ଅମୃତସର,୮।୮: ଜନ୍ମ ଦେଇଥିବା ମା’ ବଡ଼ ନା ପାଳନ କରିଥିବା ମା’ ବଡ଼। ଏହାର ସମାଧାନ ପାଇଁ ଏବଂ ଶିଶୁକନ୍ୟାଙ୍କୁ ନିଜର କରିବା ଲାଗି ଦୁଇ ମା’ ଏବେ ଥାନାରେ ପହଞ୍ଚିଛନ୍ତି। ଏଭଳି ଅଭାବନୀୟ ଘଟଣା ପଞ୍ଜାବ ଅମୃତସରରେ ଘଟିଛି। ଦୁଇ ମା’ ଶିଶୁକନ୍ୟାକୁ ନିଜଠାରୁ ଅଲଗା କରିବାକୁ ନାରାଜ। ତେବେ ମା’ଙ୍କର ବିବାଦରେ ପୋଲିସ କୌଣସି ନିଷ୍ପତ୍ତି ଗ୍ରହଣ କରି ପାରୁ ନାହିଁ। ଦୁହିଁଙ୍କୁ ବୁଝାଶୁଝା କରି ପୋଲିସ ନୟାନ୍ତ ହେଲାଣି। ଜନ୍ମ ଦେଇଥିବା ମା’ଙ୍କ ନାମ ବେବି। ତାଙ୍କର ପୂର୍ବରୁ ଦୁଇ ଝିଅ ଅଛନ୍ତି। ତୃତୀୟ ଝିଅ ଜନ୍ମ ହେବା ପରେ ବେବି ପଡ଼ୋଶୀ ତାନିଆଙ୍କୁ ପାଳନ ଦାୟିତ୍ୱ ଦେଇଥିଲେ।
ମାତ୍ର ତାନିଆ ଶିଶୁକନ୍ୟାଙ୍କୁ ପୋଷ୍ୟ ଭାବେ ଗ୍ରହଣ କରିବା ପୂର୍ବରୁ କୌଣସି ଆଇନଗତ ପଦକ୍ଷେପ ଗ୍ରହଣ କରି ନ ଥିଲେ। ଏବେ ବେବି ନିଜ ଶିଶୁକନ୍ୟାଙ୍କୁ ମାଗୁଛନ୍ତି। କିନ୍ତୁ ଜନ୍ମରୁ ଏକ ମାସ ଶିଶୁକନ୍ୟାଙ୍କୁ ପାଖରେ ରଖିଥିବା ତାନିଆ ଦେବାକୁ ଅମଙ୍ଗ ହେଉଛନ୍ତି। ତାନିଆ ଶିଶୁକନ୍ୟାଙ୍କୁ ଫେରାଇବା ଲାଗି ୩୫ ହଜାର ଟଙ୍କା ଦାବି କରୁଥିବା ବେବି ଥାନାରେ ଅଭିଯୋଗ କରିଛନ୍ତି। ଜନ୍ମ ପରେ ଶିଶୁକନ୍ୟାଙ୍କୁ ପୋଷ୍ୟଭାବେ ନେବା ଲାଗି ତାନିଆଙ୍କ ସ୍ବାମୀ କର୍ନ ବେବିଙ୍କ ଘରକୁ ବାରମ୍ବାର ଆସୁଥିବା ଅଭିଯୋଗ ହୋଇଛି। କିଛି ଦିନ ଶିଶୁକନ୍ୟାଙ୍କୁ ଲାଳନ ପାଳନ କରିବା ପାଇଁ ସେମାନେ ଅନୁରୋଧ କରିଥିଲେ।
ଶେଷରେ ବେବି ତାଙ୍କୁ ଶିଶୁକନ୍ୟାଙ୍କୁ ଦେଇଥିଲେ। ୧୦ ଦିନ ପରେ ଶିଶୁକନ୍ୟାଙ୍କୁ ଫେରାଇ ଆଣିବା ଲାଗି ବେବି ତାନିଆଙ୍କ ଘରେ ପହଞ୍ଚିଥିଲେ। ମାତ୍ର ତାନିଆ ଶିଶୁକନ୍ୟାଙ୍କୁ ଫେରାଇବାକୁ ମନା କରିଥିବା ବେବି ଅଭିଯୋଗ କରିଛନ୍ତି। ଦୁଇ ମା’ଙ୍କୁ ବୁଝାଶୁଝା ଜାରି ରହିଥିବା ଏସ୍ଆଇ ଗୁରଜୀତ୍ ସିଂ ସୂଚନା ଦେଇଛନ୍ତି।