ଓ୍ବାଶିଂଟନ,୨୪।୧ : ଆମେରିକାର ନବନିଯୁକ୍ତ ରାଷ୍ଟ୍ରପତି ଜୋ ବାଇଡେନଙ୍କୁ ଅଫିସିଆଲ ଟୁଇଟର ଆକାଉଣ୍ଟ ମିଳିଛି। ଏହି ଆକାଉଣ୍ଟରେ ସେ ୧୩ ଜଣ ଲୋକଙ୍କୁ ଫଲୋ କରୁଛନ୍ତି। ଏହି ୧୩ ଜଣଙ୍କ ମଧ୍ୟରେ ବାଇଡେନଙ୍କ ସ୍ତ୍ରୀ ଜିଲ୍ ବାଇଡେନ, କମଳା ହାରିସଙ୍କ ସମେତ ହ୍ବାଇଟ୍ ହାଉସର ଆଉ କିଛି ଅଧିକାରୀ ଅଛନ୍ତି। ତେବେ ସବୁଠୁ ଚର୍ଚ୍ଚାର ବିଷୟ ହେଲା ୧୩ ଜଣଙ୍କ ମଧ୍ୟରେ କ୍ରିସୀ ଟିଗେନ୍ ନାମକ ଜଣେ ମଡେଲ ଅଛନ୍ତି। ଟିଗେନ ବାଇଡେନଙ୍କୁ ଫଲୋ କରିବା ପାଇଁ ଅନୁରୋଧ କରିଥିଲେ।
କ୍ରିସୀ ଟୁଇଟ୍ କରି କହିଛନ୍ତି, ପୂର୍ବତନ ରାଷ୍ଟ୍ରପତି ଟ୍ରମ୍ପ ତାଙ୍କୁ ରାଷ୍ଟ୍ରପତିଙ୍କ ଅଫିସିଆଲ ଆକାଉଣ୍ଟରୁ ବ୍ଲକ କରି ଦେଇଛନ୍ତି। ଫଳରେ ମୁଁ ୪ ବର୍ଷ ହେଲା ରାଷ୍ଟ୍ରପତିଙ୍କ ଟୁଇଟ୍ ଦେଖିପାରୁନାହିଁ। କ୍ରିସୀ ନିଜ ଦୁଃଖ ଜଣାଇବା ସହ ବାଇଡେନଙ୍କୁ ଅନୁରୋଧ କରିଥିଲେ ମୋତେ ଫଲୋ କରିପାରିବେ କି? ବାଇଡେନ ତୁରନ୍ତ ତାଙ୍କ ରିକ୍ୱେଷ୍ଟ ଗ୍ରହଣ କରିଥିଲେ। ଏହା ପରେ କ୍ରିସୀ ଏବଂ ତାଙ୍କ ଫଲୋଅର୍ସ ବହୁତ ଖୁସି ହୋଇଛନ୍ତି।
୩୫ ବର୍ଷୀୟା କ୍ରିସୀ ଟ୍ରମ୍ପଙ୍କ ନୀତିର ଜଣେ ସମାଲୋଚିକା। ୨୦୧୭ରେ ଏକ ଟୁଇଟ୍ ମାଧ୍ୟମରେ ଗୋଟିଏ କଥା ଖୋଲି କହିଥିଲେ। ଏହା ପରେ ଟ୍ରମ୍ପ ତାଙ୍କୁ ବ୍ଲକ କରିଦେଇଥିଲେ। କ୍ରିସୀ ପେସାରେ ଜଣେ ମଡେଲ। ସେ ୨୦୧୦ରେ ନିଜର କ୍ୟାରିୟର ଆରମ୍ଭ କରିଥିଲେ। ତାଙ୍କ ମା ଥାଇଲାଣ୍ଡର ହୋଇଥିବା ବେଳେ ବାପା ଆମେରିକାନ। କ୍ରିସୀ ମଡେଲିଂ କରିବା ପାଇଁ ଫୁଡ୍ ଶୋ’କୁ ଯାଇଥାନ୍ତି। ସେଥିପାଇଁ ଲୋକେ ତାଙ୍କୁ ‘ଫୁଡି’ କୁହନ୍ତି। କେତେକ ଟିଭି ଶୋ’ରେ ମଧ୍ୟ ସେ ହୋଷ୍ଟ କରିଛନ୍ତି।