କଲମ୍ବୋ,୧୭।୭: ରବିବାର ଠାରୁ ଆରମ୍ଭ ହେବାକୁ ଯାଉଛି ଶ୍ରୀଲଙ୍କା ବିପକ୍ଷ ଦିନିକିଆ ସିରିଜ୍। ୩ ମ୍ୟାଚ୍ ବିଶିଷ୍ଟ ସିରିଜ୍ରେ ଅଧିନାୟକ ଶିଖର ଧାଓ୍ବନଙ୍କ ସହ କିଏ ଓପନିଂ କରିବ, ସେ ନେଇ ଚିନ୍ତାରେ ଟିମ୍ ମ୍ୟାନେଜମେଣ୍ଟ। କାରଣ ଫାଙ୍କା ଥିବା ଓପନିଂ ସ୍ଲଟ ପାଇଁ ପୃଥ୍ବୀ ଶ’, ଦେବଦତ୍ତ ପାଡିକଲ ଓ ରୁତୁରାଜ ଗାଏକ୍ୱାଡଙ୍କ ଭଳି ଦାବିଦାର ଅଛନ୍ତି। ଏହା ଉପରେ ମତ ରଖିଛନ୍ତି ପୂର୍ବତନ ଓପନର ତଥା ଭାଷ୍ୟକାର ଆକାଶ ଚୋପ୍ରା। ତାଙ୍କ ମତରେ ପ୍ରଥମ ଦିନିକିଆରେ ଧାଓ୍ବନଙ୍କ ସହ ପୃଥ୍ବୀ ଶ’ ଓପନିଂ କରିବା ଉଚିତ।
ମୋ ମତରେ ଧାଓ୍ବନଙ୍କ ସହ ପୃଥ୍ବୀଙ୍କୁ ସୁଯୋଗ ମିଳିବା ଉଚିତ। କାରଣ ସେ ଦଳକୁ ପ୍ରଲୋଭନକାରୀ ବିକଳ୍ପ ଦିଅନ୍ତି। ତାଙ୍କ ନିକଟରେ ଇନିଂସ ଆରମ୍ଭରୁ ବିସ୍ଫୋରକ ବ୍ୟାଟିଂ କରିବାର ଦକ୍ଷତା ରହିଛି। ଯଦି ଏଭଳି ଖେଳାଳିଙ୍କୁ ସୁଯୋଗ ଦିଆଯାଏ ଓ ସେ ଏହାର ସଠିକ୍ ଫାଇଦା ଉଠାନ୍ତି, ତେବେ ଦଳକୁ ଏକ ଭଲ ବିକଳ୍ପ ମିଳିବ ବୋଲି ଆକାଶ ତାଙ୍କ ୟୁଟ୍ୟୁବ ଚ୍ୟାନେଲରେ କହିଛନ୍ତି।
ଅକ୍ଟୋବରରେ ୟୁଏଇରେ ହେବାକୁ ଥିବା ଟି୨୦ ବିଶ୍ୱକପ୍ର ଓପନିଂ ପାଇଁ ଅଧିନାୟକ ବିରାଟ କୋହଲି, ରୋହିତ ଶର୍ମା, ଲୋକେଶ ରାହୁଲ ଓ ଶିଖର ଧାଓ୍ବନ ଦାବିଦାର ଅଛନ୍ତି। ଯଦି ପୃଥ୍ବୀ ଶ୍ରୀଲଙ୍କା ବିପକ୍ଷ ସିରିଜ୍ରେ ଆଖିଦୃଶିଆ ପ୍ରଦର୍ଶନ କରନ୍ତି, ତେବେ ତାଙ୍କୁ ମଧ୍ୟ ଏହି ରେସରେ ଏଣ୍ଟ୍ରି ମିଳିପାରେ।