହି ବିତର୍କରେ ଏକ ନୂଆ ନାମ ଯୋଡିଛନ୍ତି। ଜୁନୈଦ ଉଭୟ ସଚିନ ଏବଂ ବିରାଟଙ୍କୁ ପ୍ରତ୍ୟାଖ୍ୟାନ କରି ରୋହିତ ଶର୍ମାଙ୍କୁ ଶ୍ରେଷ୍ଠ ବ୍ୟାଟ୍ସମ୍ୟାନ ବୋଲି କହିଛନ୍ତି।
ନାଦିର ଅଲି ପୋଡକଷ୍ଟରେ ଜୁନୈଦଙ୍କୁ ପଚରାଯାଇଥିଲା,ସଚିନ ଏବଂ ବିରାଟଙ୍କ ମଧ୍ୟରେ କିଏ ଶ୍ରେଷ୍ଠ। ଏହାର ଜବାବରେ ସେ କହିଥିଲେ, ମୁଁ ଏଠାରେ ରୋହିତ ଶର୍ମାଙ୍କ ନାମ ନେବାକୁ ଚାହୁଁଛି। ତାଙ୍କର ସମସ୍ତ ପ୍ରକାରର ସଟ୍ ଅଛି । ରୋହିତଙ୍କୁ ହିଟମ୍ୟାନ କୁହାଯାଏ କାରଣ ସେ ମଧ୍ୟ ଦିନିକିଆରେ ୨୬୪ ରନ ସ୍କୋର କରିଛନ୍ତି। ଏହା ଗୋଟିଏ ଥର ନୁହେଁ। ସେ ଦିନିକିଆରେ ଅନେକଥର ଦ୍ୱିଶତକ ହାସଲ କରିଛନ୍ତି। ଅନ୍ୟ ବ୍ୟାଟ୍ସମ୍ୟାନମାନେ ଏପରି କରିସ୍ମା କରିବାରେ ସକ୍ଷମ ହୋଇ ନାହାଁନ୍ତି। ତାଙ୍କ ନିକଟରେ କିଛି ଭିନ୍ନ ଗୁଣ ଅଛି। ଏଥିସହ ସେ ସର୍ବାଧିକ ଛକା ବି ମାରିଛନ୍ତି।
ବିରାଟ ଏବଂ ସଚିନଙ୍କ ବିଷୟରେ ଜୁନୈଦ କହିନ୍ତି, ବିରାଟ ଜଣେ ମହାନ ଖେଳାଳି କିନ୍ତୁ ସଚିନ ଏକ ଭିନ୍ନ ଯୁଗରେ ବ୍ୟାଟିଂ କରିଥିଲେ। ଯଦି ସଚିନ ଆଜି ଖେଳୁଥାନ୍ତେ, ସେ ବୋଧହୁଏ ୧୦୦ ଶତକରୁ ଅଧିକ (ଦିନିକିଆ) ସ୍କୋର କରିଥାନ୍ତେ।