ଜେନେଭା,୧୨।୮: ବିଶ୍ୱର ଅନେକ ଦେଶରେ ମଙ୍କିପକ୍ସ ସଂକ୍ରମଣ ବୃଦ୍ଧି ପାଇଛି। ମଙ୍କିପକ୍ସ ପାଇଁ ମାଙ୍କଡ ଦାୟୀ ଭାବି ଅନେକ ଦେଶରେ ମାଙ୍କଡ ମାରିଦେଉଛନ୍ତି। କିନ୍ତୁ ବିଶ୍ୱ ସ୍ବାସ୍ଥ୍ୟ ସଂଗଠନ (ଡବ୍ଲୁଏଚ୍ଓ) ପକ୍ଷରୁ ମଙ୍କିପକ୍ସ ପାଇଁ ମାଙ୍କଡ ଦାୟୀ ନୁହେଁ ବୋଲି କୁହାଯାଇଛି। ବ୍ରାଜିଲରେ ମାଙ୍କଡ ଉପରେ ବଢୁଥିବା ଆକ୍ରମଣ ପରେ ଡବ୍ଲୁଏଚ୍ଓ ଏହି ସ୍ପଷ୍ଟୀକରଣ ଦେବାକୁ ପଡିଛି। ବ୍ରାଜିଲ ବର୍ତ୍ତମାନ ମଙ୍କିପକ୍ସ ଦ୍ୱାରା ଅଧିକ ପ୍ରଭାବିତ ହୋଇଥିବା ଦେଶ ମଧ୍ୟରୁ ଗୋଟିଏ। ଏଠାରେ ମଙ୍କିପକ୍ସରେ ଜଣେ ବ୍ୟକ୍ତିଙ୍କର ମଧ୍ୟ ମୃତ୍ୟୁ ଘଟିଛି। ମଙ୍କିପକ୍ସ କାରଣରୁ ସ୍ପେନ ଏବଂ ଭାରତରେ ମଧ୍ୟ ଜଣେ ଜଣେ ରୋଗୀଙ୍କ ମୃତ୍ୟୁ ଘଟିଛି।
ଡବ୍ଲୁଏଚ୍ଓର ମୁଖପାତ୍ର ମାର୍ଗେଟ ହାରିସ ଜେନେଭାରେ କହିଛନ୍ତି, ଏହି ରୋଗ ବ୍ୟାପିବା ପାଇଁ ମାଙ୍କଡମାନଙ୍କୁ ଦାୟୀ କରାଯାଇପାରିବ ନାହିଁ। ଲୋକମାନେ ଜାଣିବା ଆବଶ୍ୟକ ଯେ ମଙ୍କିପକ୍ସ ଭାଇରସ୍ ପଶୁଙ୍କଠାରୁ ମଣିଷଙ୍କ ପର୍ଯ୍ୟନ୍ତ ବ୍ୟାପିଥାଏ କିନ୍ତୁ ଏବେ ମଙ୍କିପକ୍ସ କେବଳ ମଣିଷରୁ ମଣିଷ ବ୍ୟାପୁଛି। ତେଣୁ ମାଙ୍କଡକୁ ମାରିବାର କୌଣସି ଯଥାର୍ଥତା ନାହିଁ।