ହୋବାର୍ଟ,୧୬।୧: ଚଳିତ ଆଶେସ ସିରିଜ୍ର ଅନ୍ତିମ ତଥା ୫ମ ଟେଷ୍ଟରେ ଇଂଲଣ୍ଡ ଦଳର ବ୍ୟାଟିଂ ବିପର୍ଯ୍ୟୟ ଦେଖିବାକୁ ମିଳିଛି। ଅଷ୍ଟ୍ରେଲିଆର ଶକ୍ତିଶାଳୀ ବୋଲିଂ ଲାଇନ୍ ଅପ୍ ଆଗରେ ୨୭୦ ରନ୍ର ବିଜୟ ଲକ୍ଷ୍ୟ ପିଛା କରୁଥିବା ଇଂଲଣ୍ଡକୁ ଭଲ ଆରମ୍ଭ ଦେଇଥିଲେ ଦୁଇ ଓପନର। ରୋରି ବନର୍ସ (୨୬) ଓ ଜ୍ୟାକ କ୍ରାଓ୍ବଲେ (୩୬) ପ୍ରଥମ ଉଇକେଟ ପାଇଁ ୬୮ ରନ୍ ଯୋଡ଼ିଥିଲେ। ଲାଗୁଥିଲା ୩-୦ରେ ପଛୁଆ ଥିବା ଇଂଲଣ୍ଡ ଏଥର ଖାତା ଖୋଲିବ। କିନ୍ତୁ ସେହିଠାରୁ ଆରମ୍ଭ ହୋଇଥିଲା ବ୍ୟାଟିଂ ବିପର୍ଯ୍ୟୟ। ମାତ୍ର ୫୬ ରନ୍ ମଧ୍ୟରେ ଦଳ ତା’ର ସମସ୍ତ ଉଇକେଟ ହରାଇ ଅଲଆଉଟ୍ ହୋଇଯାଇଥିଲା ୧୨୪ ରନ୍ରେ।
୮୨ ରନ୍ରେ ଦାଓ୍ବିଦ ମଲାନଙ୍କ ରୂପେ ଦ୍ୱିତୀୟ ଉଇକେଟ ହରାଇଥିଲା ଇଂଲଣ୍ଡ। ତା’ ପରେ ମାତ୍ର ୪୨ ରନ୍ରେ ଜ୍ୟାକ କ୍ରାଓ୍ବଲେ (୩୬), ବେନ ଷ୍ଟୋକ୍ସ (୫), ଅଧିନାୟକ ଜୋ ରୁଟ୍ (୧୧), ସାମ ବିଲିଙ୍ଗ୍ସ (୧), ଓଲି ପୋପ (୫), କ୍ରିସ ଓ୍ବକ୍ସ (୫), ମାର୍କ ଉଡ୍ (୧୧), ଓଲି ରବିନସନ (୦) ଆଉଟ୍ ହୋଇଥିଲେ। ଅଷ୍ଟ୍ରେଲିଆ ପକ୍ଷରୁ ପାଟ କୁମିନ୍ସ, ସ୍କଟ ବୋଲାଣ୍ଡ ଓ କାମେରୋନ ଗ୍ରୀନ ୩ ଲେଖାଏ ଉଇକେଟ ନେଇଥିଲେ। ଏହି ବିଜୟ ସହ ଆଶେସ ସିରିଜ୍କୁ ଅଷ୍ଟ୍ରେଲିଆ ୪-୦ରେ ହାତେଇ ନେଇଛି।