ନୂଆଦିଲ୍ଲୀ,୨୧।୬: ଚଳିତ ନିର୍ବାଚନରେ ଉତ୍ତରପ୍ରଦେଶରେ ଇଣ୍ଡିଆ ଆଲାଇନ୍ସ ଅତୁଳନୀୟ ସଫଳତା ହାସଲ କରିଛି। ୟୁପିର ୮୦ଟି ଲୋକ ସଭା ଆସନ ମଧ୍ୟରୁ ଇଣ୍ଡିଆ ୪୩ଟି ଆସନ ଜିତିଥିବାବେଳେ ଭାଜପା ଖାତାକୁ କେବଳ ୩୩ଟି ଆସନରେ ଯାଇଛି। ଏଥର ୟୁପିରେ ଇଣ୍ଡିଆ ମେଣ୍ଟର କଂଗ୍ରେସ ଏବଂ ସମାଜବାଦୀ ପାର୍ଟି ଏକାଠି ପ୍ରତିଦ୍ୱନ୍ଦ୍ୱିତା କରିଥିଲେ ଏବଂ ଏହାର ଫଳାଫଳ କେବଳ ଭାଜପାକୁ ନୁହେଁ ଜାତୀୟ ରାଜନୀତିକୁ ମଧ୍ୟ ଚକିତ କରି ଦେଇଥିଲେ।
ତେବେ ଏବେ ପ୍ରଶ୍ନ ଉଠୁଛି ଯେ ଯଦି ୟୁପିରେ ଏବେ ବିଧାନସଭା ନିର୍ବାଚନ ଅନୁଷ୍ଠିତ ହୁଏ, ତେବେ କିଏ ସରକାର ଗଢିବ। ଯଦିଓ ଏଠାରେ ବିଧାନସଭା ନିର୍ବାଚନ ୨୦୨୭ରେ ହେବାକୁ ଯାଉଛି, କିନ୍ତୁ ନେତାମାନେ ଏବେଠୁ ସମରସଜ୍ଜା କରିବାରେ ଲାଗି ପଡିଲେଣି। ଏବେଠୁ ରାଜନୈତିକ ମହଲରେ ଚର୍ଚ୍ଚା ଆରମ୍ଭ ହେଲାଣି କି, ଯଦି ନିର୍ବାଚନ ହୁଏ ତେବେ କତଲ ଜିତିବ। ଲୋକ ସଭା ନିର୍ବାଚନର ଫଳାଫଳକୁ ଆକଳନ କରି ଦେଖିଲେ ଆମେ ଜାଣିପାରିବା ପ୍ରତ୍ୟେକ ଲୋକ ସଭା ନିର୍ବାଚନମଣ୍ଡଳୀରେ କେଉଁ ଦଳ ଆଗରେ ଅଛନ୍ତି। ଉଦାହରଣ ସ୍ବରୂପ, ଯଦି ବାରାଣାସୀରେ ଭାଜପା ଜିତିଛି, ତେବେ କେଉଁ ଦଳ ଏହି ଅଞ୍ଚଳର ବିଧାନସଭା ଆସନରେ ଆଗରେ ଅଛନ୍ତି। ଏହି ଆଧାରରେ ଏବେକାର ସ୍ଥିତିକୁ ଦେଖି ବିଭିନ୍ନ କଳ୍ପନାଜଳ୍ପନା କରାଯାଉଛି।
ଯଦି ଲୋକ ସଭା ନିର୍ବାଚନର ଫଳାଫଳକୁ ବିଧାନସଭା ନିର୍ବାଚନରେ ପରିଣତ କରାଯାଏ, ତେବେ ଅଖିଳେଶ ଯାଦବ ଏବଂ ରାହୁଲ ଗାନ୍ଧୀଙ୍କ ଦଳର ଇଣ୍ଡିଆ ମେଣ୍ଟ ୨୨୪ଟି ଆସନ ଜିତିପାରେ। ସମାଜବାଦୀ ପାର୍ଟି ସର୍ବାଧିକ ଆସନ ହାସଲ କରପାରେ ବୋଲି କୁହାଯାଇପାରେ। ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ଦଳ ଭାଜପା ନେତୃତ୍ୱାଧୀନ ଏନଡିଏ ମେଣ୍ଟ ପାଖକୁ ୧୭୪ଟି ଆସନ ପାଇପାରେ।
ସବୁଠାରୁ ଆଶ୍ଚର୍ଯ୍ୟଜନକ କଥା ହେଉଛି ବିଏସପି ଆକାଉଣ୍ଟରେ ଗୋଟିଏ ବି ସିଟ ମିଳିବା ଆଶା କରାଯାଇ ପାରନାହିଁ। ୟୁପିରେ ମୋଟ ୪୦୩ ବିଧାନସଭା ଆସନ ରହିଛି, ସେଥିମଧ୍ୟରୁ ୨୦୨ଟି ସିଟ ଜିତିଲେ ସଂଖ୍ୟାଗରିଷ୍ଠତା ହାସଲ କରିପାରିବ। ଏଭଳି ପରିସ୍ଥିତିରେ ଯଦି ବର୍ତ୍ତମାନ ନିର୍ବାଚନ ଅନୁଷ୍ଠିତ ହୁଏ ତେବେ ଇଣ୍ଡିଆ ମେଣ୍ଟ ହିଁ ସହଜରେ ବହୁମତ ହାସଲ କରିପାରେ।