କରୋନା ମହାମାରୀ ସମଗ୍ର ବିଶ୍ୱରେ କ୍ଷତି ପହଞ୍ଚାଇଥିବା ବେଳେ କିଛି ଲୋକଙ୍କୁ ନୂଆ ଜୀବନ ବି ଦେଇଛି। ଇଂଲଣ୍ଡରେ ରହୁଥିବା ଜଣେ ଯୁବତୀଙ୍କ କ୍ଷେତ୍ରରେ ଏମିତି କିଛି ଘଟିଛି। ଏକ ପାର୍ଟିରେ ଓଲିବିୟା ଇବିଟସନ ନାମକ ୨୧ ବର୍ଷୀୟା ଯୁବତୀ ଅତ୍ୟଧିକ ମଦ୍ୟମାନ କରିଥିଲେ। ଫଳରେ ତାଙ୍କ ଅବସ୍ଥା ପୂରା ବିଗିଡ଼ି ଯାଇଥିଲା। ଏପରିକି ସେ କୋମାକୁ ଚାଲିଯାଇଥିଲେ। କିନ୍ତୁ କରୋନା ମହାମାରୀ ତାଙ୍କୁ ନୂଆ ଜୀବନ ଦେଇଛି। ଯାହା ଶୁଣିଲେ ଆଶ୍ଚର୍ଯ୍ୟ ଲାଗେ।
ଓଲିବିୟା ୧୫ ବର୍ଷରୁ ମଦ ପିଉଛନ୍ତି। ୧୮-୧୯ ବର୍ଷ ପର୍ଯ୍ୟନ୍ତ ସେ ପ୍ରତିଦିନ ମଦ ପିଉଥିଲେ। ଏପରିକି ପାର୍ଟିକୁ ଯିବା ମାତ୍ରେ ମଦ ବୋତଲ ସଫା କରିଦିଅନ୍ତି। ଦିନକୁ ଦିନ ତାଙ୍କ ଜୀବନଶୈଳୀ ଖରାପ ଆଡ଼କୁ ଗତିକଲା। ସେ ଡାଇବେଟିସ୍ ରୋଗରେ ପୀଡ଼ିତ ହେଲେ। ୨୦୧୯ରେ ତାଙ୍କ ଦେହ ବହୁତ ଖରାପ ହୋଇଗଲା। ଅନ୍ୟପଟେ ମାର୍ଚ୍ଚ ୨୦୨୦ରେ କରୋନା ଭାଇରସ୍ ଇଂଲଣ୍ଡରେ କାୟା ବିସ୍ତାର କରିଥିଲା। ଏହି କାରଣରୁ ଲକ୍ଡାଉନ୍ ମଧ୍ୟ ହୋଇଥିଲା। ସେହି ସମୟରେ ଓଲିବିୟାଙ୍କ ମନ ପରିବର୍ତ୍ତନ ହୋଇଗଲା। କରୋନା ଯୋଗୁ ତାଙ୍କ ମନରେ ସକାରାତ୍ମକ ଭାବନା ଜାଗ୍ରତ ହେଲା। ଓଲିବିୟା ଅନୁଭବ କଲେ ଜଙ୍କଫୁଡ୍ ଏବଂ ମଦ ଯୋଗୁ ତାଙ୍କ ଓଜନ ବଢ଼ିଯାଉଛି। ସେ ଗ୍ରୀନ୍-ଟି ପିଇବାକୁ ଲାଗିଲେ। ପ୍ରତିଦିନ ବ୍ୟାୟାମ ମଧ୍ୟ କଲେ। ଫଳରେ ତାଙ୍କ ଓଜନ କମିବାରେ ଲାଗିଲା। ଓଲିବିୟା କୁହନ୍ତି, କରୋନା ମହାମାରୀ ଯୋଗୁ ତାଙ୍କ ଜୀବନ ବଦଳିଗଲା। ସେ ନୂଆ ଜୀବନ ପାଇଛନ୍ତି। ସେ କୁହନ୍ତି, ମୋ’ ଜାଣିବାରେ ଲକ୍ଡାଉନ୍ ମୋ’ ପାଇଁ ସବୁଠୁ ଭଲ। କରୋନା ମୋତେ ଖୁସି ଆଣି ଦେଇଛି।