![](https://www.dharitri.com/wp-content/uploads/2023/11/n-10.gif)
କୋଲକାତା,୨୮।୧୧ : ଆଇସିସି ପୁରୁଷ ଟି -୨୦ ବିଶ୍ୱକପ ୨୦୨୪ ପାଖେଇ ଆସୁଛି। ସମସ୍ତ ଦଳ ଆଗାମୀ ସଂସ୍କରଣ ପାଇଁ ପ୍ରସ୍ତୁତି ଆରମ୍ଭ କରିସାରିଛନ୍ତି। ଏହି ଟାଇଟଲ ଉପରେ ଭାରତୀୟ ଦଳ ମଧ୍ୟ ନଜର ରଖିଛି। ଏହାପୂର୍ବରୁ ଏକ ବଡ ପ୍ରଶ୍ନ ଉଠିବାରେ ଲାଗିଛି। ଆଗାମୀ ଟୁର୍ନାମେଣ୍ଟରେ କିଏ ଟିମ ଇଣ୍ଡିଆର ନେତୃତ୍ୱ ନେବେ?
ଦେଶର ବରିଷ୍ଠ କ୍ରିକେଟରମାନେ ଏହି ପ୍ରଶ୍ନର ଉତ୍ତର ଦେଇଛନ୍ତି। ପୂର୍ବତନ କ୍ରିକେଟର ଜାହିର ଖାନ କ୍ରିକବଜ ସହ ବାର୍ତ୍ତାଳାପ ସମୟରେ ଏହି ପ୍ରଶ୍ନର ଉତ୍ତର ଦେଇଥିବା ବେଳେ କହିଛନ୍ତି, ’ଟି-୨୦ ବିଶ୍ୱକପରେ ମୁଁ ଭାବୁଛି ଦଳ ଅଭିଜ୍ଞତା ସହିତ ଆଗକୁ ବଢ଼ିବା ଉଚିତ। ଚୟନକର୍ତ୍ତାମାନେ ଅଭିଜ୍ଞ ଖେଳାଳିଙ୍କୁ ଅଗ୍ରାଧିକାର ଦେବା ଉଚିତ।
ଯଦି ରୋହିତ ଶର୍ମା ଟି-୨୦ ବିଶ୍ୱକପ ୨୦୨୪ ରେ ଭାରତୀୟ ଦଳର ନେତୃତ୍ୱ ନେବେ ତେବେ ଭଲ ହେବ। ସେ ଦୀର୍ଘ ସମୟ ଧରି ଅଧିନାୟକ ରହିଛନ୍ତି ଏବଂ ଖେଳାଳିମାନଙ୍କୁ ସେ ଭଲ ଭାବରେ ବୁଝନ୍ତି। ମ୍ୟାଚ ସମୟରେ କଠିନ ପରିସ୍ଥିତି ଏବଂ ଚାପକୁ କିପରି ଭଲ ଭାବରେ ପରିଚାଳନା କରିବେ ତାହା ସେ ଜାଣନ୍ତି। ଅବଶିଷ୍ଟ ଖେଳାଳିମାନଙ୍କୁ ଭବିଷ୍ୟତ ପାଇଁ ପ୍ରସ୍ତୁତ କରିପାରିବେ । ମୋ କହିବାନୁସାରେ, ସେ ଟି-୨୦ ବିଶ୍ୱକପ ୨୦୨୪ରେ ଭାରତୀୟ ଦଳର ଅଧିନାୟକ ହେବା ଉଚିିତ।
ଭାରତୀୟ ଦଳର ପୂର୍ବତନ କ୍ରିକେଟର ପାର୍ଥିବ ପଟେଲ ମଧ୍ୟ ଏହି ପ୍ରସଙ୍ଗରେ ନିଜର ମତ ରଖିଛନ୍ତି। ବଡ ଟୁର୍ନାମେଣ୍ଟ ପାଇଁ ସେ ଅଭିଜ୍ଞତାକୁ ମଧ୍ୟ ଗୁରୁତ୍ୱ ଦେଇଛନ୍ତି। ପୂର୍ବତନ ୱିକେଟ କିପର ବ୍ୟାଟ୍ସମ୍ୟାନ କ୍ରିକବଜ ସହ ବାର୍ତ୍ତାଳାପ ବେଳେ କହିଛନ୍ତି, ’ରୋହିତ ଶର୍ମା ଟି -୨୦ ବିଶ୍ୱକପ ୨୦୨୪ ପାଇଁ ଅଧିନାୟକ ହେବା ଆବଶ୍ୟକ। ସମସ୍ତେ ସ୍ବୀକାର କରିଛନ୍ତି ବିଶ୍ୱକପ ଶେଷ ହେବା ପରେ ହାର୍ଦ୍ଦିକ ପାଣ୍ଡ୍ୟା ଭାରତର ପରବର୍ତ୍ତୀ ଟି-୨୦ ଅଧିନାୟକ ହେବେ, କିନ୍ତୁ ତାଙ୍କ ଆଘାତକୁ ଦେଖି ଅନୁମାନ କରିପାରୁ ନାହିଁ ସେ କେବେ ପଡ଼ିଆକୁ ଫେରିବେ।
ପାର୍ଥିବ ପଟେଲ କହିଛନ୍ତି, ’ଯଦି ଆଗାମୀ ବର୍ଷ ଖେଳାଯିବାକୁ ଥିବା ଚାମ୍ପିଅନ୍ସ ଟ୍ରଫି ପାଇଁ ଯୋଜନା କରାଯାଉଛି ତେବେ ଏହା ଠିକ ଅଛି, କିନ୍ତୁ ରୋହିତ ଶର୍ମାଙ୍କୁ ଟି-୨୦ ବିଶ୍ୱକପ ୨୦୨୪ପାଇଁ ଅଧିନାୟକ କରିବା ନିଷ୍ପତ୍ତି ଠିକ ହେବ।’