ନୂଆଦିଲ୍ଲୀ,୧୫।୫: କଂଗ୍ରେସ ନେତା ରାହୁଲ ଗାନ୍ଧୀ ଗଙ୍ଗା ନଦୀରେ ମୃତଦେହ ଭାସିବା ପ୍ରସଙ୍ଗରେ କେନ୍ଦ୍ର ସରକାରଙ୍କୁ କଡା ସମାଲୋଚନା କରିଛନ୍ତି। ରାହୁଲ ଟୁଇଟରେ ‘ଯିଏ କହୁଥିଲା, ଗଙ୍ଗା ଡାକିଛନ୍ତି, ସେ ମା’ ଗଙ୍ଗାଙ୍କୁ କନ୍ଦାଇଛନ୍ତି’ ଉଲ୍ଳେଖ କରିଛନ୍ତି। ରାହୁଲ ମୋଦିଙ୍କ ନାମ ନ ନେଇ ସିଧାସଳଖ ପ୍ରଧାନମନ୍ତ୍ରୀଙ୍କୁ ସମାଲୋଚନା କରିଛନ୍ତି। ରାହୁଲ ଟୁଇଟରେ ଗଣମାଧ୍ୟମରେ ପ୍ରକାଶିତ ଏକ ଖବର ମଧ୍ୟ ସେୟାର କରିଛନ୍ତି। ଯେଉଁଥିରେ ଦାବି କରାଯାଇଛି ଯେ, ଗଙ୍ଗା କୂଳରୁ ହଜାର ହଜାର ମୃତଦେହ ମିଳିଛି। ଏପରି କି କାନପୁରର ଶେରେଶ୍ୱର ଘାଟ ଅଞ୍ଚଳରେ ମଧ୍ୟ ଶତାଧିକ ମୃତଦେହ ପୋତି ଦିଆଯାଇଥିବା ତଥ୍ୟ ଦିଆଯାଇଛି। ଏହାର ଗୋଟିଏ ଦିନ ପୂର୍ବରୁ କଂଗ୍ରେସ ମହାସଚିବ ପ୍ରିୟଙ୍କା ଗାନ୍ଧୀ ଭଦ୍ରା ମଧ୍ୟ ଟୁଇଟ କରି ବଲିଆ ଏବଂ ଗାଜୀପୁର ଗଙ୍ଗା ନଦୀରେ ମୃତଦେହ ଭାସୁ ଥିବା ଉଲ୍ଳେଖ କରିଥିଲେ। କରୋନା ମୃତକଙ୍କ ଯେତିକି ସରକାରୀ ସଂଖ୍ୟା କୁହାଯାଉଛି ତାହା ସଠିକ ନୁହେଁ ବୋଲି କହିଥିଲେ।