ପଟ୍ଟାମୁଣ୍ଡାଇ,୧୫ା୩ (କଳ୍ପତରୁ ନାୟକ): ୨୦୨୪ ସାଧାରଣ ନିର୍ବାଚନକୁ ଦୃଷ୍ଟିରେ ରଖି କିଛି ମାସ ହେବ ରାଜ୍ୟର ୩ ପ୍ରମୁଖ ରାଜନୈତିକ ଦଳ ବିଜେଡି, ଭାଜପା ଏବଂ କଂଗ୍ରେସ ନିଜ ନିଜର ପ୍ରସ୍ତୁତି ଜୋର୍ଦାର ଚଳାଇ ଆସୁଥିଲେ। ମାତ୍ର କିଛିଦିନ ହେବ ବିଜେଡି-ଭାଜପା ମେଣ୍ଟ ଚର୍ଚ୍ଚା ହେବା ଦିନଠାରୁ ପ୍ରମୁଖ ଦଳର ଅଧିକାଂଶ ନେତା ବର୍ତ୍ତମାନ ନିଜର ରାଜନୈତିକ ଭବିଷ୍ୟତ କଥା ଚିନ୍ତା କରି ଦ୍ୱନ୍ଦ୍ୱରେ ପଡ଼ିଛନ୍ତି। ଭାଜପା ସଭାପତି ମନମୋହନ ସାମଲଙ୍କ ଏପଟସେପଟ କଥା ରାଜ୍ୟରେ ଭାଜପା ଏବଂ ବିଜେଡି ମେଣ୍ଟକୁ ନେଇ ସସ୍ପେନ୍ସ ଲାଗି ରହିଛି। ଭାଜପା ନେତୃତ୍ୱ ବାରମ୍ବାର ଦିଲ୍ଲୀ ଯାଉଥିଲେ ମଧ୍ୟ ମେଣ୍ଟକୁ ନେଇ ଅଙ୍କ ଛିଡୁ ନ ଥିବା ବେଳେ ରାଜନଗର ବିଧାନସଭା କ୍ଷେତ୍ର କାହା ଭାଗରେ ପଡ଼ିବ ସେ ନେଇ ଦ୍ୱନ୍ଦ୍ୱ ଦେଖାଦେଇଛି। ୨୦୦୯ ପୂର୍ବରୁ କେନ୍ଦ୍ରାପଡ଼ାର ସଂସଦୀୟ କ୍ଷେତ୍ରର ଗୋଟିଏ ବିଧାନସଭା ଆସନ ଭାଜପା ଭାଗରେ ପଡ଼ିଥିଲା। ଏଥର ମେଣ୍ଟରେ ରାଜନଗର ବିଧାନସଭା ଆସନ ଭାଜପା ହାତକୁ ଯାଇପାରେ ବୋଲି ରାଜନୈତିକ ସମୀକ୍ଷକମାନେ ମତପ୍ରକାଶ କରିଛନ୍ତି।
କେନ୍ଦ୍ରାପଡ଼ା ବିଧାନସଭା ନିର୍ବାଚନମଣ୍ଡଳୀ ୨୦୦୦ ଓ ୨୦୦୪ରେ ବିଜେଡି-ଭାଜପା ମେଣ୍ଟ ସମୟରେ ଭାଜପା ଭାଗରେ ରହିଥିଲା। ସ୍ବର୍ଗତ ବେଦ ପ୍ରକାଶ ଅଗ୍ରଓ୍ବାଲ ୨୦୦୦ ମସିହାରେ ଭାଜପାରୁ ବିଜୟୀ ହୋଇଥିଲେ। କିନ୍ତୁ ମେଣ୍ଟ ଭାଙ୍ଗିବା ସହ ନିର୍ବାଚନମଣ୍ଡଳୀ ପୁନର୍ଗଠନ ହେବା ପରେ ପଟ୍ଟାମୁଣ୍ଡାଇ ଏସ୍ସି ଆସନର ବିଲୋପ ଘଟିଥିଲା। ୨୦୦୯ଠାରୁ କେନ୍ଦ୍ରାପଡ଼ା ଆସନକୁ ତଫସିଲ ଭୁକ୍ତ ଜାତି (ଏସ୍ସି)ପାଇଁ ସଂରକ୍ଷଣ କରାଯିବା ପରେ ବିଜେଡି କ୍ରମାଗତ ଭାବେ ଏହି ଆସନରୁ ଜିତି ଆସୁଛି। କଂଗ୍ରେସ ଦ୍ୱିତୀୟ ସ୍ଥାନରେ ରହୁଥିବା ବେଳେ ଭାଜପା ତୃତୀୟ ସ୍ଥାନରେ ରହୁଛି। ତେଣୁ ଏଥର ମେଣ୍ଟ ହେଲେ ଭାଜପା ଖାତାକୁ କେନ୍ଦ୍ରାପଡ଼ା ସଂସଦୀୟ କ୍ଷେତ୍ରର ଏକ ବିଧାନସଭା ଆସନ ଯାଇପାରେ ବୋଲି ଆଲୋଚନା ହେଉଛି। କେନ୍ଦ୍ରାପଡ଼ା ସଂସଦୀୟ କ୍ଷେତ୍ରର ୭ଟି ବିଧାନସଭା ଆସନରୁ ମାହାଙ୍ଗାରେ ପ୍ରତାପ ଜେନା, ସାଲେପୁର ଆସନ ପ୍ରଶାନ୍ତ ବେହେରା ଓ ମହାକାଳପଡ଼ା ନିର୍ବାଚନ ମଣ୍ଡଳୀ ଅତନୁ ସବ୍ୟସଚୀ ନାୟକଙ୍କ ଗଡ ରହିଥିବା ବେଳେ ଆଳି ପ୍ରତାପ ଦେବଙ୍କର ରହିଛି। ପାଟକୁରା ଆସନରେ ବିଜୟ ମହାପାତ୍ରଙ୍କ ପୁଅ ଅରବିନ୍ଦଙ୍କ ହାତରେ ରହିବାର ଚର୍ଚ୍ଚା ହେଉଛି। ମାତ୍ର ମେଣ୍ଟ ପରିପ୍ରେକ୍ଷୀରେ କେନ୍ଦ୍ରାପଡ଼ା ଓ ରାଜନଗର ଆସନ ମଧ୍ୟରୁ ଗୋଟିଏ ଆସନ ଭାଜପା ଭାଗକୁ ଯିବ ବୋଲି ଚର୍ଚ୍ଚା ହେଉଛି।
ଅନ୍ୟପକ୍ଷେ କେନ୍ଦ୍ରାପଡ଼ାରେ କଂଗ୍ରେସ ସ୍ଥିତି ଅପେକ୍ଷା କୃତ ଭଲ ଥିବା ଆଲୋଚନ ହେଉଥିବା ବେଳେ ଏହି ନିର୍ବାଚନ ମଣ୍ଡଳୀରେ ବିଜେଡି ନେତା ଓ କର୍ମୀମାଙ୍କ ଅନ୍ତଃଦ୍ୱନ୍ଦ୍ୱରେ ବୁଡି ରହିଛନ୍ତି। ଏପରିସ୍ଥଳେ କଂଗ୍ରେସ ପାଖରେ ଗଣେଶ୍ୱର ବେହେରାଙ୍କ ଭଳି ଜଣେ ଟାଣୁଆ ଓ ଅଭିଜ୍ଞ ନେତା ଥିବା ବେଳେ ଭାଜପା ପାଖରେ ସେଭଳି ଦକ୍ଷ ନେତା କିମ୍ବା ନେତୃତ୍ୱ ଏଯାଏ ବାହାରି ପାରି ନାହାନ୍ତି। ଯେହେତୁ ପୁରୁଣା ମେଣ୍ଟ ସମୟରେ କେନ୍ଦ୍ରାପଡ଼ାର ଏକ ଆସନ ଭାଜପାକୁ ଛାଡ଼ି ଦିଆଯାଇଥିଲା, ତେଣୁ ଏଥର ତାହାର ପୁନରାବୃତ୍ତି ଘଟି ରାଜନଗର ଆସନ ଭାଜପାକୁ ଦିଆଯିବା ଅସମ୍ଭବ ବି ନୁହେଁ। ଏହା ହେଲେ ବିଜେଡି-ଭାଜପାର ମିଳିତ ପ୍ରାର୍ଥୀଙ୍କୁ କଂଗ୍ରେସ ଏକାକୀ ଟକ୍କର ଦେବା କଷ୍ଟକର ହେଇପାରେ। ଯାହା ରାଜନଗର ବିଜେଡିର ୩ ଆଶାୟୀ ତଥା ଡ. ବସନ୍ତ ସାହାଣୀ, ବିଧାୟକ ଧ୍ରୁବ ସାହୁ ଓ ପୂର୍ବତନ ବିଧାୟକ ଅଂଶୁମାନ ମହାନ୍ତିଙ୍କ ସମର୍ଥକଙ୍କୁ ନିରାଶ କରିବ ବୋଲି କୁହାଯାଉଛି। ଯଦି ମେଣ୍ଟ ଧର୍ମ ପାଳନ ପୂର୍ବକ ଭାଜପାର ବିଧାୟକ ପ୍ରାର୍ଥୀ ନିର୍ବାଚନ ଲଢ଼ିବେ, ତେବେ ରାଜନଗର ବିଧାନସଭା ଆସନରୁ ଜ୍ଞାନ ରଞ୍ଜନ ବେଉରା ଲଢ଼ିବାକୁ ସୁଯୋଗ ପାଇବାର ସମ୍ଭାବନା ଅଧିକ ବୋଲି ଚର୍ଚ୍ଚା ହେଉଛି। ଏ ବାବଦରେ ଜ୍ଞାନ ରଞ୍ଜନ ବେଉରାଙ୍କୁ ପଚାରିବାରେ ଭାରତୀୟ ଜନତା ପାର୍ଟିର ସେ ଜଣେ ଶୃଙ୍ଖଳିତ କର୍ଯ୍ୟକର୍ତ୍ତା ହୋଇଥିବାରୁ କେନ୍ଦ୍ର ଓ ରାଜ୍ୟ ନେତୃତ୍ୱ ଯାହା ନିଷ୍ପତ୍ତି ନେବେ ତାକୁ ମାନି ନେବେ ବୋଲି କହିଥିଲେ। ମାତ୍ର ଏହାକୁ ଖଣ୍ଡନ କରି ବିଜେଡିର ବରିଷ୍ଠ ନେତା ବସନ୍ତ ସାହାଣୀ କହିଛନ୍ତି, ରାଜନଗର ଆସନ ବିଜେଡି ଗଡ ହୋଇଥିବା ବେଳେ ଏଠାରେ ବିଜେଡି ବିଧାୟକ ପ୍ରାର୍ଥୀ ଦେବ ବୋଲି କହିଥିଲେ। କିଛିଦିନ ଧରି ରାଜ୍ୟରେ ଭାଜପା ଓ ବିଜେଡି ମଧ୍ୟରେ ସମ୍ଭାବ୍ୟ ମେଣ୍ଟକୁ ନେଇ ଚର୍ଚ୍ଚା ଲାଗି ରହିଛି। ଆସନ ଭାଗବଣ୍ଟା ଛିଡୁ ନ ଥିବାରୁ ଏ ନେଇ ଏଯାବତ ପ୍ରାର୍ଥୀ ଘୋଷଣା ହୋଇ ପାରୁ ନ ଥିବା କୁହାଯାଉଛି। ଗୁରୁବାର ଦିଲ୍ଲୀରୁ ଫେରିବା ପରେ ରାଜ୍ୟ ଭାଜପା ସଭାପତି ମନମୋହନ ସାମଲ ପ୍ରଥମେ କହିଲେ, ପ୍ରୋସେସ ବା ପ୍ରକ୍ରିୟା ଚାଲିଛି। ତା’ର କିଛି ସମୟ ପରେ କହିଲେ, ଆମେ ଏକା ଲଢିବୁ। ଏବେ କହିଲେଣି ନିଷ୍ପତ୍ତି ହାଇକମାଣ୍ଡ ନେବେ। ମନମୋହନ ଏକାକୀ ଲଢିବା ନେଇ ସୋସିଆଲ ମିଡିଆରେ ପୋଷ୍ଟ କରିବା ପରେ ତାହାକୁ ଡିଲିଟ୍ କରିବାକୁ ନେଇ ପ୍ରଶ୍ନ ଉଠୁଛି। ତେବେ ଏ ନେଇ ଦିଲ୍ଲୀରେ ନେତାଙ୍କ ଘନ ଘନ ବୈଗକ ଚାଲିଛି। ଅପରପକ୍ଷେ କେତେଜଣ ବ୍ୟକ୍ତି ନେତା ମେଣ୍ଟ ସମ୍ଭାବନାକୁ ଅସମ୍ଭବ ବୋଲି କହୁଥିବାରୁ ରାଜନୀତି ବେଶ ସରଗରମ ରହିଛି।