ଜେନେଭା/ନୂଆଦିଲ୍ଲୀ,୧୭।୩ : ଗତ ଦୁଇ ବର୍ଷ ଧରି କରୋନା ମହାମାରୀ ସମଗ୍ର ପୃଥିବୀରେ ଆତଙ୍କ ସୃଷ୍ଟି କରିଛି। ଅବଶ୍ୟ, ଗତ କିଛି ସପ୍ତାହ ଧରି ଭାତରରେ କରୋନା ମାମଲା କ୍ରମାଗତ ଭାବେ ହ୍ରାସ ପାଉଛି। କିନ୍ତୁ ବର୍ତ୍ତମାନ ବିଶ୍ୱ ସୱାସ୍ଥ୍ୟ ସଂଗଠନ (ଡବ୍ଲ୍ୟୁଏଚ୍ଓ) ଦ୍ୱାରା ଏକ ବଡ଼ ଚେତାବନୀ ଦିଆଯାଇଛି। ଡବ୍ଲ୍ୟୁଏଚ୍ଓ ପୃଥିବୀର ବିଭିନ୍ନ ଦେଶକୁ ଚେତାବନୀ ଦେଇ କହିଛି ଯେ ଆଗାମୀ ଦିନରେ କରୋନା ଏକ ବଡ ଲମ୍ଫ ଦେବାର ଆଶଙ୍କା ରହିଛି।
ନ୍ୟୁଜ୍ ଏଜେନ୍ସି ଆଇଏଏନଏସ୍ ଅନୁଯାୟୀ, ଡବ୍ଲ୍ୟୁଏଚ୍ଓ କହିଛି ଯେ ପୃଥିବୀରେ ପୁଣି କରୋନା ମାମଲା ବୃଦ୍ଧି ପାଇପାରେ। ଏହାର କାରଣ ହେଉଛି କରୋନା ପରୀକ୍ଷା କ୍ରମାଗତ ଭାବେ ହ୍ରାସ ପାଉଛି ଏବଂ ଗତ କିଛି ସପ୍ତାହ ଧରି କମ ମାମଲା ପଞ୍ଜିକୃତ ହେଉଛି। ଏହା ବ୍ୟତୀତ କେଉଁ ଦେଶରେ ସର୍ବାଧିକ ସଂଖ୍ୟକ ମାମଲା ରହିବାର ଆଶଙ୍କା ରହିଛି ସେନେଇ ଡବ୍ଲ୍ୟୁଏଚ୍ଓ ଚେତାବନୀ ଦେଇଛି।
ଡବ୍ଲ୍ୟୁଏଚ୍ଓ ଅନୁଯାୟୀ, ଏସିଆର ବହୁ ଦେଶରେ କରୋନା ମାମଲା ଦ୍ରୁତ ଗତିରେ ବୃଦ୍ଧି ପାଇପାରେ। ଯାହା ଏବେ କିଛି ଦେଶରେ ବୃଦ୍ଧି ପାଇବାରେ ଲାଗିଛି । ଡବ୍ଲ୍ୟୁଏଚ୍ଓର ଚେତାବନୀ ଏପରି ଏକ ସମୟରେ ଆସିଛି ଯେତେବେଳେ ଚାଇନାରେ କରୋନା ମାମଲା ଦ୍ରୁତ ଗତିରେ ବଢୁୁଛି। କରୋନା ପୁଣିଥରେ ଚାଇନାରେ ସମସ୍ତଙ୍କୁ ଅସୁବିଧାରେ ପକାଇଛି। ଫଳରେ ୧୩ ଟି ସହରରେ ଲକ୍ଡାଉନ୍ ଘୋଷଣା କରାଯାଇଛି। ଏଠାରେ ଓମିକ୍ରନର ସବ-ଭାରିଆଣ୍ଟ ବିଏ.୨ ର ମାମଲା ପଞ୍ଜିକୃତ ହେଉଛି। ଯଦିଓ ଏହା ମାରାତ୍ମକ ବୋଲି ବିବେଚନା କରାଯାଇ ନାହିଁ। କିନ୍ତୁ ଏହା ଦ୍ରୁତ ଗତିରେ ବ୍ୟାପିଥାଏ। ଚାଇନା ବ୍ୟତୀତ ଅନ୍ୟ କେତେକ ଦେଶରେ ମଧ୍ୟ କରୋନା ମାମଲା ଦ୍ରୁତ ଗତିରେ ବୃଦ୍ଧି ପାଉଛି।
ପୃଥିବୀର ସମସ୍ତ ଦେଶରେ କରୋନା ସ୍ଥିତିକୁ ଦୃଷ୍ଟିରେ ରଖି ଭାରତ ଲାଗି ମଧ୍ୟ ଡବ୍ଲ୍ୟୁଏଚ୍ଓ ପକ୍ଷରୁ ସତର୍କ ସୂଚନା ଜାରି କରାଯାଇଛି। ଦାବି ହେଉଛି ଯେ ଜୁନ ସୁଦ୍ଧା ଚତୁର୍ଥ ଲହରର ପ୍ରଭାବ ଭାରତରେ ଦେଖିବାକୁ ମିଳିବ। ସେଥିପାଇଁ ଭାରତ ସରକାରଙ୍କ ସ୍ବାସ୍ଥ୍ୟ ମନ୍ତ୍ରଣାଳୟ ପକ୍ଷରୁ କରୋନା ସମ୍ବନ୍ଧରେ ନିରନ୍ତର ସମୀକ୍ଷା ବୈଠକ କରାଯାଉଛି। ଏହା ସହିତ କରୋନା ସ୍ଥିତି ଉପରେ ନଜର ରଖିବାକୁ ଅଧିକାରୀମାନଙ୍କୁ ନିର୍ଦ୍ଦେଶ ଦିଆଯାଇଛି। ଅବଶ୍ୟ, ବର୍ତ୍ତମାନ ସମୟରେ ଦେଶରେ କରୋନା ମାମଲା କ୍ରମାଗତ ଭାବେ ହ୍ରାସ ପାଉଛି ଏବଂ ଏହା ଉପରେ ଲାଗିଥିବା ପ୍ରତିବନ୍ଧକ ମଧ୍ୟ ହଟାଯାଇଛି।