ପାଟନା,୧୯।୨: ଭାଜପାକୁ ପରାସ୍ତ କରିବାକୁ ହେଲେ ବିରୋଧୀ ମେଣ୍ଟରେ କଂଗ୍ରେସ ଯୋଗଦେଉ ବୋଲି ଜେଡିୟୁ ସୁପ୍ରିମୋ ତଥା ବିହାର ମୁଖ୍ୟମନ୍ତ୍ରୀ ନୀତୀଶ କୁମାର ଓ ତାଙ୍କ ଡେପୁଟି ତେଜସ୍ବୀ ଯାଦବ ଆହ୍ବାନ ଦେବା ପରେ ବିରୋଧୀ ମେଣ୍ଟ ଖୁବ୍ଶୀଘ୍ର ଗଢ଼ାହେବା ଆବଶ୍ୟକ ବୋଲି କଂଗ୍ରେସ ନେତା ତଥା ପୂର୍ବତନ କେନ୍ଦ୍ରମନ୍ତ୍ରୀ ସଲମାନ ଖୁର୍ସିଦ କହିଛନ୍ତି। ସେ କହିଛନ୍ତି, ଆପଣମାନେ ଯାହା ଚାହାନ୍ତି, କଂଗ୍ରେସ ମଧ୍ୟ ସେଇଆ ଚାହେଁ। ତେବେ ବେଳେବେଳେ ପ୍ରେମରେ ସମସ୍ୟା ସୃଷ୍ଟି ହୋଇଥାଏ। ବିରୋଧୀ ମେଣ୍ଟ ଶୀଘ୍ର ଗଢ଼ାହେବାରେ ସେ ସହମତ, ତେବେ ପ୍ରଥମେ ଆଇ ଲଭ୍ ୟୁ କିଏ କହିବ ବୋଲି ଖୁର୍ସିଦ ପ୍ରଶ୍ନ କରିଛନ୍ତି।
୨୦୨୪ ଲୋକ ସଭା ନିର୍ବାଚନରେ ଭାଜପାକୁ ପରାସ୍ତ କରିବାକୁ ହେଲେ କଂଗ୍ରେସ ସମେତ ସମସ୍ତ ବିରୋଧୀ ଦଳ ହାତ ମିଳାଇବାକୁ ନୀତୀଶ ଶନିବାର ପୁଣିଥରେ ଆହ୍ବାନ ଦେଇଥିଲେ। ଏକ ମିଳିତ ସାମ୍ମୁଖ୍ୟ ଭାଜପାକୁ ୧୦୦ରୁ କମ୍୍ ଆସନକୁ ଖସାଇବାରେ ସମର୍ଥ ହୋଇପାରିବ ବୋଲି ୭୧ ବର୍ଷୀୟ ନୀତୀଶ କହିବା ବେଳେ ଉପସ୍ଥିତ ନେତାମାନେ ସ୍ବାଗତ କରିଥିଲେ। ତେଣୁ ଏ ଦିଗରେ କଂଗ୍ରେସ ତୁରନ୍ତ ନିଷ୍ପତ୍ତି ନେବା ଆବଶ୍ୟକ। ଏଥିପାଇଁ ଅପେକ୍ଷା କରିଛୁ, ଦିଲ୍ଲୀ ଯାଇ ସୋନିଆ ଗାନ୍ଧୀ ଓ ରାହୁଲଙ୍କୁ ଭେଟିବୁ ବୋଲି ସିପିଆଇ-ଏମ୍ ଏକାଦଶ ସାଧାରଣ ଅଧିବେଶନରେ ଉଦ୍ବୋଧନ ଦେଇ ବିହାର ମୁଖ୍ୟମନ୍ତ୍ରୀ କହିଥିଲେ। ତେବେ ପ୍ରଧାନମନ୍ତ୍ରୀ ହେବା କିମ୍ବା ଏହି ପଦ ଲାଗି ପ୍ରତିଦ୍ୱନ୍ଦ୍ୱିତା କରିବାକୁ ସେ ଚାହାନ୍ତି ନାହିଁ। ଦେଶକୁ ଏକାଠି କରିବା ଏବଂ ଘୃଣା ପ୍ରସାରରୁ ଲୋକଙ୍କୁ ମୁକ୍ତ କରିବା ତାଙ୍କର ଉଦ୍ଦେଶ୍ୟ ବୋଲି ନୀତୀଶ ଦୋହରାଇଛନ୍ତି।
ସମ୍ମିଳନୀରେ ଅନ୍ୟମାନଙ୍କ ମଧ୍ୟରେ ତେଜସ୍ବୀ ଯାଦବ, କଂଗ୍ରେସ ନେତା ସଲମାନ ଖୁର୍ସିଦ, ବିହାରର ପୂର୍ବତନ ମୁଖ୍ୟମନ୍ତ୍ରୀ ଜିତନ ରାମ ମାନ୍ଝି ପ୍ରମୁଖ ଉପସ୍ଥିତ ଥିଲେ। ଆଞ୍ଚଳିକ ଦଳଗୁଡ଼ିକ ମୁଖ୍ୟ ଭୂମିକା ନିଭାଇବା ଲାଗି କଂଗ୍ରେସ ଅନୁମତି ଦେବା ଆବଶ୍ୟକ ବୋଲି ତେଜସ୍ବୀ କହିଥିଲେ।