ନୂଆଦିଲ୍ଲୀ/ମସ୍କୋ,୮।୫: ମେ ୭ରେ କ୍ରେମଲିନ ପ୍ୟାଲେସରେ ଭ୍ଲାଡିମର ପୁଟିନ ପଞ୍ଚମଥର ପାଇଁ ରୁଷିଆର ରାଷ୍ଟ୍ରପତି ଭାବରେ ଶପଥ ଗ୍ରହଣ କରିଥିଲେ। ୨୦୦୦ରେ ପୁଟିନ ପ୍ରଥମ ଥର ପାଇଁ ରୁଷିଆର ରାଷ୍ଟ୍ରପତି ହୋଇଥିଲେ। ୨୦୨୪ରେ ରାଷ୍ଟ୍ରପତି ହେବା ପରେ ପୁଟିନ ୨୦୩୦ ପର୍ଯ୍ୟନ୍ତ ରୁଷିଆ ଉପରେ ଶାସନ କରିବେ। ଦୀର୍ଘ ଦିନ ଧରି ରୁଷିଆ ଉପରେ ଶାସନ କରିବାରେ ପୁଟିନ ପ୍ରଥମ ରାଷ୍ଟ୍ରପତି ହେବେ। ପୁଟିନ ବିଶ୍ୱର ସବୁଠାରୁ ଶକ୍ତିଶାଳୀ ନେତା କି ବୋଲି ପ୍ରଶ୍ନ ଉଠିଛି? ପୁଟିନଙ୍କ ତୁଳନାରେ ଭାରତୀୟ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ଆମେରିକାର ରାଷ୍ଟ୍ରପତି ଜୋ ବାଇଡେନ ଏବଂ ଚାଇନା ରାଷ୍ଟ୍ରପତି ସି ଜିନପିଙ୍ଗ କେତେ ଶକ୍ତିଶାଳୀ ତାହାକୁ ନେଇ ପ୍ରଶ୍ନ ଉଠିଛି।
ଦୀର୍ଘ ଦିନ ଧରି କ୍ଷମତାରେ ରହିବା ଆଧାରରେ ଯଦି ତୁଳନା କରାଯାଏ, ତେବେ ଏହି ପ୍ରସଙ୍ଗରେ ପୁଟିନ ପ୍ରଥମ ସ୍ଥାନରେ, ସି ଜିନପିଙ୍ଗ ଦ୍ୱିତୀୟ ସ୍ଥାନରେ ଏବଂ ଭାରତୀୟ ପ୍ରଧାନମନ୍ତ୍ରୀ ମୋଦି ତୃତୀୟ ସ୍ଥାନରେ ଅଛନ୍ତି। କାରଣ ପୁଟିନ ଗତ ୨୦ ବର୍ଷ କ୍ଷମତାରେ ଥିବାବେଳେ ସି ଜିନପିଙ୍ଗ ୧୧ ବର୍ଷ ଏବଂ ପ୍ରଧାନମନ୍ତ୍ରୀ ମୋଦି ୧୦ ବର୍ଷ କ୍ଷମତାରେ ଅଛନ୍ତି। ଜୋ ବାଇଡେନ ମାତ୍ର ୪ ବର୍ଷ କ୍ଷମତାରେ ଅଛନ୍ତି। ତେବେ ରୁଷିଆରେ ନିରପେକ୍ଷ ନିର୍ବାଚନ ହେବାକୁ ଦେଇ ନ ଥିବା ପୁଟିନଙ୍କ ନାଁରେ ଅଭିଯୋଗ ରହିଛି। ମାର୍ଚ୍ଚରେ ନିର୍ବାଚନ ପୂର୍ବରୁ ପୁଟିନଙ୍କ କଠୋର ପ୍ରତିଦ୍ୱନ୍ଦ୍ୱୀ ଆଲେକ୍ସୀ ନାଭାଲନି ସନ୍ଦେହଜନକ ପରିସ୍ଥିତିରେ ମୃତ୍ୟୁବରଣ କରିଥିଲେ।
ଏଥି ସହିତ ଚାଇନାରେ କେବଳ ଗୋଟିଏ ଦଳ ଶାସନ କରୁଛନ୍ତି, ୨୦୧୩ ପରଠାରୁ ସି ଜିନପିଙ୍ଗ କ୍ରମାଗତ ଭାବରେ କମ୍ୟୁନିଷ୍ଟ ଦଳର ନେତା ଭାବରେ ନିର୍ବାଚିତ ହେଉଛନ୍ତି। ଅନ୍ୟପକ୍ଷରେ ଭାରତରେ ଏକ ବହୁ-ପାର୍ଟି ବ୍ୟବସ୍ଥା ଅଛି। ଗତ ୧୦ ବର୍ଷ ଧରି ଏଠାରେ କ୍ଷମତାରେ ଥିବାବେଳେ ନରେନ୍ଦ୍ର ମୋଦିଙ୍କ ପାଇଁ ସବୁଠାରୁ ବଡ ଆହ୍ବାନ ବିରୋଧୀ ଦଳର ନେତା ରାହୁଲ ଗାନ୍ଧୀଙ୍କଠାରୁ ଆସିଛି।
ଯଦି ଅର୍ଥନୈତିକ ଦୃଷ୍ଟିକୋଣରୁ ତୁଳନା କରାଯାଏ, ଆମେରିକାର ନେତା ଜୋ ବାଇଡେନ ସବୁଠାରୁ ଶକ୍ତିଶାଳୀ, ରୁଷିଆ ଏହି ପ୍ରସଙ୍ଗରେ ବହୁ ପଛରେ ଅଛି। ଗ୍ଲୋବାଲ ଫାୟାର ଇଣ୍ଡେକ୍ସ ଅନୁଯାୟୀ, ଆମେରିକାର ସବୁଠାରୁ ଶକ୍ତିଶାଳୀ ସେନା ଥିବାବେଳେ ପରମାଣୁ ଅସ୍ତ୍ରଶସ୍ତ୍ର କ୍ଷେତ୍ରରେ ରୁଷିଆ ଆଗରେ ରହିଛି। ସୈନିକଙ୍କ ସଂଖ୍ୟା ପ୍ରସଙ୍ଗରେ ଭାରତ ସବୁଠାରୁ ଶକ୍ତିଶାଳୀ, କାରଣ ଭାରତରେ ୫୧ ଲକ୍ଷରୁ ଅଧିକ ସୈନ୍ୟ ଅଛନ୍ତି। ଅନ୍ୟପକ୍ଷରେ ଆମେରିକାର ୨୧ ଲକ୍ଷ ସୈନିକ, ରୁଷିଆର ୩୫ ଲକ୍ଷ ସୈନିକ ଏବଂ ଚାଇନାର ୩୧ ଲକ୍ଷ ସୈନିକ ଅଛନ୍ତି।
ସୋସିଆଲ ମିଡିଆ ପ୍ରଶଂସକଙ୍କ ବିଷୟରେ କୌଣସି ପ୍ରତିଯୋଗିତା ନାହିଁ। ଫେସବୁକରେ ମୋଦିଙ୍କର ୪.୯ କୋଟି ଏବଂ ଏକ୍ସରେ ୯.୭୫ କୋଟି ଫଲୋଅର୍ସ ଅଛନ୍ତି। ଏହି ପ୍ରସଙ୍ଗରେ ବିଶ୍ୱର ସମସ୍ତ ନେତା ବହୁତ ପଛରେ ଅଛନ୍ତି। ପୁଟିନଙ୍କ ଏକ୍ସ ହ୍ୟାଣ୍ଡେଲରେ ମାତ୍ର ୧୯ ଲକ୍ଷ ଫଲୋଅର୍ସ ଥିବାବେଳେ ଫେସବୁକରେ ତାଙ୍କର ଆକାଉଣ୍ଟ ନାହିଁ। ଜୋ ବାଇଡେନ୍ଙ୍କର ଏକ୍ସରେ ୩.୮ କୋଟି ଏବଂ ଫେସବୁକରେ ୧୧ ଫଲୋଅର୍ସ ଅଛନ୍ତି।